EZEQUIEL 18 - Quichua Chimborazo Bible

Juchata rurajca huañungami nishcamanta

1Mandaj Diosca ñucataca cashnami nirca:

2“Israel llajtapica cashnami yuyachij shimicunataca ninguichij: Yayacuna jayaj uvata micucujpimi, churicunapaj quirucunaca mana alli cai tucun nishcata uyashpaca, ¿imatataj yuyanguichij?

3Ñuca causaj Mandaj Jatun Diostajmi cashna nini: Israel llajtapica, cai shina yuyachij shimicunataca imapaj mana cutinca rimanachu canguichij.

4Tucuicunami ñucapaj. Yayapish, churipish ñucapajmari. Maijanpish juchallishpaca, chaillami huañunga.

5Cashcata ruraj runaca imatapish allitami ruran, cashcatami ruran.

6Lomacunapi tiyaj altar c'uchucunapica mana micunchu, israelcuna rurashca dioscunata mana adoranchu, shujtajpaj huarmitapish mana japirinchu, quilla ungüihuan caj huarmipipish mana chayarinchu.

7Pitapish mana llaquichinchu, divijta prendashcatapish cutichinmi. Mana shuhuanchu, yaricaihuan cajcunamanpish carajmi, churana illajllacunamanpish churachijmi.

8Cullquita mañachishpapish huahua cullquita mana cobranchu, cullquita alquilachishpapish huahua cullquitaca mana japinchu. Millaita ruranamantapish anchurijmi, runacuna p'iñanacucujpipish ch'imbapurashpa allichijmi.

9Ñuca mandashcacunapi nishca shina causaj, ñuca quillcachishcacunapi nishca shina allita rurashpa causajmi. Chaimi cashcata ruraj runa. Paillami causaitaca charinga. Mandaj Jatun Diostajmi chashna nini.

10Ashtahuanpish paipaj churica shuhua cangachari, huañuchij cangachari, ima millaitapish ruraj cangachari.

11Lomacunapi tiyaj altar c'uchucunapi micungachari, shujtajpaj huarmita japiringachari,

12huajchacunata, imata mana charijcunatapish llaquichij cangachari, shuhua cangachari, prendashcatapish mana cutichij cangachari, rurashcalla dioscunatapish adoraj cangachari, ima millananatapish ruraj cangachari.

13Cullquita mañachishpapish huahua cullquita cobraj cangachari, alquilachishpapish huahua cullquita yallitaj cobraj cangachari. Chai runaca ¿causaitaca charingachu imashi? ¡Mana, paica maitataj causangari! Cai tucui millaita rurashcamantaca huañungatajmi, paipaj yahuarca paipaj jahuallatajmi canga.

14Chashna mana allita ruraj runa cashpapish churiyuj tucujpi, chai churica paipaj yaya rurashca juchacunata ricucushpapish, chai tucui millaitaca mana rurangachari.

15Lomacunapi tiyaj altar c'uchucunapipish mana micungachari, israelcuna rurashca dioscunatapish mana adorangachari, shujtajpaj huarmitapish mana japiringachari.

16Pitapish mana llaquichingachari, imata mañachishpapish prendata mana japingachari, mana shuhuaj cangachari, yaricaihuan cajcunaman pai micucushcata caraj cangachari, lluchulla cajcunaman churanata churachij cangachari.

17Huajchata mana llaquichij, cullquita mañachishpapish, mana huahua cullquita japingachari. Alquilachishpapish huahua cullquita mana cobrangachari, ñuca quillcachishcacunata huaquichij, ñuca mandashcacunapi nishca shina causaj runa cangachari. Chashna cashpaca paipaj yayapaj juchacunamantaca mana huañungachu, ashtahuanpish causangatajmi.

18Paipaj yayaca, millaita ruraj cashcamanta, shujtaj ima charishcata quichuj cashcamanta, imapish mana allita shujtajcuna ricucunpi ruraj cashcamantaca, paillatajmi paipaj juchamantaca huañunga.

19Cancunaca: ¿Imamantashi yayapaj juchamantaca churica llaquita mana apan? ninguichijchari. Paipaj churica imatapish allita, imatapish cashcallatami rurarca. Ñuca quillcachishcacunatapish tucuita cazushpamari, alli pajtachirca. Chashna rurashcamantaca causangatajmari.

20Juchata rurajcunallami huañunga, churica paipaj yayapaj juchamantaca mana llaquita apangachu. Shinallataj yayapish, paipaj churipaj juchamantaca mana llaquita apangachu. Cashcata ruraj runaca allitami japinga. Ñucata mana manchaj runaca, llaquitami japinga.

Mandaj Diosca cashcata ruraj cashcamanta(Ez. 33.10-20)

21Ashtahuanpish ñucata mana manchaj runa cashca cashpapish, cai tucui millaita ruracushcamanta saquirishpa, ñuca quillcachishcacunata cazushpa, ñuca nishca shina allita rurashpa, cashcata rurashpaca causangatajmi, mana huañungachu.

22Paipaj tucui millai rurashcacunataca mana yuyarishachu. Ashtahuanpish pai allita rurashcamantaca causangami.

23Ñucaca ñucata mana manchaj runa huañuchunca, mana munanichu. Mandaj Jatun Diostajmi chashna nini. Paica millaita ruranata saquishpaca ¿maitataj mana causangari?

24Ashtahuanpish cashcata ruraj runaca, cashcata ruranata saquishpa Diosta mana manchaj runa shinallataj millaita rurashpaca, ¿paica causangachu imashi? Pai allita ruraj cashca cajpica, imata mana ricushachu. Ashtahuanpish pai ñucata mana cazushpa millaita rurashcamantaca huañungatajmi.

25Ashtahuanpish cancunaca: Mandaj Diosca ima allita mana ruranchu ninguichijmi. Israelcuna, caita alli uyaichij. ¿Ñucachu mana allita rurani imatagari? Cancuna rurashca mana alli cashcataca ¿manachu yachanguichij?

26Shina cajpica cashcata ruraj runaca, cashcata ruranata saquishpa millaita rurashcamantaca, paimi huañunga. Paillataj mana alli rurashcamantami huañunga.

27Shinallataj ñucata mana manchaj runa cashpapish, ñucata mana manchashpa juchata ruracushcata saquishpa cashcata rurashpaca causangami.

28Tucui millaita ruracushcata saquishpaca causangatajmi, mana huañungachu.

29Israelcunalla, cancunaca Mandaj Diosca mana allitami ruran ninguichijmi. ¿Maitataj ñucaca mana allitaca rurashari? Ashtahuanpish cancunamari mana allita ruranguichij.

30Shina cajpica israelcunalla, cancuna imalla rurashcacunataca ñucami tucuita ricuchisha” ninmi. Mandaj Jatun Diostajmi chashna nin: “Chaimanta cancuna tucui millaita ruranata saquishpa cutirichij. Chashna cutirijpica, cancunapaj juchaca mana llaquipi churai tucungachu.

31Millaita rurashpa juchayuj tucushcataca cancunamanta anchuchichij. Chashna rurashpaca shungutapish, yuyaitapish mushujyachichij. Israelcuna, ¿maitataj yangamantaca huañunguichigari?” ninmi.

32Mandaj Jatun Diostajmi cashna nin: Huañugricujcunataca mana huañuchun munanichu. Shina cajpica millaita ruranamanta saquirichij, causanguichijmi.