NÚMEROS 30 - Quichua Chimborazo Bible

Diosman imata cuna tucushcataca pajtachichuntaj mandashcami

1Moisesca Israel aillucunata pushajcunata mandashpaca cashnami nirca:

“Mandaj Diosca cashnami nin:

2Mandaj Diosman maijan cashpapish cuna tucushcata cusha nishpa, mana cashpaca paipaj alma yuyachijpi tucui almahuan cushatajmi nishcataca ama p'aquichun. Ashtahuanpish paipaj shimihuan imata nishcataca chaitataj rurachun.

3Maijan soltera cashpapish paipaj yayapaj huasipi causacushparaj, Mandaj Diospajta rurana tucushpa pajtachinataj tucungachari.

4Mandaj Diospajta ruranataj tucushpa tucui almahuan pajtachinataj tucushcata paipaj yaya yachaj chayashpa mana jarcajpica, paipaj tucui almahuan ruranataj tucushcataca pajtachichuntaj.

5Ashtahuanpish paipaj yaya yachaj chayashpa jarcajpica, chai solteraca paipaj tucui almahuan ruranataj tucushcataca saquichunlla. Paipaj yaya jarcajpi mana pajtachishcamanta Mandaj Diosca chai solterataca perdonangami.

6Shinallataj maijan solterapish Mandaj Diospajta ruranataj tucushpa tucui almahuan rurashatajmi nishpa pajtachina tucushcata manaraj pajtachishpa cazarangachari.

7Mandaj Diospajta ruranataj tucushcata paipaj cusa yachaj chayashpa mana jarcajpica, chai huarmica paipaj tucui almahuan pajtachishatajmi nishcataca pajtachichuntaj.

8Ashtahuanpish paipaj cusa yachaj chayashpa jarcajpica, Mandaj Diospajta ruranataj tucushpa paipaj shimihuan pajtachishatajmi nishcataca ama rurashpa saquichunlla. Mandaj Diosca chai huarmitaca perdonangami.

9Ashtahuanpish viuda huarmi, cusa shitashca huarmi Mandaj Diospajta ruranataj tucushpa tucui paipaj almahuan pajtachishatajmi nishpaca chaitaca pajtachichuntaj.

10Maijan huarmipish cusayuj tucushca q'uipa, Mandaj Diospajta ruranataj tucushpa paipaj tucui almahuan pajtachishatajmi ningachari.

11Paipaj cusa chaita yachaj chayashpa mana imata nishpa mana jarcajpica, chai huarmica paipaj tucui almahuan ruranataj tucushcataca pajtachichuntaj.

12Ashtahuanpish paipaj cusa chaita yachaj chayashpa chai punllataj jarcajpica, chai huarmica ruranataj tucushpa paipaj shimihuan pajtachishatajmi nishcataca saquichunlla. Paipaj cusa jarcashcamanta Mandaj Diosca chai huarmitaca perdonangami.

13Mandaj Diospajta ruranataj tucushpa paipaj tucui almahuan pajtachishatajmi nij huarmitaca paipaj cusami rurachun saquinga, mana cashpaca jarcanga.

14Yachaj chayashca punllamanta cusa imata mana nishpa, tauca punllacunacama upalla saquirishpaca, paipaj huarmi Diospajta ruranataj tucushpa paipaj tucui almahuan pajtachishatajmi nishcataca pajtachichunlla nishcatami ricuchin.

15Ashtahuanpish yachaj chayashca punllapi imata mana nishca jahua, q'uipa punllacunapi jarcangachari. Chashna rurashpaca, paipaj huarmipaj juchataca cusami aparinga” nircami.

16Tucui chai mandashcacunaca, Mandaj Dios Moisesta huillachishpa mandashcami. Mandaj Diospajta shuj huarmi rurana tucushcataca paipaj cusa rurai nijllapi ruranata. Shuj soltera paipaj yayapaj huasipi causacushparaj Mandaj Diospajta rurana tucushcataca paipaj yaya rurai nijllapi rurana cashcata mandashcami.