NEHEMÍAS 6 - Quichua Chimborazo Bible

Nehemiasta p'iñajcuna cutinllataj llaquichinata yuyarinacushcami

1Jerusalén muyundij pircataca, chai punllacama pungucunata manaraj churashpapish pircana cashcataca shuj jutcullatapish maipi mana saquishpa tucuita allichishcata yachashpami, Sanbalatpish, Tobiaspish, arabemanta caj Gesempish, tucui ñucata p'iñajcunapish mana allita ruranata yuyarircacuna.

2Chaimi Sanbalatpish, Gesempish: “Ono pambapi tiyaj maijan llajtapi ñucahuan tandanacushun” nishpa huillanaman ñucapajman cachashca carca. Ashtahuanpish paicunaca ñucata llaquichingapajllami chashna nishca carca.

3Chaimi ñucaca: “Ñucaca caipica jatun ruranatamari ruracuni, mana ri tucunichu. Ñuca cancunapajman rijpica, chai ruracushcacunaca saquiringallatajmari” nichunmi huillajcunata cacharcani.

4Chashnallataj nishpa cayachunca paicunaca chuscu cutinmi ñucapajman cacharca. Ñucapish ñaupaman nishca shinallatajmi cutichircani.

5Chashna nijpipish Sanbalatca, paipajta rurajtaca ñaupaman nishca shinallataj nichunmi caihuanca pichca cutin shuj quillcashcataca mana pillushcata cachashca carca.

6Chai quillcapica: “Canpish, tucui israelcunapish jatun mandajta ña mana cazushpa c'ariyashpa, jatun pircataca allichicun nishpami, shujtaj llajtapi causajcunapish, Gasmu runapish huillan. Chashna nishcata uyashpaca, canca jatun mandaj tucusha nicushcatami yuyanchij.

7Canca Judapica ñami jatun mandaj tiyan nishpa canmanta Jerusalenpi causajcunaman huillachunca profetacunata churashcatami huillancuna. Cunanca chashna nishcacunata jatun mandaj amaraj yachaj chayajpi, shamui ñucanchijhuan parlanacushun” nishpami quillcashca carca.

8Chashna nijpimi ñucaca: “Pi mana chashna nicunchu. Ashtahuanpish canllatajmi cambaj quiquin yuyaimanta chashna nicungui” nichunmi cacharcani.

9Tucui paicunaca chai pircacushcataca, manchashpa mana tucuchingacunachu nishpami, chashna manchachishun nircacuna. “Chashna nicujpipish Taita Dioslla, ñucaman ashtahuan rurana yuyaita cuhuayari” nishpami mañarcani.

10Chai q'uipaca Mehetabelpaj nieto Delaiapaj churi Semaiaspaj huasimanmi rircani. Semaiasca paipaj huasipi huichcarishcami cashca carca. Paica cashnami nirca: “Diospaj huasi ucupi tandanacushun. Chaipica Diospaj huasi pungucunata huichcarishunllami. Cantaca huañuchingapajmi shamucun. Cunan tutami huañuchinaman shamungacuna” nircami.

11Chaimi ñucaca: “¿Ñuca shina c'ari c'ari runaca miticungami yuyanguichari? ¿Ñuca shina c'ari c'ari runaca paipaj causaita quishpichingapajca Diospaj huasiman yaicungachari? Manataj yaicushachu” nircanimi.

12Semaiasca, Dios manapish huillachijpi chashna huillacushcata, ashtahuanpish Sanbalathuan, Tobiashuan paiman pagashcallamanta chashna nicushcatami entendircani.

13Paicuna ñucata chashna manchachijpi ñuca miticushpa juchallichunmi, chashna pagashca carca. Pai nishcata ñuca uyashpa miticushca cajpica, tucuicuna mana alli nishpa p'iñashcami caiman carcani.

14Ñuca Dioslla Tobiastapish Sanbalattapish paicuna ima shina rurashca shinallataj ruranata yuyaripangui. Noadías profeta huarmipish caishuj profetacunapish Taita Dios huillachijpimi huillacuni nishpa ñucata manchachishpa muspachisha nishcatapish yuyaripangui.

15Jerusalén muyundij pircataca pichca chunga ishqui punllacunata trabajashpami, Elul quillapaj ishqui chunga pichca punllacunapi tucuchircanchij.

16Tucui chaicunata uyajcunaca ñucanchijta p'iñajcunapish, ñucanchij muyundij tucui llajtacunapish mancharishpami cumurircacuna. Tucui chaicunata rurashcata ricushpaca, paicunapaj Taita Diosmari chai tucuitaca ruran nircacunami.

17Chai punllacunapica Judá llajtata mandajcunaca, achca quillcacunatami Tobiasman cachajcuna carca. Tobiaspish paicunamanca, chashnallatajmi cachaj carca.

18Tobiasca, Arapaj churi Secaniaspaj yernomi carca. Paipaj churi Johananpish, Berequiaspaj churi Mesulampaj ushushitami paipaj huarmi cachun japirca. Chashna cashpami judiocunaca achcacuna paihuan alli apanacunata ari ninacushca carca.

19Paicunaca Tobiasca caita chaitami allita ruran nishpami ñuca ñaupajpi parlanacujcuna carca. Ñuca ima nishcacunatapish Tobiasmanmi huillagrijllacuna carca. Tobiaspish ñucata manchachisha nishpami quillcacunata cachaj carca.