1Mandaj Dioslla, quiquinpimi shunguta churani.
Ñuca musparichun amataj saquingui.
Quiquinpaj cashcata rurashcahuan quishpichihuai.
2Quiquinpaj rinrinta mañachishpa ñucata uyahuayari.
Utca quishpichihuayari.
Quiquinca ñucapaj sinchi rumi cayari.
Muyundijta pirca shina quishpichij cayari.
3Quiquinca ñuca jatun rumimi cangui.
Ñuca miticuna sinchi huasimi cangui.
Quiquinpaj shutihuan ñucata pushahuangui.
Quiquinpaj ñanpi purichihuangui.
4Linchitamari tindishca, chai linchimanta ñucata llujshichihuayari.
Quiquinca ñuca miticunami cangui.
5Ñuca espiritutaca quiquinpaj maquipimi mingani.
Mandaj Diosca cashcata rurajmi cangui.
Quiquinmi ñucata quishpichij cangui.
6Rurashcalla manapish dios cajcunapi shunguta churajcunataca p'iñanimi.
Ashtahuanpish ñucaca Mandaj Diospimi shunguta churani.
7Quiquinca ñuca llaquihuan cajtami ricushcangui.
Ñuca alma llaquihuan huañucujtami rijsingui.
Mandaj Dioslla quiquinpaj c'uyaihuan cushichijpimi cushicuni.
8P'iñajpaj maquipica mana churarcanguichu.
Ñucataca ancho pambapimi shayachircangui.
9Mandaj Dioslla, ñucata
llaquihuayari.
Jatun llaquipimari cani.
Llaquihuanmari ñuca ñahuicunapish tucuricun.
Ñuca almapish, ñuca cuerpopish tucuricunmari.
10Ñuca causaica cai nanaicunahuanmi utca tucuricun.
Aij nicujllapica, achca huatata causanapish utcamari tucuricun.
Millaita ñuca rurashcamantaca ñuca fuerzapish tucurimunmi.
Ñuca tullucunapish tucuricunmi.
11Ñucata p'iñajcunapaj chanzata ruranami
tucushcani.
Ñuca c'uchullapi causajcunapajcarin ashtahuan chanzata ruranami tucushcani.
Ñucata rijsijcunapajpish mancharinami tucushcani.
Ñanpi ñucata ricujcunapish miticushpami
callpancuna.
12Huañushcata shina paicunapaj shungullapipish
ña mana yuyarinchu.
P'aquirishca vasota shinami cungarishcacuna.
13Achcacuna llullashpa ñucata llaquichisha nicujtami uyani.
Maipi ñuca cajpipish manchaimi japin.
Ñucata llaquichingapajmi tandanacushpa parlanacuncuna.
Huañuchinatapishmi yuyancuna.
14Ashtahuanpish ñucaca Mandaj Dioslla,
quiquinpimi shunguta churani.
“Quiquinmi ñuca Dios cangui” ninimi.
15Ñuca causaica quiquinpaj maquipimi.
Ñucata p'iñajcunapaj maquimanta quishpichihuai.
Ñucata llaquichina yuyailla llaquichisha nicujcunapaj maquimanta quishpichihuai.
16Quiquinpaj ñahuihuan quiquinpajta rurajtaca achijyachihuai.
Quiquinpaj c'uyaihuan quishpichihuai.
17Mandaj Dioslla, ñucaca quiquinta mañashpa causajmi cani.
Ñuca pingai tucuchun ama saquihuaichu.
Quiquinta mana rijsijcunataca pingachishca cachun.
Seolman shitashca cachun.
18Cashcata rurajta yallitaj llaquichishpa rimajcunata, cashcata rurajta jatun tucushpa yangapi churajcunata,
llullaj shimicunataca ama rimajta rurashca cachun.
19Quiquinpaj c'uyaica yallitaj jatunmi.
Chaitaca quiquinta manchajcunapajmi huaquichishcangui.
Quiquinpi shunguta churajcunapimi ricuchishcangui. Chaitaca huañujlla aichayuj
runacunapaj ñaupajpimi
ricuchishcangui.
20Runaca ñucata llaquichinapajca pacallapimi yuyaricun.
Mandaj Dioslla quiquinpaj pacallapi ñucata pacangui.
Millaita rimaj c'allucunamanta quiquinpaj
carpa huasipi pacashpa churai.
21Muyushpa sinchi pircayuj pueblopimi, paipaj llaquishcahuan ñucapaj allita rurarca.
Paipaj c'uyaihuanmi mancharinacunata rurarca.
Chaimanta Mandaj Diostaca alli nishca cachun.
22Llaquihuan ñuca musparicushpaca: “Quiquinpaj
ñahuimantaca anchuchishca cashcatami”
yuyarcani.
Ashtahuanpish ñuca quiquinta rogashpa mañashcataca uyashcanguimi.
Quiquinta ñuca caparishcata uyashcanguimi.
23Mandaj Diospajlla cajcuna, tucuicuna
paita c'uyaichij.
Paillapi shunguta churajcunataca Mandaj Diosmi huaquichin.
Imapipish jatun tucushca cajcunamanca,
paicuna rurashca shinallatajmi llaquichinga.
24Mandaj Diospi shunguta churajcunaca tucuicuna fuerzarichijlla.
Cancunapaj shungupica, ashtahuan
fuerzarichijlla.
Who We AreWhat We EelieveWhat We Do
2025 by iamachristian.org,Inc All rights reserved.
