1Sionta c'uyashcamantaca, manataj upallashachu.
Jerusalenta c'uyashcamantaca, manataj samarishachu.
Cashcata rurana achijyachij shina llujshingacama, paita quishpichina, nina sindi shina llujshingacama manataj samarishachu.
2Chaipimi shujtaj llajtacunaca cambaj cashcata ruranata ricungacuna.
Tucui jatun mandajcunapish cambaj jatun caitami ricungacuna.
Mushuj shutita churashcami cangui.
Chaitaca Mandaj Diosmi paipaj shimihuantaj chashna shutichinga.
3Mandaj Diospaj maquipica, achij nicuj coronata charicushca shinami cangui.
Cambaj Diospaj maquipica, jatun mandaj churarina diadema shinami ricuringui.
4Chaipica cantaca: “Shitashcamari” nijcunaca ña mana tiyangachu.
Cambaj llajtatapish ña manataj: “Shitashca llajtami” ningacunachu.
Ashtahuanpish canca: “Mandaj Diospaj huarmimi” nishcami cangui.
Cambaj llajtatapish: “Cusayujmi” ningacunami.
Mandaj Diospaj c'uyai canhuan cajpi, cambaj llajtaca cusayuj cajpimi chashna ningacuna.
5C'arita manaraj rijsij huarmihuan shuj moso cazarashpa cushicuj shinami cambaj huahuacunapish canpi cushicungacuna.
Ima shinami cusaca paipaj huarmipi cushicun chai shinallatajmi cambaj Taita Diospish canhuan cushicunga.
6Jerusalén pueblolla, cambaj muyundij pircapica, ñami cuidajcunata churani.
Paicunaca tutapish, punllapish manataj upalla cangachu.
¡Mandaj Diosta yuyarijcuna, ama shaicurichijchu,
7ama upallaichijchu.
Jerusalenta cutin shayachingacama, cai pachapi cutin Mandaj Diosta alabanata churangacama ama upallaichijchu!
8Mandaj Diosca paipaj alli maquihuan, tucuita rurai tucuj rigrahuanmi cashna nin: “Cambaj trigotaca canta p'iñajcuna micuchunca ña manataj cushachu.
Can trabajashca uva vinomantaca mana israelcunaca ña manataj ubyangacunachu.
9Ashtahuanpish trigotapish cozichajcunallataj micushpami, Mandaj Diosta alabanguichij.
Uvatapish tandajcunallataj, capijcunallatajmi ñuca huasi canllapi ubyanguichij” nircami.
10¡Pungucunata pasashpa pasashpa richigari.
Ñuca agllashcacunapaj ñanta allichichigari.
Rumilla ñancunataca sumaj llambujllata ruraichigari.
Rumicunata anchuchichigari.
Llajtacuna ricuchun banderata alzaichigari!
11Mandaj Diosca tucui cai pachapi causajcuna uyajtami cashna caparirca: “Sionpaj ushushi: Canta Quishpichijca ñamari shamun nichigari.
Canta quishpichijca chaitami ña shamun.
Imalla rurashcamanta cunapish paihuanmi shamucun.
Can imallata rurashcamanta cunapish paita ñaupashcami shamucun nichigari” nircami.
12Paicunaca: “Mandaj Dios quishpichishca, pai agllashca jucha illajcunami” nishcami cangacuna.
Cantaca: “Mandaj Dios munashca llajtami, ña mana shitashca llajtachu” ningacunami.
Who We AreWhat We EelieveWhat We Do
2025 by iamachristian.org,Inc All rights reserved.
