NEHEMÍAS 5 - Quichua Chimborazo Bible

Israelcunaca paicunapurallataj llaquichinacushcami

1Chaipica paicunapura judiocunallatatajmi tucui chaipi cajcunaca paicunapaj huarmicunandij tucushpa, juchachishpa rimarcacuna.

2Maijancunaca: “Ñucanchijpish, ñucanchij churicunapish, ñucanchij ushushicunapish achcacuna cashcamantami, yaricaihuan ama huañungapaj granocunata fiyarcanchij” nircacunami.

3Maijancunaca: “Ñucanchijca yaricai tiyashcamantami ñucanchij allpacuna, ñucanchij uva chagracuna, ñucanchij huasicuna jahua granocunata randingapaj llujshichircanchij” nircacunami.

4Shujcunaca: “Ñucanchijca jatun mandajman tributota cungapajpish ñucanchij allpacuna, ñucanchij uva chagracuna jahuami cullquita llujshichircanchij.

5Ñucanchijpish paicunapish quiquin aichapurallatajmi canchij. Ñucanchij huahuacunapish paicunapaj huahuacuna shinallatajmi. Chashna cashpapish ñucanchijca ñucanchij huahuacunataca ñucanchijpurallamantajmi c'atuna tucurcanchij. Ñucanchij ushushicunamanta maijancunaca ñamari huatashca shina paicunapajta rurajcuna tucurca. Ñucanchij allpacunapish, uva chagracunapish ña shujtajcunapaj cashcamantaca, ñucanchij ushushicunataca imahuan mana surcui tucunchijchu” nircacunami.

6Paicuna chai shimicunahuan caparishpa chashna nijta uyashpami yallitaj p'iñarircani.

7Chai q'uipaca alli yuyarishpami jatuncunatapish, mandajcunatapish: “¿Ima nishpataj cancunapurallatatajca huahua cullquihuan pagachun ninguichij?” nishpami sinchita rimarcani. Chashna ruracushcata imata rurangapajmi shuj tandanacuiman tandachishpa,

8cashna nircani: “Israelcunataca, shujtaj llajta mana israelcunaman c'atushca cajpipish, ñucanchijca ima shinapish tucushpamari randishpa llujshichircanchij. Cunanca ashtahuanpish israelcunapurallamantataj randishpa llujshichichunmari israelcunapurallamantaj c'atushcanguichij” nijpimi, paicunaca imata mana nishpa upalla saquirircacuna.

9Cashnapishmi nircani: “Quiquinpurallataj chashna ruranaca mana allichu. Ñucanchijta p'iñaj llajtacuna yanganchishpa asicunalla ama cangapajca ñucanchij Taita Diosta manchashpami causana canguichij.

10Chaimanta cunanca ñucapish, ñuca huauquicunapish, ñucapajta rurajcunapish, cullquita, granota mañachishcataca ama cobrashpa saquishunchijlla.

11Cunanca paicunamanca paicunapaj allpacunata, uva chagracunata, olivos yuracunata, huasicunata tigrachichunmi rogani. Cullquimanta cashpa, granomanta cashpa, vinomanta cashpa, aceitemanta cashpa mashna cullquita japicushca cashpaca ashtahuanpish allpayujmanca patsajmanta shujtami tigrachina canguichij” nircanimi.

12Shina nijpi paicunaca: “Can nishca shinallatajmi ñucanchij mañachishcamantaca imata mana mañashpa paicunaman tigrachishunlla” nijpimi, ñucaca curacunata cayashpa paicunapaj ñaupajpi: “Chashna rurashuntajmi” nichircani.

13Ñuca churanata chaspishpami cashna nircani: “Cunan ari nishcata mana pajtachijtaca Taita Diosca cambaj familiatapish, cambaj trabajotapish cashna chaspijpi ima illaj saquirichun nijpimi, tucui chaipi tandanacushcacunaca “¡Chashnataj cachun!” nishpaca Mandaj Diosta alabashpa tucuicuna ima shina ari nishca shinataj pajtachircacuna”.

Nehemiasca shujtajcunata ayudashcami

14Jatun mandaj Artajerjesca, chunga iscun huatacunata ña mandacushpami, ñucataca Judá llajtata mandaj cachun churarca. Pai quimsa chunga ishqui huatata mandangacamami ñucaca Judá llajtapica, chunga ishqui huatata mandarcani. Chaicama mandacushpapish ñucapish, ñuca huauquicunapish mandaj cashcamanta japina cashcataca mana japircanchijchu.

15Ashtahuanpish ñucapaj ñaupa mandajcunaca, chuscu chunga yalli siclo cullquita cobrashca jahuami israelcunataca micunamantapish, vinomantapish mañashpa llaquichijcuna carca. Chai jahuami paipajta rurajcunapish israelcunata yallitaj llaquichishpa mandajcuna carca. Ñucaca Taita Diosta manchaj cashcamanta mana chashna rurarcanichu.

16Ashtahuanpish ñucaca Jerusalén pircata pircaipipish ñuca pircana cashcataca pircarcanimi. Ñucapajta rurajcunapish tucuicunami chashnallataj rurarcacuna. Maijanman cullquita mañachishpapish mana paicunapaj allpa jahua mañachircanichu.

17150 judiocunapish, mandajcunapish, ñucanchij muyundij llajtacunamanta ñucapajman shamujcunapishmi ñucahuan micuj carca.

18Micunatapish punllantami shuj huagrata, tucuimanta yalli sujta ovejacunata allichijcuna carca. Ñucapajpish alasyuj animalcunatami allichijcuna carca. Vinotapish cada chunga punllapimi yallitaj achcata apamujcuna carca. Tucuicuna yallitaj llaquita apacujpimi, mandaj cashcamanta japina cashcatapish paicunataca mana mañarcani.

19Cai llajtapi causajcunapajca allitami rurarcani. Ñuca Dioslla ñucapaj allita ruranatapish ama cungaripangui.