ISAÍAS 47 - Quichua Chimborazo Bible

Babilonia pueblo imalla tucuna cashcami

1Babiloniapaj ushushi, c'arihuan manaraj chayarinacushca huarmi uriyashpa ñutu allpapi tiyari.

Caldeocunapaj ushushi, tiyana illajllami cangui, pambapi tiyari.

Cantaca ña mana sumaj atirida huarmimi cangui ningacunachu.

2Molinopi granota cutailla.

Ch'ungurishcata anchuchi.

Anacota huichichishpa llucha changalla, yacuta ch'imbai.

3Cambaj pinganayaj aicha lluchulla tucujpi, shujtajcuna ricujpi pingaimi tucungui.

Cancuna ima shinami millaita rurarcanguichij chai shinallatajmi rurasha.

Chaimantaca pi mana quishpiri tucungachu ninmi.

4Ñucanchijta Quishpichijmari chashna nin.

Paipaj shutica tucuita Mandaj Dios shutimi.

Israelcunapaj jucha illaj Diosmi.

5“Caldeocunapaj ushushi, upajlla tiyarishpa amsaman yaicui.

Cantaca: Llajtacunata mandaj huarmi ña mana ningacunachu”.

6Ñuca agllashcacunahuanmi p'iñarircani.

Paicunatami yangata rurarcani.

Chaimi cambaj maquipi churarcani.

Canca manataj llaquishpami llaquichircangui.

Yuyajcunamanpish cambaj yallitaj llashaj yugotami apachircangui.

7Canca: Huiñaitami mandaj huarmi casha nircanguimi.

Cashna tucuna cashcataca mana yuyarircanguichu.

Can ima shina tucurinataca mana yuyarircanguichu.

8Huainayana yuyaihuan allichirishca huarmi uyai.

Canca ima tucuna cashcata mana yuyashpami tiyacungui.

Cambaj shungupica cashnami niricungui:

Ñucaca ñucami cani, pi shujtajca mana tiyanchu.

Viudapish, huahua illajllapish manataj saquirishachu niricunguimi.

9Viuda canapish, huahua illaj canapish ishquindijmi chai punllaca cambaj jahuaman ñapish shamunga.

Chai llaquicuna ama japichun brujocunahuan pajtachiricujpipish chai llaquica tucui fuerzahuanmi cambaj jahuaman shamunga.

10Canca millaita rurajtaca: Pi mana ricucunchu yuyashpami chai yuyailla millaita rurarcangui.

Yachaj tucushca cashcahuan, alli yuyaiyuj tucushca cashcahuanca canllatajmi umaringui. Chaimantami: Ñucallami mandaj cani, pi shujtajca mana tiyanchu niringui.

11Maimanta shamushcata mana yachashca llaquimi cambaj jahuamanca shamunga.

Cambaj jahuamanca mana mitsari tucuipaj llaquimi shamunga.

Can mana yuyashca llaquimi cambaj jahuamanca ñapish shamunga.

12Cunanca brujocunahuan pajtachirinata caticuilla.

Canca huambramanta pachami chaihuan pajtachirishpa amañarishca cangui.

Chaicunahuanca jarcari tucunguipishchari, fuerzasapa tucunguipishchari.

13Chai cunashcacunahuanca ñami shaicushca cangui.

Jahua pachata chapashpa, luzerocunata ricushpa, quillacunata yupashpa q'uipa punllacuna cambaj ima shamunata huillajcunaca cunan canmanta shayarishpa mitsachunri.

14Riqui, paicunaca t'amo shinallami cangacuna.

Ninami rupachinga.

Lunyacuj ninamantaca paicunaca mana quishpiri tucungacunachu.

Nina brazusllapish mana saquiringachu.

Tiyarishpa cunungapajllapish, mana unillatapish rupangachu.

15Brujocunahuan can shaicuita trabajashca cambaj brujocunaca chashnami tucurcacuna.

Can huambramanta trabajashca brujocunaca chashnami cangacuna.

Paicunaca tucuicunami quiquin ñanta ringacuna.

Canta quishpichijca pi mana tiyangachu.