NÚMEROS 6 - Quichua Chimborazo Bible

Nazareo tucujcunata mandashcami

1Mandaj Dios Moisesta mandashpaca cashnami nirca:

2“Israelcunataca cashna ni: C'ari cashpapish huarmi cashpapish, nazareo tucushpa Mandaj Diospajta rurangapaj ch'icanyarishpaca,

3vinota, sidrata ama ubyachun. Vinomanta rurashca vinagretapish, sidramanta rurashca vinagretapish, uvata capishcatapish ama ubyachun. Cunanlla pallashca uvatapish, chaquichishca uvatapish ama micuchun.

4Nazareo tucushpaca, chai punllacuna tucuringacama uvamanta imata rurashcacunatapish, muyullatapish, mirga carallatapish ama micuchun.

5Nazareo tucushpaca Mandaj Diospajta rurangapaj ch'icanyarishca punllacuna pajtangacama paipaj uma ajchata ama rutuchichun. Mandaj Diospajlla ch'icanyarishca cashcamanta uma ajcha huiñachun saquichunlla.

6Mandaj Diospajta rurangapaj ch'icanyarishca punllacunapica, huañushcapajmanca ama c'uchuyachun.

7Diospajta rurangapaj ch'icanyarishcataca paipaj ajchami ricuchinga. Chaita ama mapayachingapajca, quiquin yaya cajpipish, mama cajpipish, huauqui cajpipish, pani cajpipish huañushcamanca ama c'uchuyachun.

8Mandaj Diospajta rurangapaj ch'icanyarishpa nazareo tucushca punllacuna pajtangacama Mandaj Diospajlla cachun.

9Cungaimanta maijanpish paipaj c'uchupi huañujpica, Diospajta rurangapaj ch'icanyarishpa nazareo tucushcapaj uma ajchaca mapayangami. Chashna tucushpaca, canchis punllacama maillarishpa, canchis punllapica ajchata rutuchichun.

10Pusaj punllapica ishqui urpita cashpa, mana cashpaca ishqui palomata cashpa Dioshuan tupanacuna carpa huasi punguman curapajman apamuchun.

11Chaicunataca curami shujtaca juchamanta Diosman cunga, caishujtaca Diosman cushpa tucui rupachinga. Chashna rurashpami, huañushcapi tuparishpa mapayashcataca chuyayachinga. Chai punllamantami paipaj ajchataca Diospajlla cachun cutin huiñachinga.

12Nazareo tucushpa Diospajta rurana punllacunataca cutinllataj callarichun. Mana yuyashcapi juchayuj tucushcamanta shuj huatayuj c'ari ovejata apamushpa juchamanta Mandaj Diosman cuchun. Ñaupaman Diospajta ruracushca punllacunapi mapayashcamantaca, chai punllacunataca ama yupachun.

13Nazareo tucushpa Diospajlla ch'icanyarishca punllacunata pajtachishpaca, nazareoca cai mandashcacunata rurachun. Dioshuan tupanacuna carpa huasi punguman shamushpa,

14Mandaj Diosman cushpa tucui rupachingapajca ima mana tucushca shuj huatayuj c'ari ovejata cuchun. Juchamanta cunapajpish ima mana tucushca shuj huatayuj huarmi ovejata cuchun. Sumaj causaimanta cunapajpish ima mana tucushca shuj carnerota cuchun.

15Chai jahuapish, tucuimanta yalli alli cutata aceitehuan chapushpa levadura illajlla tandacunata shuj canastapi apamuchun. Levadura illajllata rurashpa aceitehuan jahuata llihuishca tortillacunatapish apamuchun. Chaicunahuanca Diosman cuna granocunatapish, Diosman cushpa tallina vinotapish apamuchun.

16Tucui chaicunataca curami juchamanta Diosman cunatapish, Diosman cushpa tucui rupachinatapish Mandaj Diosman cunga.

17Mandaj Dioshuan alli cangapaj cushca carnerotaca, levadura illajlla canasta tandacunahuan Mandaj Diosman cuchun. Granocunatapish, tallina vinotapish chashnallataj Mandaj Diosman cuchun.

18Nazareo tucushpa pajtachijca Diospajta rurangapaj ch'icanyarishcata ricuchij ajchataca Dioshuan tupanacuna carpa huasi pungupi rutuchichun. Diospajlla cashca ajchata rutuchishcata japishpaca, sumaj causaimanta Diosman cushcata rupachicun ninapi rupachichun.

19Chai q'uipaca carneropaj changa aicha yanushcata, canastamanta levadura illajlla shuj tandata, levadura illajlla shuj tortillata cura japishpa nazareopaj maqui jahuapi churachun. Diospajlla huiñachishca ajchata rutuchishca q'uipa chashna rurachun.

20Chaicunataca Mandaj Diospaj ñaupajpi huichi ricuchishpa cuyuchishpa Diosman cura cuchun. Tucui chaicunaca Diospajlla ch'icanchishca cashcamanta curapaj saquirichun. Mandaj Diospaj ñaupajpi huichi ricuchishpa cushca pecho aichapish, changa aichapish curapajllataj saquirichun. Chai q'uipaca nazareoca vinota ubyachunlla.

21Nazareo tucushpa Diospajlla ch'icanyarishpa Diospajllata rurashpa pajtachina tucushcamanta pajtachijca, cai mandashcapi tucui imalla nicushcata rurachun. Chai jahuapish imata ashtahuan Diosman cui tucushpaca cuchunlla. Chaitaca nazareo tucushpa Diospajllata rurangapaj ch'icanyarishcacunata mandashcapi nicushca shinataj pajtachichun nishpa mandangui” nircami.

Curacuna israelcunata alli cashca cachun nishpaca ima shinalla ninami

22Mandaj Dios Moisesta mandashpaca cashnami nirca:

23“Aarontapish, paipaj churicunatapish cashna mandai: Israelcunata alli cashca cachun nicushpaca cashna ningui ni:

24Mandaj Diosca cancunata alli cashca cachun nichun.

Mandaj Diosca cancunata huaquichichun.

25Mandaj Dios cancunataca paipaj ñahuihuan lamyachichun.

Mandaj Dios cancunataca llaquichun.

26Mandaj Dios cancunata c'uyaj ñahuihuan ricuchun, sumaj causaita cancunapi churachun ningui nircami.

27Israelcunata curacuna ñuca shutipi chashna nijpica, ñucapish paicunataca alli cashca cachun nishami” nircami.