1Ñuca uyacuitami sinchita cashna caparirca: “Huañuchijcunaca ñamari pueblomantaca chayamushcacuna. Chingachingapajmari, paicunaca macanacunacunatapish maquipi apashca shamucuncuna” nircami.
2Shina nijpica, janaj lado punguman shamuna ñantami sujta runacuna shamucujta ricurcani. Paicunapish chingachingapajmi, macanacunacunata maquipi apamurcacuna. Chai runacunapaj chaupipica, shujtaj runami lino churanata churashca carca. Paica cinturapica, quillcanapaj tintatami apamurca. Paicuna yaicushpaca, broncemanta rurashca altar c'uchupimi shayarircacuna.
3Shinallataj israelcunapaj Taita Diospaj achij nicujca querubinpaj jahuamanta anchurishpaca, huasi umbralpimi tiyarirca. Chaimantaca lino churanata churashca, cinturapica quillcangapaj tintata aparishca runatami Mandaj Diosca cayarca.
4Mandaj Diosca chai runataca cashnami nirca: “Jerusalén puebloman rishpa, chai pueblopi causajcuna yallitaj millaita rurashcamanta huacashpa capariricujcunata frentepi señalta churagri” nircami.
5Ñuca uyacuitami caishuj runacunatapish cashna nirca: “Cancunapish chai runata catishpa chai pueblollatataj pasanguichij. Chaipi causajcunataca amataj perdonanguichijchu, amataj llaquishpa huañuchinguichijlla.
6Ñucapajlla huasipi causajcunamanta callarishpaca yuyajcunatapish, mosocunatapish, solteracunatapish, huahuacunatapish, huarmicunatapish shujllapish ama saquirichun tucuicunata huañuchinguichijlla. Ashtahuanpish señalta charijcunapajmanca, ama c'uchuyanguichijchu” nircami. Shina nijpimi, Diospaj huasi ñaupajpi caj cunaj yuyajcunamanta callarishpa huañuchircacuna.
7Chai q'uipapish, chai runacunataca cashnami nirca: “Diospaj huasitaca mapayachishpa, huañushcacunatapish huasi canllapi jundachishpa, llujshichijlla” nircami.
Shina nijpimi paicuna llujshishpaca, chai pueblopi causajcunata huañuchircacuna.
8Chai runacuna tucuicunata huañuchicujpica, ñucallami saquirircani. Chaimantami ñucaca pambaman tupajta cumurishpaca: “¡Aij ñucata Mandaj Jatun Dioslla! Canca jatunta ¿p'iñarishpachu, Jerusalenpi causaj saquirij israelcunataca tucuicunata chingachigringui imatagari?” nishpa caparishpa mañarcani.
9Shina nijpimi, cashna nirca: “Israelcunapish, Judá llajtapi causajcunapish yallitajmi millaita rurashcacuna. Chaimantami cai llajtaca yahuarhuan junda, cai pueblopi causajcunaca millaita rurana yuyaillahuan jundami. Paicunaca cashnami nincuna: Mandaj Diosca cai llajtataca cungarinmi, Mandaj Diosca mana ricucunchu nishcacunami.
10Chaimantami ñucaca paicunataca llaquichigrini, manataj perdonashachu, manataj llaquishachu. Paicuna millaita rurashcamantaca, chai llaquicunallatajmi paicunataca japinga” nircami.
11Lino churanata churashca, cinturapica quillcana tintata charicuj runaca: “Can mandashca shinallatajmi, tucuita pajtachircani” nishpami cutichirca.
Who We AreWhat We EelieveWhat We Do
2025 by iamachristian.org,Inc All rights reserved.
