EZEQUIEL 45 - Quichua Chimborazo Bible

1Cancuna japina allpata suerteta rurashpa chaupicushpaca, mirga allpataca ñucapaj cachun ch'icanyachinguichij. Chai allpaca largomanca, 78 kilómetro, 750 metro cachun. Anchomanca, 31 kilómetro, 500 metros cachun. Chai allpataca ñucapajlla ch'icanchinguichij, chaica ñucapajllami canga.

2Ñucapajlla ch'icanchishca chai allpamantami ñucapajlla huasita rurangapajca, ch'icanchina canguichij. Ñucapajlla huasita rurana allpaca, largomanpish anchomanpish, 15 kilómetro, 750 metros cachun. Chai allpa muyundijtaca ishqui chunga sujta metro, ishqui chunga pichca centímetro anchota michina allpacuna cachun.

3Largomanca, 78 kilómetro, 750 metro, anchomanca, 31 kilómetro, 500 metrota charij chai allpapimi ñucapajlla huasipish, ñucapajlla ch'icanchishca ucupish canga.

4Ñucapajlla ch'icanchishca cai allpaca curacunapajmi canga. Paicunami ñucapajlla huasipica, imatapish rurashpa causangacuna. Paicunami ñucata servingapaj c'uchuyangacuna. Chaipimi paicuna causana huasicuna canga. Chai allpaca ñucapajlla huasita rurangapaj ch'icanchishcami canga.

5Shinallataj ñuca huasipi imatapish rurashpa causaj levita curacunapajpish allpataca ch'icanyachinguichij. Chai allpapish largomanca, 78 kilómetro, 750 metro, anchomanca, 31 kilómetro, 500 metrota charij cachun. Chai allpapica, ishqui chunga huasicunata rurachun.

6Israelcuna causana pueblota rurangapajca, ñucapajlla huasita rurangapaj ch'icanchishca ñaupajpi largomanca, 78 kilómetro, 750 metro, anchomanca, 15 kilómetro, 750 metrota medinguichij.

7Shinallataj mirga allpataca, mandajpajlla ch'icanyachinguichij. Chai allpaca, ñucapajlla huasita rurana allpa c'uchullapi cachun. Shinallataj chai allpaca, pueblota ruranapaj ch'icanchishca allpa ñaupajllapi cachun. Chai allpaca, largomanca inti huashicun ladomantaca, inti llujshin ladocama ñuca huasipaj ch'icanchishcahuan igual cachun.

8Chai allpaca, israelcunata mandajpaj allpami canga. Chashna cajpimi, ñuca churashca mandajcunaca ñuca agllashcacunataca, ña mana ashtahuan llaquichishpa causangacuna. Ashtahuanpish israelcunamanca mashna aillucunapura cajpipish, chai tucui aillucunapaj pajtatami allpacunataca cungacuna.

9Mandaj Jatun Dios ñucatajmi cashnapish nini: Israel llajtata mandajcunalla, ña chailla millaitaca ruraichigari. Huañuchinatapish, shuhuanatapish saquichigari. Ashtahuanpish imatapish allita, cashcata rurashpa causaichigari, ñuca agllashcacunata mandashpa llaquichishpa causanataca saquichigari. Mandaj Jatun Diostajmi chashna nini.

10Tucuicunallatajmi alli pizaj balanzatapish, allita medina efatapish, batotapish charina canguichij.

11Efa nishca medidaca, bato nishca medida shinallatajmi apanga. Bato nishca medinaca, shuj homerta chungapi chaupishca shuj mirgami canga. Shinallataj efa nishca medinapish, shuj homerta chungapi chaupishca shuj mirgami canga. Chai medinacunaca, homer nishca medina shinallatajmi apanga.

12Shinallataj shuj sicloca, ishqui chunga geratami pizanga. Sujta chunga sicloca, shuj minatami pizanga.

13Ñucaman imalla cuna cashcacunataca, cashnami medishpa cuna canguichij: Shuj efata sujta mirgapi chaupishca shuj mirgatami, cada homer trigohuan cuna canguichij. Shuj efata sujtapi chaupishpa shuj mirgatami cada homer cebadahuan cuna canguichij.

14Shinallataj bato nishca medinaca, shuj coro nishca medinata chungapi chaupishca shuj mirgami. Chai shuj mirga bato aceiteta ñucaman cuchunmi mandani. Chunga bato nishcami, shuj homerca tucunga.

15Shinallataj juchamanta cungapaj, alli cangapaj Diosman cushpa tucui rupachingapaj, Diosman cushpa huañuchingapajca israelcunapaj huirayashca malta huarmi ovejatami cuna canguichij. Mandaj Dios ñucatajmi chashna nini.

16Cai llajtapi causajcunaca tucuicunami, ñucaman imalla cuna cashcataca Israel llajtata mandajman cuna canguichij.

17Chai mandajmi jatun fiesta punllacunapipish, mushuj quillacunapipish, samana punllacunapipish, tucui israelcuna fiestata rurana punllacunapipish, ñucaman cushpa tucuita rupachichun ñucaman animalta cushpa huañuchichun, tallina vinotapish tallichun cunga. Paimi israelcunapaj juchata perdonachun, ñucaman imalla cuna cashcatapish cunga. Paimi ñucaman cushpa tucuita rupachinga, ñucaman animalta cushpami huañuchinga, ñucahuan alli cangapajpishmi cunga.

Pascua micuita ruranamanta

18Mandaj Jatun Diostajmi cashna nini: Huata callari quillapaj punta punllapica, ñucapajlla huasita ima mapa illajta saquingapajca, vacacunamanta ima mana tucushca malta c'ari huagrata ñucaman cushpa huañuchingui.

19Curami juchamanta cushca animalpaj yahuarta japishpa ñuca huasi patacunapipish, altar chaqui chuscundij esquinacunapipish, huasi canllamanta yaicuna pungu patacunapipish llihuinga.

20Maijanpish pandarishpa, mana cashpaca pi umajpi juchallingachari. Chashna rurashcamanta ñuca huasi ima mapa illaj saquirichun, chai punta quillapaj canchis punllapipish chashnallataj rurangui.

21Huata callari quillapaj chunga chuscu punllapica Pascua micuitapish, canchis punlla fiestatapish ruranguichij. Chaipica levadura illajlla tandata micunguichij.

22Chai punllallataj mandajca, paipaj juchamantapish, cai llajtapi causaj tucuicunapaj juchamantapish shuj malta c'ari huagrata ñucaman cushpa huañuchichun.

23Shinallataj canchis punlla jatun fiestapica, punllanta ima mana tucushca canchis malta c'ari huagracunatapish, canchis carnerocunatapish, Mandaj Dios ñucaman cushpa tucui rupachichun. Shinallataj cancunapaj juchamantapish, canchis punllacama punllanta shuj c'ari chivota huañuchichun.

24Cada malta c'ari huagrata shuj efa granohuan cuchun. Shinallataj cada carnerotapish, shuj efa granohuan cuchun. Cada efamantaca, shuj hin nishca medida aceiteta cuchun.

25Mandajca canchis quillapaj chunga pichca punllapi fiestata rurashpapish, canchis punllapi rurashca shinallataj rurachun. Chai fiesta punllapica, cancunapaj juchamanta ñucaman animaltapish, ñucaman cushpa tucuita rupachinatapish, convidanacunatapish, aceitetapish chai shinallataj rurachun.