EZEQUIEL 12 - Quichua Chimborazo Bible

Jerusalenpi causajcuna prezu rina cashcata Ezequiel ricuchishcamanta

1Mandaj Diosca ñucataca cashnami nirca:

2“Huañujlla aichayuj runalla, canca mana cazuj ch'ahuancunapaj chaupipimari causacungui. Paicunaca mana cazuj ch'ahuancuna cashcamantami, ñahuita charishpapish mana ricuncuna, rinrinta charishpapish mana uyancuna.

3Chashna cashcamanta huañujlla aichayuj runalla, canca imalla apanacunata allichishpa, paicuna ricucujpi punllapacha llujshishpa ringui. Can maipi causacushcamantaca, shujtajpi causagringui. Chaita ricushpaca, chai mana cazujcunaca entendingapishchari.

4Prezucuna apana quipita shinaca paicuna ricucujpi punlla llujshichingui, ashtahuanpish canca prezu apacujpi shina paicuna ricucujpi chishita llujshingui.

5Paicuna ricucujllapitaj, patata jutcushpa chaita llujshingui.

6Paicuna ricucujpi, imalla apanata rigra jahuashpa tuta llujshichingui. Cambaj ñahuita taparishpa llajtataca ama ricungui. Israelcunapajca jatun llaqui shamunata yachachunmi, chashna rurashpa ricuchichun churani” nircami.

7Shina nijpimi ñucaca pai mandashca shina rurarcani, prezucuna apana quipita shinaca punllami llujshichircani. Chishitaca, ñuca quiquin maquihuanmi patataca jutcurcani. Chaimantaca paicuna ricucunpi, imalla apanata rigra jahuashpa, tutami llujshirircani.

8Cayandij tutamantataca, Mandaj Diosca ñucataca cashnami nirca:

9“Huañujlla aichayuj runa, chai mana cazuj israelcunaca cantaca: ¿Imatataj ruracungui? nishpami tapungacuna.

10Paicunamanca cashna nishpa huillangui: Mandaj Diosca cashnami nin: Cai huillanaca Jerusalenta mandajpish, tucui chaipi causaj israelcunapish imalla tucuna cashcatami ricuchin ningui.

11Shinallataj ñucami cancuna imalla tucunataca ricuchicuni. Imatami ñuca rurarcani, chai shinallatajmi cancunapish tucunguichij. Cancunaca huatashca shinami prezu apashca canguichij.

12Paicunata mandajtapish rigra jahuapimi, pata jutcuta tuta llujshichishpa apangacuna. Llajtata mana ricungapajpish, paipaj ñahuitami taparinga.

13Ashtahuanpish pai ricujpica, ñuca linchita shitashpami chaipi urmachisha. Chaimantaca pai p'iñashca Caldea llajta runacuna causacun Babilonia llajtaman apachunmi saquisha. Chai llajtataca mana ricungachu, chaipimi huañunga.

14Paita ayudangapaj muyundijta shayacujcunatapish, paipaj soldadocunatapish tucuicunatami caita chaita cachasha. Paicunataca espadahuanmi catisha.

15Tucui cai pachapi tiyaj llajtacunapi tsirapashpa chingachijpimi, ñucataca Mandaj Diostaj cashcata yachangacuna.

16Paicunapuramantaca ashacunallatami, espadahuan, yaricaihuan, ungüihuan huañunamantaca quishpichisha. Paicunami mai llajtaman chayashpapish: Ñucanchijca yallitaj millaitami rurashcanchij nishpa, tucuita huillangacuna. Chaimantami ñucataca, Mandaj Diostaj cashcatapish yachangacuna” nircami.

17Mandaj Diosca ñucataca cashnapishmi nirca:

18“Huañujlla aichayuj runalla, cambaj micunataca chujchuihuan micuyari, yacutapish manchaj manchajlla ubyayari.

19Chaimantaca Israel llajtapi causajcunamanca cashna ningui: Mandaj Jatun Diosca Jerusalenpi causajcunatapish, tucui israelcunatapish cashnami nin: Paicunaca micunataca chujchuihuanmi micungacuna, yacutapish manchaj manchajllami ubyangacuna. Paicuna millaita rurashcamantaca, paicunapaj llajtaca chushajmi saquiringa.

20Runacuna causacun pueblocunapish, shitashcami saquiringa. Chashnami cai llajtaca llaquinayaj saquiringa. Chashna rurajpimi ñucataca, Mandaj Diostaj cashcataca yachangacuna ninmi ni” nircami.

21Mandaj Diosca ñucataca cashnapishmi nirca:

22“Huañujlla aichayuj runalla, cancunaca Israel llajtapica: Punllacunaca uniyashpa rinllami, muscuipi shina ricushcacunapish chingarinllami nishpami yuyachij shimicunata rimanguichij. Chaica ¿imatataj nisha ninri?

23Chaimanta paicunamanca cashna nishpa huillai: Mandaj Jatun Diosca cashnami nin: Cai yuyachij shimicunataca chingachishami, cai yuyachij shimicunataca Israel llajtapica, ña mana ashtahuan rimangacunachu. Chai punllacunaca ñamari chayamushca, muscuipi shina ricushcacunapish tucuimi pajtamushca ninmi nishpa huillangui.

24Israelcunapurapica ima yangacunata muscuipi shina ricujcunapish, adivinashpa uyanajllata rimajcunapish mana tiyangachu.

25Imalla tucunata Mandaj Dios ñuca huillashcataca, mana uniyashpami pajtachisha. Mana cazuj israelcunalla, cancunaman huillashca shimicunataca pajtachishatajmi ninmi Mandaj Jatun Diosca ningui” nircami.

26Mandaj Diosca ñucataca cashnapishmi nirca:

27“Huañujlla aichayuj runalla, cantaca israelcunaca cashnami nincuna: Cai runa muscuipi shina ricushcata huillashcaca achca punllacuna q'uipa, uni huatacunapimi pajtanga nincunami.

28Chashna nicujcunamanca cashna nishpa huillai: Mandaj Jatun Diosca cashnami nin: Ñuca imalla huillashca shimicunaca ña mana ashtahuan uniyangachu, ashtahuanpish ñuca imalla huillashca shimicunaca pajtangatajmi ninmi Mandaj Jatun Diosca nishpa huillai” nircami.