ÉXODO 2 - Quichua Chimborazo Bible

Moisés huacharishcami

1Leví aillupuramanta shuj runami, Leví aillullamantataj caj shuj huarmita paipaj huarmi cachun japirca.

2Chai huarmi chichushpaca, shuj c'ari huahuatami huacharca. Chai huahuataca sumaj cajta ricushpami, quimsa quillacama pacashpa charirca.

3Ña mana ashtahuan pacalla chari tucushpami, juncomanta rurashca shuj canastata japishpa asfaltohuan, breahuan jahuata llihuishpa chai huahuataca chai canasta ucupi churashpa, jatun yacu uripi tiyaj carrizocuna chaupipi churarca.

4Chai huahuapaj panica caruman tucushpami chai huahua ima tucujta chapacurca.

5Faraonpaj ushushica jatun yacupi armangapajmi uriyarca. Paipajta ruraj huarmicuna yacu urita puricujpimi, paica carrizo chaupipi shuj canasta tiyacujta ricushpa, paipajta ruraj shuj huarmitaca chai canastata japimuchun mandarca.

6Chai canastata pascashpa ricushpaca, huahua huacacujta ricushpa paita achcata llaquishpami:

–Cai huahuaca hebreocunapuramantamari– nirca.

7Chaipimi chai huahuapaj panica faraonpaj ushushitaca:

–¿Cai huahuata chuchuchishpa huiñachichunca, hebrea shuj huarmita cayana allichu canman?– nirca.

8Chaimi faraonpaj ushushica:

–Ri, pushamugri– nijpi, chai huambra rishpaca huahuapaj mamallatatajmi pushamugrirca.

9Chai huarmitaca faraonpaj ushushica:

–Cai huahuata apashpa huiñachishpa cui, can huiñachishcamantaca pagashallami– nijpimi, paica huahuata apashpa huiñachirca.

10Chai huahua ña jatunyajpica faraonpaj ushushipajman apamujpimi, paica chai huahuataca, quiquin huahua shina cachun japishpa:

–Cai huahuataca yacumantami llujshichircani– nishpa, Moisesta shutichirca.

Egiptomanta Moisés miticushpa rishcami

11Chai punllacunapimi cashna tucurca: Moisesca ña jatun runa cashpami, paipaj huauquicunata ricunaman llujshishpa, paicunataca yallitaj sinchi trabajocunapi cajta ricurca. Paipaj huauqui hebreo shujtaca, shuj egipcio macacujtami ricurca.

12Chaimi paica urata, janajta ricushpa pi mana ricurijpi egipcio runata huañuchishpa t'iyu allpapi pambarca.

13Cayandij punlla llujshishpaca, hebreocunapurallataj ishqui runacuna p'iñanacucushpaca shujca caishujta macajpimi, chai macacuj runataca:

–¿Ima nishpataj quiquinpurallatatajca macacunguiyari?– nirca.

14Chaimi chai runaca:

–¿Pitaj cantaca ñucanchijta mandaj cachun, juez cachunca churarcari? ¿Ñucatapish chai egipcio runata huañuchishca shinachu huañuchisha yuyangui?– nijpimi Moisesca: “Chai runata ñuca huañuchishcataca ñamari yachaj chayashcacuna” nishpa achcata mancharirca.

15Chashna rurashcata faraón yachaj chayashpaca, Moisestaca ima shinapish huañuchinatami yuyarca. Ashtahuanpish Moisesca faraonta miticushpami Madián llajtaman rirca.

16Chaiman rishpaca pugyu c'uchullapimi tiyarirca. Madián llajtapi causaj curaca, canchis ushushicunatami charirca. Paicunaca chai punllaca, pugyumanta yacuta llujshichishpa rumicunapi jundachishpa paicunapaj yayapaj ovejacunaman ubyachingapajmi shamurcacuna.

17Ashtahuanpish michijcuna shamushpa paicunata anchuchishpa cachasha nijpimi, Moisesca jatarishpa paicunata mitsashpaca, chai solteracunapaj ovejacunamanraj yacuta ubyachirca.

18Chai solteracuna paicunapaj yaya Reuelpajman ña tigrajpimi paicunapaj yayaca:

–¿Ima nishpataj cunanca utca shamunguichij?– nijpi,

19paicunaca:

–Shuj egipcio runamari michijcuna ñucanchijta quichushpa ubyachishun nijpi ñucanchijta mitsashpa yacutapish llujshichishpa ovejacunaman ubyachirca– nircacunami.

20Shina nijpimi Reuelca paipaj ushushicunataca:

–¿Chai runaca maipitaj? ¿Ima nishpataj saquimurcanguichigari? Micunata carangapaj cayamugrichij– nirca.

21Moisesca Reuelhuan causangapaj saquirinatami ari nirca. Reuelca paipaj ushushi Seforatami paipaj huarmi cachun curca.

22Séfora huarmica shuj c'ari huahuatami huacharca. Chai huahuataca Gersontami shutichirca. Moisesca: “Cai ajeno llajtapica catishpa causajllami cani” nishpami chashna shutichirca.

23Ña tauca huatacuna q'uipaca Egiptota jatun mandajca huañurcami. Israelcunaca yallitaj sinchi trabajocunapi cashpami, aij nishpa caparircacuna. Paicuna yallitaj sinchi trabajopi cashpa caparishcaca Taita Diospajmanmi chayarca.

24Paicuna aij nishpa caparishcata uyashpami, Taita Diosca Abrahamman, Isaacman, Jacobman ari nishcata yuyarirca.

25Israelcuna llaquita apacujta Taita Dios ricushpaca yallitajmari llaquita apacun nishpami llaquirirca.