APOCALIPSIS 21 - Quichua Chimborazo Bible

Cielopish allpa pachapish mushuj cashcami

1Chaipica, ñaupa cielopish ñaupa allpa pachapish, mama cuchapish ña mana tiyarcachu. Chaimanta mushuj cielota mushuj allpa pachatami ricurcani.

2Ñucaca Juanmi cani. Diospaj cielomanta mushuj Jerusalén Diospajlla caj pueblo uriyacujtami ricurcani. Paica cusata japingapaj sumajta allichirishca novia shinami carca.

3Cielomanta cashna nishpa sinchita caparijtami uyarcani: “Diospaj carpa huasica cunanca tucui gentecunahuanmi. Paicunahuanmi causanga paicunaca Diospaj huahuacunami canga. Paicunapaj Diostaj cashcamantaca, paitajmi paicunahuan canga.

4Diosca paicunapaj ñahuicunamantaca, tucui huiquitami p'ichanga. Ñaupa tucui imalla tiyajcunaca, ña mana tiyashcamanta huañuipish, huacaipish, llaquipish, nanaipish ña mana ashtahuan tiyangachu” nircami.

5Chai q'uipaca jatun tiyarinapi tiyacujmi cashna nirca: “Riqui, ñucaca tucui ima tiyajtami mushujta rurani. Cashnapishmi nirca. Caicunaca ima shina cana cashca shinataj pajtana mana llulla shimicunami. Chaita quillcai” nircami.

6Chai q'uipaca cashnapishmi nirca: “Ñami tucuita rurani. Ñucaca callari A, tucuri Z shina callarichijpish, tucurichijpishmi cani. Maijanpish yacunachijmanca, causaita cuj yacu llujshicujtami ubyachun convidashpalla cusha.

7Maijanpish mishajca, tucui ima japina cashcatami japinga. Ñucaca paipaj Diosmi casha, paipish ñuca huahuami canga.

8Shina cajpipish manchajcunaca, mana crijcunaca, millashcacunaca, huañuchijcunaca, apanacushpalla causajcunaca, brujocunaca, rurashcalla dioscunata adorajcunaca, tucui llullajcunapish paicuna japina cashcataca azufrehuan rupacuj nina cuchatami japingacuna. Chaica q'uipa huañuimi” nircami.

Mushuj Jerusalenmi

9Chaimantaca canchis angelcuna canchis copacuna junda, tucuri canchis llaquicunata charijcunapuramanta shuj angel shamushpaca: “Caiman shamui, Ovejahuan cazarana noviata ricuchisha” nircami.

10Chashna nicujpi Diospaj Espiritumi ñucataca shuj jatun urcu jahuaman pusharca. Chaipimi Diospajlla caj Jerusalén jatun pueblota Diospaj cielomanta uriyacujta ricuchirca.

11Chai puebloca Diospaj sumaj cashcatami charirca. Paipaj lamyacuica, achca valij sumaj jaspe rumi shina, cristal shinami achijnicurca.

12Chai pueblo muyundij pircaca, jahuajta alto pircashcami carca. Chaipica chunga ishqui pungucunami tiyarca. Tucui pungupimi angelcunapish shuj shuj shayacurca. Israelpaj chunga ishqui churicunapaj huahua huahuacunapaj shuticunapish chaipimi quillcashca carca.

13Quimsa punguca inti llujshin ladoman, quimsa punguca janaj ladoman, quimsa punguca ura ladoman, quimsa punguca inti huashicun ladomanmi carca.

14Pueblo muyundijta pircashcaca chunga ishqui rumicuna jahuapimi carca. Chai chunga ishqui rumicunapica, Ovejapaj, chunga ishqui apostolcunapaj shuticunapishmi quillcashca carca.

15Ñucahuan parlanacuj angelca pueblotapish pueblo muyundijta pircashcatapish pungucunatapish mashna cashcata midingapajmi curi varata charicurca.

16Chai puebloca largomanpish anchomanpish altomanpish chuscundij ladocunami chai shinallataj carca. Charicushca varahuan angel midijpica, tucui ladocunami 2.200 kilometrocuna carca.

17Pueblo muyundij pircatapish midijpica sujta chunga metromi carca. Angelca allpa pachapi mashna cashcata midijcuna midij shinallatajmi midirca.

18Pueblo muyundijta pircaca jaspe sumaj rumihuan rurashcami carca. Pueblocarin mana chagrushca curihuan rurashcami carca. Mushuj vidrioman rijchajpishmi carca.

19Pueblo muyundijpi caj pircata pircanapaj callaripi churashca rumicunaca shujtaj shujtaj sumaj rumicunata churashpa sumajyachishcami carca. Callaripi churashca punta rumica jaspe, q'uipaca zafiro, ishquipaj q'uipaca ágata, quimsapaj q'uipaca esmeralda,

20chuscupaj q'uipaca ónice, pichcapaj q'uipaca cornalina, sujtapaj q'uipaca crisólito, canchispaj q'uipaca berilo, pusajpaj q'uipaca topacio, iscunpaj q'uipaca crisopraso, chungapaj q'uipaca jacinto, chunga shujpaj q'uipaca amatista nishca rumicunami carca.

21Chunga ishqui pungucunapish chunga ishqui perlacunami carca. Cada pungumi shuj perla carca. Shinallataj chai pueblopaj ñanpish imahuan mana chagrushca curihuan rurashcami carca. Vidrio shina caishuj ladoman ricunallami carca.

22Chai pueblopica, Taita Diosta adorana huasitaca, maipi mana ricurcanichu. Tucuita Rurai Tucuj Mandaj Taita Dios, Ovejapishmi chai huasica.

23Dios sumaj cashcahuan achijyachijpi, Ovejapish paillataj achijyachij luz cashcamantaca intitapish lunatapish chai puebloca ña mana minishtinchu.

24Tucui llajtamanta caj quishpichishcacunami chai achijlla pueblopi puringacuna. Allpa pachapi jatun mandajcunami tucui imapish allicunataca chaiman apangacuna.

25Chaipica tuta mana tiyashcamanta, punllalla cashcamantami pungucunataca manataj huichcashca canga.

26Tucui llajtapi cajcunami paicunapaj llajtapi alli nishcacunata, sumaj nishcacunata chaiman apangacuna.

27Chaimanca ima mapa, millanayajta rurajcunapish, llullacunapish manataj yaicungacunachu. Ashtahuanpish causanaman rinata ricuchij Ovejapaj libropi shutita quillcashcacunallami chaimanca yaicungacuna.