1Riquichij, Mandaj Diosca tucui cai pachatamari ñutushpa chushajta saquigrin.
Tucui cai pachapi causajcunataca urata janajtami cachanga.
Tucuita anchuchishpami chushajta saquinga.
2Chaipica tucuicunapaj ima shinami llaqui, chai shinallatajmi curapajpish canga.
Amopajta rurajpaj ima shinami canga, chai shinallatajmi amopajpish canga.
Amapajta ruraj huarmipaj ima shinami canga, chai shinallatajmi amapajpish canga.
C'atujpaj ima shinami canga, chai shinallatajmi randijpajpish canga.
Randijpaj ima shinami canga, chai shinallatajmi c'atujpajpish canga.
Mañajpaj ima shinami canga, chai shinallatajmi mañachijpajpish canga.
Mañachishcata japijpaj ima shinami canga, chai shinallatajmi mañachijpajpish canga.
Divijpaj ima shinami canga, chai shinallatajmi diviyachijpajpish canga.
3Tucui allpami chushajlla saquiringa.
Tucui imapish illajmi saquiringa.
Mandaj Diosmi tucui chaicunataca huillan.
4Allpaca llaquimari tucushca, chushajmari saquirishca.
Cai pachaca ungushcamari urmashcamari.
Cai pachapi ashtahuan charij llajtacunapish ungushcamari.
5Allpaca paipi causajcunapaj juchamantamari yanga tucushca.
Mandashcacunatamari mana cazushca.
Chaitataj ruranacunatamari p'aquishca.
Huiñaipaj ari ninacushcatamari p'aquishca.
6Chaimantami llaqui tucushca canman nishcaca tucui cai pachata tucuchirca.
Chaipi causajcunatapish tucuicunatami jatunta llaquichirca.
Chaimi cai pachapi causajcunaca tucui tucuchishca carca.
Cai pachapi causajcunaca ashacunallami tucurca.
7Uva chagraca ungurcami.
Vinopish ashallayarcami.
Cushijlla shungucuna cashcaca tucuicunami aij nicurcacuna.
8Panderocunapi tocashpa cushicunapish tucurircami.
C'ulun ninacushpa cushicunapish tucurircami.
Arpapi tocashpa cushicunapish tucurircami.
9Ña mana vinota ubyashpa cantangacunachu.
Machajcunapajca sidraca mana ubyaipaj jayajmi canga.
10Pinganayajta causashcamantami, puebloca urmachishca saquirishca.
Pi ama yaicuchunmi huasicunapish tucui huichcashca cashca.
11Vino illashcamantami ñancunapi caparishpa puricuncuna.
Yallitaj cushicunaca chulunyashcamari.
Cushicunataca cai pachamanta anchuchishcamari.
12Puebloca ñutuchishcami saquirirca.
Punguca mirga mirga p'aquimi siricurca.
13Tucui cai pachapi causajcuna, tucui gentecunami olivos yurata chaspishpa cozichashca aceituna shina ashalla canga.
Uvata pallashca q'uipa ch'alanapaj huaquincunalla saquirishca shinami canga.
14Chai llaquimanta saquirijcunaca cushicushpa sinchita caparishpami cantangacuna.
Mandaj Dios jatun cashcataca mama cucha ladomantapishmi caparishpa cantangacuna.
15Chashna cashcamantaca Mandaj Diostaca, pugru pambacunapi causajcuna alabaichigari.
Mama cucha uripi causajcunapish israelcunata Mandaj Diostaca jatunyachishca cachun.
16Tucui cai pachamantami: “Cashcata rurajca jatun nishca cachun” nishpa cantacujta uyarcanchij.
Chaimi ñucaca: ¡Aij ñucalla llaquihuanmari huañucuni, llaquihuanmari huañucuni!
Mana cazujcunaca ña manataj cazuncunachu.
Yallitaj mana cazuj millaicunami tucuncuna.
17¡Cai pachapi causajcuna mancharinami, jutcumi, linchimi cancunapajca ña chapacun!
18Manchaihuan callpacujca jutcupimi urmanga.
Jutcumanta llujshishpa callpacushpapish linchipimi pillurishpa urmanga.
Jahua pacha ventanacunaca pascashcami canga.
Cai pachata aparijpish chujchungami.
19Cai pachaca ñuturingami.
Cai pachaca tucuimi mirga mirga tucunga.
Tucui cai pachaca yallitajmi chujchunga.
20Allpaca machashca shinami huaracaringa.
Shuj chugllata shinallami cuyuchishca canga.
Allpaca jucha yallitaj llashajpi urmangami.
Cutinca ña manataj jataringachu.
21Chai punllaca Mandaj Diosca jahua huairapi mandajcunatapish llaquichingami.
Cai pachapipish llajtacunata jatun mandajcunatami llaquichinga.
22Chaicunataca tucuicunatami montonanga.
Pamba ucupi prezushcacunata shinami montonanga.
Carcelpi huichcashcami saquiringacuna.
Achca punllacuna q'uipaca llaquichishcami canga.
23Tucuita Mandaj Diosca Sión urcupi caj Jerusalenpimi mandacunga.
Pai agllashca cunaj yuyajcunapaj ñaupajpimi achij nicuj mandacunga.
Chaipica lunaca pingai tucungami.
Intica musparingami.
Who We AreWhat We EelieveWhat We Do
2025 by iamachristian.org,Inc All rights reserved.
