DEUTERONOMIO 20 - Quichua Chimborazo Bible

Jatun macanacuicunapi ima shina canamanta mandashcami

1Cancunata p'iñajcunahuan jatun macanacuipi macanacungapaj llujshishpaca, paicunapaj caballocunata, carrocunata, paicunaca cancunata yalli achcacuna cajta ricushpapish ama manchanguichijchu. Cancunata Egiptomanta llujshichimuj Mandaj Dios cancunapaj Taita Diosca cancunahuanmi.

2Ña macanacunalla shayarijpica cura shayarishpami soldadocunataca,

3cashna ninga: Uyaichij israelcuna, cancunata p'iñajcunahuan macanacungapajmari ña tandanacunguichij. Paicunapaj ñaupajpica ñataj cancunapaj shungupi manchashpa yuyai illaj tucunguichijman, ama chujchunguichijchu, ama fuerza illaj tucunguichijchu.

4Ashtahuanpish Mandaj Dios cancunapaj Taita Diosmari cancunahuan ringa. Cancunata quishpichingapaj cancunata p'iñajcunahuan cancunamanta macanacungapajmari ringa ningami nircami.

5Mandajcunapish tucui chaipi cajcunamanca cashnami ninga: Cancunapuramanta ¿maijantaj mushuj huasita shayachishpa, chai huasipi manaraj causarcanguichij? Maijan chashna cashpaca, huasiman tigraichijlla. Ñataj macanacuipi huañujpi, shujtajraj chai mushuj huasipi causanman.

6¿Maijantaj uvata tarpushpa, chai chagramanta manaraj micushpa manaraj cushicurcanguichij? Maijan chashna cashpaca, huasiman tigraichijlla. Ñataj macanacuipi huañujpi, shujtajraj chai chagramanta micushpa cushicunman.

7Mana cashpaca, maijanca cazaranapaj ari ninacushpa manaraj cazarashca canguichijchari. Maijan chashna cashpaca, huasiman tigraichijlla. Ñataj macanacuipi huañujpi, shujtajraj can cazarana huarmihuan cazaranman ningacunami.

8Mandajcunaca cutinllataj chaipi cajcunata cashna nishpaca: Cancunapurapi ¿maijantaj manchacujcuna, mana c'ari c'ari cajcuna canguichij? Chaicunaca cancunapaj huasiman tigrashpa richijlla. Cancuna manchacujta ricushpa caishujcunapish manchacujcuna tucunman ningacunami.

9Mandajcuna chashna rimashpa tucuchijpica, soldadocunata mandajcunaca paicunata pushachunlla.

10Macanacungapaj shuj puebloman ña c'uchuyacushpaca, chai pueblopi causajcunataca ama macanacushunchij ninguichijraj.

11Chai pueblopi causajcuna chaita ari nishpa, pueblo pungucunata pascashpa cancunata yaicuchishpaca paicunaca impuestota pagashpa, cancunapajta rurashpa causangallacunami.

12Ashtahuanpish chai pueblopi causajcuna cancunahuan macanacushuntaj nishpa macanacui callarijpica, pueblo muyundijta shayaringuichijlla.

13Mandaj Dios cancunapaj Taita Dios, paicunata cancunapaj maquipi churajpica, tucui chaipi causaj c'aricunataca tucuita espadacunahuan huañuchinguichij.

14Huarmicunallata, huahuacunallata, animalcunallata, chaipi tucui imalla japishcacunallata cancunapaj cachun japinguichij. Cancunata p'iñajcunata Mandaj Dios cancunapaj Taita Dios cancunapaj maquipi churajpi, paicunata mishashcamanta japishcacunataca micunguichijlla.

15Cancunapaj llajtamanta carupi caj, mana cai llajtapaj caj pueblocunapi causajcunapajllatami chashna rurana canguichij.

16Ashtahuanpish Mandaj Dios cancunapaj Taita Dios cancunapaj cachun cushca cai llajtapi caj pueblocunapi causajcunataca, shujllatapish causajtaca amataj saquinguichijchu.

17Heteocunata, amorreocunata, cananeocunata, ferezeocunata, heveocunata, jebuseocunataca Mandaj Dios mandashca shinallatajmi tucuita chingachina canguichij.

18Paicuna ima shinami paicunapaj dioscunapaj millananacunata rurancuna, chai shinallatataj ruranata catinata yachachijpi cancunapish chashna rurashpa Mandaj Diosta p'iñachishpa ama juchallichichunmi chashna rurana canguichij.

19Maijan pueblota cancunapaj cachun japingapaj chai pueblo muyundijpi shayarishpa achca punllacunata macanacushpaca, chai llajtapi tiyaj yuracunataca ama urmachinguichijchu. Chai yuracunapi p'ucushca granocunatami micuna canguichij. Chai llajtapi tiyaj yuracunataca ama p'itinguichijchu. Yuracunalla cashcamanta, cancunataca mana runacuna shina imata rurashpa llaquichingachu.

20Ashtahuanpish granota mana p'ucuj yuracuna cashcata ricushpaca urmachinguichijlla. Chai pueblota urmachingapaj chai caspicunataca baluartecunata ruranguichij. Chai pueblota japingacama macanacunguichijlla.