1Mandaj Dioslla, ñuca ima shina cashcata ricuhuailla.
Ñucaca ima juchachinata mana rurashpami purircani.
Caita chaita mana yuyashpami Mandaj Diosllapi shunguta churarcani.
2Mandaj Dioslla, ñucataca callarishpa alli ricupailla.
Quiquinpajtaj cashcatapish ricupailla.
Ñuca tucui yuyaicunatapish, ñuca shungutapish shushushpa ricupailla.
3Quiquinpaj llaquij cashcaca ñuca ñahuimantaca mana anchunchu.
Chaimi quiquinpaj mana llullapi purini.
4Mishqui shimi jayaj shungucunahuanca, mana tiyarircanichu.
Ñahui ricuillapi alli tucushca purijcunapajmanca mana yaicushcanichu.
5Millaicunapaj tandanacuitaca p'iñarcanimi.
Diosta mana rijsijcunahuanpish manataj tiyarircanichu.
6Ima mana allita mana rurashcapimi ñuca maquita maillani.
Mandaj Dioslla chashna cashpami quiquinpaj altar muyundijpi purisha.
7Pagui nishca tonohuan caparingapajmi chaipi casha.
Mancharinacunata quiquin rurashcata parlangapajmi chaipi casha.
8Mandaj Dioslla, can maipi causan huasitamari c'uyani.
Quiquin sumaj achij nicujhuan causacun ucutapish c'uyanimi.
9Juchayuj millaicunahuan huañuchun ama saquihuaichu.
Huañuchij runacunahuan huañuchun ama saquihuaichu.
10Paicunapaj maquicunapica millaimari junda.
Alli maquica camaricunahuan jundami.
11Ashtahuanpish ñucaca imapi mana pandashpami purini.
Ñucataca llaquihuayari, cacharichihuayari.
12Ñucaca sinchi allpapimi shayacuni.
Tandanacushcacunapica Mandaj Diostami alli nishpa huillani.
Who We AreWhat We EelieveWhat We Do
2025 by iamachristian.org,Inc All rights reserved.
