DEUTERONOMIO 19 - Quichua Chimborazo Bible

Miticuna pueblocuna maillapi cashcami(Nm 35.9-28; Jos 20.1-9)

1Mandaj Dios cancunapaj Taita Diosca cancuna japigricun llajtacunapi causajcunata tucuchishpami, paicunapaj llajtacunataca cancunaman cunga. Chai llajtacunata cancuna japishpa paicunapaj pueblocunata, paicunapaj huasicunata,

2cancunapaj cachun Mandaj Dios cancunapaj Taita Dios cancunaman cushca llajtapica quimsa pueblocunata ch'icanchinguichij.

3Mandaj Dios cancunapaj Taita Dios cancunapaj cachun cancunaman cushca llajtataca quimsapi chaupishpa, ñancunatapish allichinguichij. Huañuchijcuna chaipi miticugrichuncuna.

4Huañuchijcunaca cashna cashca cashpallami chaipica miticushpa causai tucungacuna: Ñaupamanca imamanta mana p'iñanacushca cashca cashpa, manapish huañuchina yuyaihuan huañuchijcunallami chaipica miticugringa.

5Cashna nishun. Maijanhuan sachapi yantanaman rishpa, yantata p'iticujpi hacha fierro cabomanta llujshishpa paihuan cajta chugrichijpi huañungachari. Chashna huañuchijllami chai pueblocunapi miticushpa paipaj causaita quishpichinga.

6Chai pueblocunaca ama yalli carupi cachun. Huañuchij runa manaraj miticujpi huañuchishcamanta p'iñarishpa paitapish huañuchisha nicuj ama yangamanta huañuchichun miticuna pueblocunaca ama yalli carupi cachun. Ñaupaman mana p'iñanacushca cashpa cungaimantalla huañuchishca canman.

7Chaimantami quimsa pueblocunata ch'icanchichun mandani.

8Mandaj Dios cancunapaj Taita Dios cancunapaj ñaupa yayacunaman cunimi nishca shinallatajmi chai llajtataca ashtahuan mirachinga.

9Mandaj Dios cambaj Taita Diosta c'uyangui, tucui causaipi paipaj ñanllapi puringui nishpa cunan ñuca quillcashpa cancunaman cushca mandashcata cancuna pajtachina yuyailla pajtachijpimi chashna mirachinga. Chaipica ñaupaman tiyaj pueblocuna jahuapi quimsa pueblocunahuan ch'icanchingui.

10Miticuna pueblopi miticushpami manapish huañuchina yuyaihuan huañuchijca, Mandaj Dios cancunapaj Taita Dios cancunaman cushca llajtapica paica mana huañuna cashcamantaca mana huañunga. Canpish, manapish huañuna caj huañujpica ña mana juchachishcachu cangui.

11Ashtahuanpish maijanca p'iñacushca cashca cashcamanta, huañuchina yuyaihuantaj puricushpataj chugrichishpa huañuchingachari. Chai runa miticuna maijan pueblopi miticugringachari. Miticushpa rijpica,

12Chaipica paitaca chai pueblopi causaj cunaj yuyajcuna chaimanta llujshichinaman cachashpa, huañuchishcamanta paitapish huañuchisha nicujpaj maquipi churachun mandachun. Chaipi paita huañuchichun.

13Chaita rurajtaca mana llaquishpa huañuchishpami israelcunapurapi manapish huañuna cajcunata huañuchijcunataca anchuchinguichij. Tucuipimi alli ringuichij.

14Mandaj Dios cancunapaj Taita Dios cancunapaj cachun cushca llajtapi causacushpaca, cancunapaj c'uchullapi causajcunapaj allpata maillata cashcata ricuchij cachun cancunapaj ñaupa yayacuna churashca rumicunataca ama shujman churanguichijchu.

Manapish cashcata llullashpa huillajcunata ima shina ruranata mandashcami

15Yallitaj ima jatun llaquita, ima juchata rurajta ricushpa chaita huillajca shujlla tiyajpica ama imata ruranguichijchu. Ishqui cashpa, mana cashpaca quimsa cashpa ricushcata huillajcuna tiyajllapi imatapish ruranguichij.

16Llullashpalla huillaj maijan runa shujtajta juchachishpa huillangapaj jatarijpica,

17juchachishpa huillajpish, juchachishcapish Mandaj Diospaj ñaupajman, chai punllacuna Diospajta ruracuj curacunapaj, juezcunapaj ñaupajman ishquindijtaj richun.

18Chaipi juezcuna alli tapuchun. Chai huillashcaca manapish chashnataj ricurijpica, chai huillajca paipaj huauquita yangamanta juchachishcallami canga.

19Chai juchachij runa paipaj huauquita imata rurachun llullacushca cajpica paitaraj pai yuyacushca shina rurachun. Chashna rurashpami cancunapurapi millai yuyaihuan cajcunataca anchuchinguichij.

20Chashna rurajpimi shujtajcunapish manchashpa chai shina millai yuyaita charinataca cancunapurapica mana yuyangacuna.

21Millaita rurajtaca ama llaquishpa cashna ruranguichijlla: Huañuchijtapish paitapish huañuchinguichij. Ñahuita surcujtapish, paitapish ñahuita surcunguichij. Quiruta surcujtapish, paitapish quiruta surcunguichij. Maquita p'aquijtapish, paitapish maquita p'aquinguichij. Chaquita p'aquijtapish, paitapish chaquita p'aquinguichij.