1 CRÓNICAS 24 - Quichua Chimborazo Bible

1Aaronpaj huahua huahuacunapish mirga mirgapi ch'icanchishpa churashcami carcacuna. Aaronpaj churicunaca: Nadab, Abiú, Eleazar, Itamar shuticunami carca.

2Nadabhuan, Abiuhuanca huahuacunata manaraj charishpami, paicunapaj yaya manaraj huañujpi huañurca. Chaimantami cura canataca Eleazarhuan, Itamarllahuan japircacuna.

3Davidca, Eleazarpaj huahua huahuapura Sadoc curahuan, Itamarpaj huahua huahuapura Ahimelec curahuan tucushpami, Diospajta ruranapica huashan huashan rurashpa catichun curacunataca churarcacuna.

4Eleazarpaj huahua huahuapura mandajcunami, Itamarpaj huahua huahuapura mandajcunata yalli achcacuna carca. Eleazarpaj huahua huahuacunataca, paicunapaj ñaupa yayacunapaj huahua huahuacunata quiquinpurallata mandachunca chunga sujtacunatami churarca. Itamarpaj huahua huahuacunataca paicunapaj ñaupa yayacunapaj huahua huahuacunata quiquinpurallata mandachunca pusaj mandajcunatami churarca.

5Eleazarpaj huahua huahuacunapish, Itamarpaj huahua huahuacunapish Diospajlla ch'icanchishca ucupipish, Diospaj huasipipish mandajcuna tiyashcamantami chai mandanapica ishquindij aillumantataj sorteashpa churarca.

6Levitacunapuramanta caj Natanaelpaj churi Semaiasca quillcajmi carca. Paimi jatun mandajpaj, q'uipa mandajpaj, Sadoc curapaj, Abiatarpaj churi Ahimelecpaj, ñaupa yayacunamanta mirarishca quiquinpuralla caj curacunata mandajcunapaj, levitacunapaj ñaupajpi paicunapaj shuticunata quillcashpa, Eleazarpaj huahua huahuacunapajpish, Itamarpaj huahua huahuacunapajpish sorteashpa ima horalla turno pajtashcapaj cashna churarca.

7Punta sorteajpica Joiaribpajmi urmarca. Ishquipica Jedaiaspajmi urmarca.

8Quimsapica Harimpajmi urmarca. Chuscupica Seorimpajmi urmarca.

9Pichcapica Malquiaspajmi urmarca. Sujtapica Mijaminpajmi urmarca.

10Canchispica Cospajmi urmarca. Pusajpica Abiaspajmi urmarca.

11Iscunpica Jesuapajmi urmarca. Chungapica Secaniaspajmi urmarca.

12Chunga shujpica Eliasibpajmi urmarca. Chunga ishquipica Jaquimpajmi urmarca.

13Chunga quimsapica Hupapajmi urmarca. Chunga chuscupica Jesebeabpajmi urmarca.

14Chunga pichcapica Bilgapajmi urmarca. Chunga sujtapica Imerpajmi urmarca.

15Chunga canchispica Hezirpajmi urmarca. Chunga pusajpica Afsespajmi urmarca.

16Chunga iscunpica Petaiaspajmi urmarca. Ishqui chungapica Hezequielpajmi urmarca.

17Ishqui chunga shujpica Jaquinpajmi urmarca. Ishqui chunga ishquipica Gamulpajmi urmarca.

18Ishqui chunga quimsapica Delaiapajmi urmarca. Ishqui chunga chuscupica Maaziaspajmi urmarca.

19Mandaj Diospajta huashan huashan rurashpa catichunca chaicunatami churarca. Mandaj Diospaj huasiman yaicushpa ruranapajca paicunapaj ñaupa yaya Aaronta israelcunata Mandaj Dios mandashca shinallatajmi rurarcacuna.

20Levipaj huahua huahuapurallataj Diospajta ruranata manaraj japijcunaca caicunami: Amrampaj huahua huahuapuramantaca Subael. Subaelpaj huahua huahuapuramantaca Jehediasmi carca.

21Rehabiaspaj huahua huahuapuramantaca Isías. Paica mandajmi carca.

22Izharpaj huahua huahuapuramantaca Selomot. Selomotpaj huahua huahuapuramantaca Jahatmi carca.

23Hebronpaj huahua huahuacunaca: Jerías, paipaj q'uipaca Amarías. Chaipaj q'uipaca Jahaziel. Chaipaj q'uipaca Jecamanmi carca.

24Uzielpaj huahua huahuapuramantaca Micaía. Micaiapaj huahua huahuapuramantaca Samir,

25Micaiapaj huauquipaj huahua huahuapuramantaca Isías. Isiaspaj churi Zacariaspishmi carca.

26Meraripaj huahua huahuacunaca: Mahli, Musi shuticunami carca. Jaaziaspaj churi Beno runapishmi carca.

27Meraripaj huahua huahuapuramanta Jaaziaspaj churicunaca: Beno, Soham, Zacur, Ibri shuticunami carca.

28Mahlipaj churica: Eleazarmi carca. Paica huahuacunataca mana charircachu.

29Cispaj churica Jerameelmi carca.

30Musipaj churicunaca: Mahli, Edar, Jerimot shuticunami carca. Paicunami paicunapaj ñaupa yayacunamanta mirarimushca levitacuna carca.

31Paicunapish jatun mandaj Davidpaj, Sadoc curapaj, Ahimelec curapaj, ñaupa yayacunamanta mirarishca quiquinpuralla caj curacunata mandajcunapaj, levitacunapaj ñaupajpimi Aaronpaj huahua huahuapura levitacuna shinallataj sorteashpa paicunapaj yayacunata mandajmanta callarishpaca, q'uipa huauquicunacama sorteashpa Diospajta ruranapi yaicurcacuna.