HEBREOS 9 - Quichua Chimborazo Bible

1Cunanca caita yuyarishun. Dios cusha nishpa ñaupaman ari nishcapica, Diosta ima shina adoranata mandashcami tiyarca. Diospajlla huasipish cai pachapimi carca.

2Diospaj carpa huasica cashnami carca: Diospajlla caj punta ucupica candelero, Diosman cushca tandacunata meza jahuapi churashcapishmi carca.

3Chai ucullapitaj linsohuan jarcachishca caishuj ucuca Diospajlla ashtahuan ch'icanchishca ucu nishcami carca.

4Chaipica incensiota rupachina curi altarpish, ari nishcata ricuchij tucuita curihuan llihuishca arcapishmi tiyarca. Chai arca ucupica, maná tandata huaquichina curi manga, Aaronpaj verdijlla tucuj vara, ari nishcata quillcashca tablajlla rumicunapishmi carca.

5Chai arca jahuapica, Dios sumaj cashcata ricuchij querubincunami juchamanta yahuarta tsirapanata pacashpa shayacurcacuna. Caicunataca cunanca, ña mana ashtahuan callarishpa parlai tucunichu.

6Diospaj carpa huasi ucuca chashna allichishca cajpimi punta ucuman curacunaca punllanta yaicushpa imalla rurana cashcataca Diospaj rurancuna.

7Chaiman punllanta yaicucushpapish Diospajlla ashtahuan ch'icanchishca ucumanca curacunata mandaj curallami, huatapi shuj cutinlla yaicun. Chaipica paipaj juchacunamanta, mana yachashcamanta shujtajcuna rurashca juchacunamantapish animalcunapaj yahuarta Diosman cungapajmi yaicun.

8Chashna cajpimi Diospaj carpa huasi punta ucu tiyacujpirajca, Diospajlla ashtahuan ch'icanchishca caishuj ucuman yaicuna ñanca manaraj tiyashcata Jucha illaj Espirituca yachachin.

9Chaicunaca cunan punllacuna ima shina cana cashcata ricuchinapajllami cashca. Chaimanta ofrendacunata, sacrificiocunata cushpa Diosta adorashcacunaca ima juchachina illaj, alli yuyaiyujtaca mana rurai tucunchu.

10Chaicunaca imallata micunata, imallata ubyanata, chuyayangapaj ch'ican ch'ican ruranacunata, jahua aichapi imalla ruranatapishmi yachachin. Chaicunaca Dios mushujta callarichi punllacamallami carca.

11Cunanca Cristoca ñamari shamurca. Paica curacunata mandaj cura cashcamanta cuna cashca allicunatami huiñaipaj cungapaj apamurca. Diospajta pai ruracun ucuca ñaupata yalli sumaj Diospajlla ucumari. Chai ucuca mana runacuna rurashcachu, mana cai pachapichu.

12Cristoca Diospajlla ashtahuan ch'icanchishca ucumanca mana c'ari chivocunapaj, c'ari bizicunapaj yahuarhuanchu yaicurca. Ashtahuanpish paipaj quiquin yahuarta cushpa huiñaipaj quishpichingapajmi, shuj cutinlla chai ucumanca yaicurca.

13Malta torocunapaj, c'ari chivocunapaj yahuarta huarmi bizita altarpi rupachishca ushpata millaita rurajcunapaj jahuapi tsirapajpica, mapamantapish jahua aichataca allichishpa chuyayachi tucunmi.

14Chashna cajpica, Cristopaj yahuarcarin ashtahuan rurai tucujmi. Paica huiñaipaj Espirituhuan cashpami, ima mapa illajlla paillataj Diosman curirca. Cancuna causaj Diospajta ruraj cachunmi, huañunaman apaj millaita rurana yuyaicunataca paipaj yahuarhuan cancunamantaca p'ichan.

15Chaimantami Cristoca cusha nishpa mushujta ari nishcapi Dioshuan runacunahuan rimaj. Dios ñaupaman cusha nishpa ari ninacushcata p'aquijcunata perdonangapajmi huañurca. Dios cayashcacuna huiñaipaj pai cusha nishcata chasquijcuna cachunpishmi huañurca.

16Imata cusha nishpa quillcachishca tiyajpica, chai cusha nishpa quillcachij huañushcata ricuchijmi tiyana can.

17Chai cusha nishpa quillcachishcaca, cusha nij huañujpimi pajtan. Cusha nij causacujpirajca yangallami.

18Chaimantami cushami nishpa ñaupaman ari ninacushcapish yahuarta jichashcahuan callarishca.

19Moisesca Mandashcapi tucui imalla nishcacunata tucuicunaman huillashpaca, c'ari bizicunapaj, c'ari chivocunapaj yahuarta japishpami, yacuhuan chagrushpa puca millma hisopota satishpa Mandashcata quillcashca librotapish, tucui chaipi cajcunapaj jahuatapish,

20tsirapacushpaca: “Cai yahuarca cushami nishpa ari ninacushcata ricuchij Dios mandashcami” nij cashca.

21Chaita rurashca q'uipaca Diospaj carpa huasitapish, Diospajta rurana tucui vasocunatapishmi yahuarhuan tsirapashca.

22Mandashcapi nishca shinaca, yahuarhuanca maijan maijanllami mana chuyayan. Shina cajpipish yahuarta mana jichajpica, perdonca mana tiyanchu.

Cristo jichashca yahuarmi juchataca anchuchin

23Chashna cajpica jahua pachapi tiyajcunata ricuchijcunataca, Diosman sacrificiota cushca yahuarta tsirapajpimi ima mapa illajlla tucun. Jahua pachamanta cajcunacarin chai sacrificiota yallitamari ruracun.

24Shina cajpica Cristoca, jahua pachapi tiyaj Diospaj huasipi ima shina cajta ricuchij cai pachapi runacuna rurashca huasillamanca mana yaicurcachu. Ashtahuanpish cunanca ñucanchijmanta Diospaj ñaupajpi ricuringapajmi, paica jahua pachamantaj yaicurca.

25Curacunata jatun pushajca, Diospajlla ashtahuan ch'icanchishca Ucumanca huatantami animalcunapaj yahuarhuan yaicun. Cristoca mana cutin cutin Diosmanca curinchu.

26Cutin cutin llaquita apacunalla cashca cajpica, Cristoca cai pacha callarimantami llaquita apacunmanlla carca. Ashtahuanpish Dios cusha nishca punlla pajtajpimi, jucha chaupimanta anchuchingapaj shuj cutinlla huiñaipaj paillataj curishpa huañurca.

27Shinallatajmi gentecunatapish shuj cutinlla huañuchun churashca. Chai q'uipaca paicuna imalla rurashcata Dios ricuchina punllami canga.

28Cristoca achcacunapaj juchacunata anchuchingapajmi, shuj cutinlla huañurca. Q'uipata cutin shamushpaca, mana juchata anchuchingapajchu shamunga. Ashtahuanpish paita shuyajcunata quishpichingapajmi shamunga.