ZACARÍAS 11 - Quichua Chimborazo Bible

1Líbano urculla, cedro yuracunata ninahuan rupachishpa tucuchingapaj cambaj pungucunata pascayari.

2Ciprés yuralla, caparirishpa huacayari, ñamari cedro yuraca urman. Shujtaj sumaj yuracunapish ñamari tucui chingarin. Basán llajtapi tiyaj encina yuracunapish caparirishpa huacaichigari, ñamari tucui yuracuna chingarin.

3Michijcunapish q'uihuacuna tucui rupashcamantamari, caparirishpa huacacuncuna. Shinallataj leoncunapish Jordán sumaj jatun yacu chaquirishcamantami, caparirishpa huacacuncuna.

Mana alli michijcunamanta

4Ñucataca Mandaj Taita Diosca cashnami nirca: “Huañuchina ovejacunata alli michigri.

5Randijcuna chai ovejacunata huañuchishpaca, mana allita ruracushcataca mana yuyancunachu. Chai ovejata c'atuj runapish: Mandaj Diosca alli nishca cachun. Ñami achca cullquiyuj cani ninmi. Chai ovejamantaca michijcunallapish manamari llaquincunachu.

6Chashnallataj ñucapish cai pachapi causajcunataca mana llaquishachu. Ashtahuanpish ñucami paicunataca p'iñajcunapaj maquipi, jatun mandajpaj maquipi cushpa cachasha. Paicunata p'iñajcunami cai pachataca, llaquinayajta saquingacuna. Chashna llaquichicujta ricushpapish, manataj chai p'iñajcunapaj maquimantaca quishpichishachu” nircami.

7Shina nijpimi, huañuchina ovejacunataca michircani. Paicunaca canlla ovejitacuna shinami carcacuna. Chai canlla ovejacunata michinapajca, ishqui caspitami japircani. Chai caspicunataca, shujtaca “Sumaj” nishca shutitami shutichircani. Caishujtaca, “Tandachij” nishca shutitami shutichircani.

8Chaimantaca quillallapimi quimsa michijcunata chingachircani. Paicunallatajmi ñucataca p'iñachircacuna. Chaimantami paicunahuanpish yallitaj p'iñarircani.

9Chaimantaca ovejacunataca cashnami nircani: “Cancunataca ña mana michishachu. Maijan huañujca huañungatajchari. Maijan chingarijca chingaringatajchari. Maijan saquirijcunaca, paicunapurallataj micunacungatajchari” nircanimi.

10Chashna nishca q'uipami, “Sumaj” shuti caspita japishpa p'aquircani. Tucui llajtacunapi causajcunahuan ñuca ari ninacushcata p'aquishcata ricuchingapajmi chai caspitaca p'aquircani.

11Chai punllamantami ari ninacushcata pajtachinaca chingarirca. Chaimantami ñucata ricuracuj canlla ovejitacunaca Mandaj Diospaj shimitaj cashcata yachaj chayarcacuna.

12Chai michijcunataca: “Cancunapaj yuyaipi alli cajpica pagahuaichij, mana cashpaca saquipaichijlla” nircanimi. Shina nijpimi ñuca michishcamantaca, quimsa chunga cullquita pizashpa pagarcacuna.

13Chaimantami Mandaj Diosca ñucataca cashna nirca: “Chai cullquitaca ima charinacunata huaquichinapi huaquichilla. ¡Chai cullquipimi ñucataca c'atuncuna!” nircami. Shina nijpimi chai quimsa chunga cullquita japishpaca, Mandaj Diospaj huasipi charinacunata huaquichinapi huaquichircani.

14Chai q'uipami, “Tandachij” shuti caspitapish p'aquircani. Chaica israelcunahuan, Judá llajtapi causajcunahuan tandalla apanacushpa causana tucurishcatami ricuchirca.

15Chaimanta Mandaj Diosca ñucataca cashnapishmi nirca: “Cunanca ch'ahuanyashca michijpaj charinacunata japingui.

16Riqui, cai llajtapimi chashna mana alli michijta churagrini. Chai michijca chingarishcacunatapish mana ricugringachu, uchillacunatapish mana mashcagringachu. Chaqui p'aquirishcatapish mana jambingachu, shaicushcacunatapish mana rigra jahuashpa apangachu. Ashtahuanpish huirayashca oveja aichataca pairajmi micunga. Sillucunatapish p'aquingami.

17Canlla ovejata chingachij michijlla ¡aij imachari tucunga! Paipaj rigratapish, alli lado ñahuipish espada chugrichishca cachun. Paipaj rigraca tucuimi chaquiringa, alli lado ñahui lulunpish imata mana ricujmi saquiringa” nircami.