1Taita Dioslla, ñaupa huatacunapi, ñaupa punllacunapica quiquinca allicunatamari rurashcangui.
Chaitaca ñucanchij yayacunami parlarca.
Ñucanchij rinrincunahuantajmi uyarcanchij.
2Llajtacunataca quiquinpaj maquihuanmi carcushpa cachashcangui.
Gentecunataca llaquichishpami
llujshichishpa cachashcangui.
Chashna rurashpaca ñucanchij yayacunatami tarpuj shina cai llajtapi churashcangui.
3Cai allpataca mana paicunapaj espadahuan macanacushpachu japishcacuna.
Paicunapaj rigrapish mana mishachircachu.
Ashtahuanpish quiquinpaj alli lado rigrahuan, quiquinpaj sumaj achij nicujhuanmi mishachishcangui.
Paicunapi cushicuj cashcamantami chashna rurashcangui.
4Taita Dioslla, quiquinca ñuca Jatun Mandajmi cangui.
Jacobpaj huahuacunaman quishpirinata cachayari.
5Quiquinhuanmi ñucanchijta p'iñajcunataca chaspishpa shitashun.
Quiquinpaj shutipimi, ñucanchijta p'iñajcunataca sarushun.
6Ñuca arcopica, mana shunguta
churashachu.
Ñuca espadapish mana quishpichingachu.
7Ñucanchijta p'iñajcunamantaca quiquinmari quishpichircangui.
Ñucanchijta millajcunataca
pingaichircanguimi.
8Ñucanchijca Taita Dioshuanmari tucui causaipi cushicushun.
Quiquinpaj shutitaca huiñaitami alabashun. Selah
9Ashtahuanpish ñucanchijtaca shitahuashcanguimari.
Pingaichishcanguimari.
Ñucanchij soldadocunahuanca ña mana
llujshinguichu.
10Ñucanchijtaca ñucanchijta p'iñajcunapaj ñaupajmanta manchashpa tigrachunmi saquishcangui.
Ñucanchijta millajcuna ñucanchij charishcacunata paicunapaj apachunmi saquishcangui.
11Huañuchijcunapaj maquipi ovejata churaj shinami paicunapaj maquipi churashcangui.
Shujtaj llajtacunamanmi caita chaita cachashcangui.
12Quiquin agllashcacunataca, imata mana japishpami c'atushcangui.
Caimi valin, chaimi valin mana nishcanguichu.
13Ñucanchij c'uchullapi causajcuna yanganchishpa yuyarishcapi parlanacucunallapimi churashcangui.
Ñucanchij muyundijpi causajcuna chanzata rurashpa asinatamari rurashcangui.
14Shujtaj llajtacuna ñucanchijmanta yuyachij shimicunata rimashpa asina cachunmi churashcangui.
Ñucanchijta ricujcunaca tucuicunami umata cuyuchishpa asincuna.
15Punllantami pingai tucucunilla.
Musparinacunamari ñahuita tapacunlla.
16Ñucata p'iñajcuna juchachishpa yanganchishcacunamari ñucataca yangapi churan.
Ñucata p'iñajcuna paicunapish llaquichishun nicushcamantami chashna llaquilla cani.
17Tucui cai llaquicunami shamushca.
Shina cajpipish quiquintaca mana cungarishcanchijchu.
Quiquinhuan ari ninacushcatapish
mana p'aquishcanchijchu.
18Ñucanchij shungupish mana huashaman tigrarishcachu.
Ñucanchij chaquicunapish quiquinpaj ñanmantaca mana anchurishcachu.
19¿Ima nishpataj chacalcuna causanaman shitanguiyari?
¿Ima nishpataj huañunalla amsahuan tapanguiyari?
20Ñucanchij Taita Diospaj shutita cungarishca cajpi, mana cashpaca shujtaj diosman maquita chutashpa adorashca cajpica,
21Taita Diosca ¿maitataj mana yachanman carcari?
Paica shungupi pacalla cajcunatapish yachanmi.
22Ashtahuanpish quiquinpaj cashcamantamari, tucui punlla ñucataca huañuchincuna.
Huañuchinapajmi nishca ovejacuna shinami canchij.
23Jatun Dioslla, rijchariyari.
¿Ima nishpataj dormicunguilla?
Rijchari ama huiñaipaj caruyaichu.
24Ñucanchijta llaquichicujpi, ñucanchij llaquihuan cajpica ¿ima nishpataj cungaringuiyari?
Quiquinpaj ñahuitaca ¿ima nishpataj pacahuanguiyari?
25Ñucanchij almaca llaquicunahuanca ñutu allpapi urmashca shinamari.
Ñucanchij cuerpoca pambapi sirijta aisashcamari.
26¡Ñucanchijta ayudangapaj jatariyari.
Quiquinpaj llaquij cashcahuan quishpichihuayari!
Who We AreWhat We EelieveWhat We Do
2025 by iamachristian.org,Inc All rights reserved.
