EZEQUIEL 8 - Quichua Chimborazo Bible

Jerusalenpi millaita rurashcata muscuipi shina ricuchishcamanta

1Sujta huata, sujta quillapaj pichca punllapimi cashna tucurca. Ñucaca ñuca huasipimi tiyacurcani. Judá llajtamanta cunaj yuyajcunapish ñuca c'uchupimi tiyacurcacuna. Chaipi tiyacujpimi, Mandaj Jatun Diosca paipaj maquita ñuca jahuapi churarca.

2Chaimantaca ñapish runaman rijchajtami ricurcani. Chai runaca cinturamanta urimanca ninahuanmi carca, cinturamanta huichimanca broncetajllami achij nicurca.

3Chai runaman rijchajca maquita chutashpami, ñucataca uma ajchamanta japirca. Chaimantami Dios cushca muscuipica, Diospaj Espirituca jahuata alzashpa ñucataca Jerusalenman pusharca. Chaiman pushashpaca janaj ladoman caj ucu punguman yaicunllapimi shayachirca. Chaipica Mandaj Dios mana ricunachishca rurashcalla diosmi tiyacushca carca.

4Shinallataj israelcunapaj Taita Dios sumaj cashcami urcupi cajpi, muscuipi ricurishca shina ricurirca.

5Chaimantami ñucataca: “Huañujlla aichayuj runalla, cunanca janaj ladota huichilla ricui” nirca.

Shina nijpimi ñucaca, janaj ladota huichilla ricurcani. Chaipica altarman yaicuna pungu c'uchullapimi, Mandaj Dios mana ricunachishca rurashcalla diosca tiyacushca carca.

6Ñucataca cashnapishmi nirca: “Huañujlla aichayuj runa, ñucapajlla huasimanta ñucata anchuchingapajmi, israelcunaca yallitaj millaita ruracuncuna. Chaitaca ¿manachu ricungui imatagari? Cunanca tigrarishpa ricuyari, caitapish yalli millaita rurashcatamari ricungui” nircami.

7Chashna nishpaca ñucataca, huasi canlla yaicunllamanmi pusharca. Ña chaipi cashpaca, patapimi shuj jutcuta ricurcani.

8Chaimantaca ñucataca: “Huañujlla aichayuj runalla, chai patataca ashtahuan jutcui” nijpimi, ñucaca patataca ashtahuan jutcurcani. Chai jutcuca pungumi tucurca.

9Chai q'uipaca: “Chai punguta yaicushpa, chaipi causajcuna yallitaj millaita ruracujta ricugri” nircami.

10Shina nijpimi, chaiman yaicushpa ricugrircani. Chaipica chai pata quinri muyundijtami pambata llucashpa purij animalcunatajllata, mapa animalcunatajllata, israelcunapaj tucui dioscunatajllata pintashca carca.

11Chaicunapaj ñaupajpica, israelcunapuramanta canchis chunga cunaj yuyajcunami carca. Chai cunaj yuyajcunapaj chaupipica, Safanpaj churi Jaazaniaspishmi carca. Paicunaca tucuicunami quiquin maquipi inciensota rupachinata charicurcacuna. Chaimantaca achca incienso cushnimi jahuata huichiyarca.

12Chaimantaca ñucataca: “Huañujlla aichayuj runa, israelcunata cunaj yuyajcuna manchanana amsapi, rurashcalla dioscunata pintashca quiquin huasi ucucunapi ¿imata ruracujta ricushcanguichu? Paicunaca: Mandaj Diosca ñucanchijtaca cungarishcami, mana ricucunchu nincunami” nircami.

13Chai q'uipaca cashnapishmi nirca: “Can muyurishpa ricushpaca, caitapish yalli millaita ruracujtami ricungui” nircami.

14Chaimantaca ñucataca Mandaj Diospaj huasiman yaicuna janaj lado pungumanmi pushashpa rirca. Chaipica huarmicunami Tamuz shuti diosta huacashpa mañacushca carca.

15Chai q'uipaca ñucataca: “Huañujlla aichayuj runa, ¿manachu caitaca ricungui imatagari? Can tigrashpaca, caitapish yalli millaita ruracujcunatamari ricungui” nircami.

16Chaimantaca ñucataca Mandaj Diospaj huasi canllamanmi pusharca. Mandaj Diospaj huasiman yaicuna punguhuan altarhuan chaupipica, ishqui chunga pichca runacunatami ricurcani. Paicunaca Mandaj Diospaj huasi ladoman huashata ricuchishpami, inti llujshin ladota ricushpa shayacurcacuna. Inti llujshin ladollamantajmi cungurishpa intita adorarcacuna.

17Chaimantaca ñucataca: “Huañujlla aichayuj runa, ¿manachu caitaca ricungui imatagari? ¿Judá llajtapi causajcuna yallitaj millaita rurashcaca, jahuallachu cashca imatagari? Paicunaca cai llajtapica millai ruranacunahuan jundachishca q'uipamari, ñucata ashtahuan p'iñachingapaj ñucapajman tigramuncuna. Paicunaca singapimi ramacunata churancuna.

18Ñucapish jatunta p'iñarishpatajmi paicunataca llaquichisha, manataj perdonashachu, manataj llaquishachu. Paicunaca ñuca uyachun nishpaca caparingacunami. Chashna cajpipish, manataj uyashachu” nircami.