JOB 42 - Quichua Chimborazo Bible

Jobca juchacunata Diosman huillashpa Diospaj ñaupajpi alli llujshishcamanta

1Jobca Mandaj Diostaca cashna nishpami cutichirca:

2“Ñucaca cantaca tucuita rurai

tucuj cashcatami yachani.

Cambaj yuyaimantaca imapish

mana pacalla cai tucunchu.

3¿Pitaj can imalla ruranacunamantaca,

manapish entendishpa ñucataca

muspachircachu imami?

Chaimantami ñucaca mana ima yuyaita

japishpa rimaricurcanilla.

Ñucapajca yallitaj jatun

mancharinacunamari cashca,

chaitaca mana entendircanichu.

4Canhuan rimasha ninica, ñucata

uyahuayari.

Ñuca tapushcacunataca can cutichihuangui.

5Ñucaca parlashcallatami canmantaca

uyarcani.

Cunanmi cantaca ñuca quiquin

ñahuihuantaj ricuni.

6Chaimantami ñucallataj manchanayajta

llaquirishpa, allpa jahuapi ushpa

jahuapi tiyarini” nircami.

7Mandaj Diosca cai tucuita Jobta rimashca q'uipami, Temanmanta caj Elifaztapish cashna rimarca: “Cancunaca ñucata servij Job shinaca ñucamantaca ima allicunata mana huillacunguichij. Chaimantami canhuanpish, caishuj ishqui runacunahuanpish yallitaj p'iñarini.

8Chashna mana allita rurashcamanta, cunanca canchis c'ari bizicunata, canchis carnerocunata apashpa, cancunamanta ñucaman cushpa tucui rupachichun ñucata servij Jobman cugrichij. Ñucata servij Jobmi cancunamantaca ñucata mañanga. Pai mañashcatami ñucaca uyasha. Pai mañajllapimi cancunataca mana ñucamanta ima allicunata huillashca cajpipish, mana jatunta llaquichisha. Cancunaca manamari ñucata servij Job shina carcanguichijchu” nircami.

9Shina nijpimi Temanmanta Elifazpish, Suhamanta Bildadpish, Naamanmanta Zofarpish, Mandaj Dios mandashca shinallataj rurarcacuna. Chaimantami Mandaj Diosca Job mañashcataca chasquirca.

Diosca Jobman allicunata cushcamanta

10Paihuan alli apanacuj quimsa runacunamanta mañashca q'uipami, Mandaj Diosca Jobmantaca chai tucui llaquicunata anchuchirca. Shinallataj Jobmanca ñaupa charishcamanta ishqui cutihuan yallimi tucuita curca.

11Chaita ricushpami, paipaj huauquicunapish, panicunapish, tucui ñaupa rijsishcacunapish, paipaj huasiman shamushpa paihuan micurcacuna. Mandaj Dios paiman llaquicunata cachashcamanta, llaquirishcata ricuchishpa cushichingapajmi shamurcacuna. Paicunaca tucuicunami shuj cullquitapish, shuj curi sortijastapish cungapaj apamurcacuna.

12Mandaj Diosca Jobmanca q'uipa punllacunapica, ñaupa punllacunapi bendiciashcatapish yallitami bendiciarca. Chaimantami paica, 14.000 ovejacunata, 6.000 camellocunata, 1.000 yunta huagracunata, 1.000 burrocunatapish charirca.

13Canchis churicunatapish, quimsa ushushicunatapishmi charirca.

14Punta ushushitaca Jemima shutitami shutichirca, q'uipa ushushitaca Cesia shutitami shutichirca, chaipaj q'uipa ushushitaca Keren-hapuc shutitami shutichirca.

15Chai llajtapica Jobpaj ushushicuna shina sumaj huarmicunaca, pi mana tiyarcachu. Jobca paicunamanpish, paicunapaj turicunaman shinallatajmi japina cashcata curca.

16Jobca ungüimanta alliyashca q'uipaca, 140 huatacunahuanmi causarca. Paica, paipaj huahuacunapaj huahuacunatapish, chai huahuacunapaj huahua huahuacunatapishmi ricurca. Paica chuscu cutin nietocuna ricuringacamami causarca.

17Chaimantaca yallitaj yuyajyashpami huañurca.