ZACARÍAS 8 - Quichua Chimborazo Bible

Jerusalentaca cutin allichishami nishcamanta

1Tucuita Mandaj Diosca, ñucamanca cashnami nirca:

2“Tucuita Mandaj Dios ñucami cashna nini: Siónpi causajcunataca ñucapajlla cachunmi munarcani, ñucapajlla cachun munashcamantami mana jahuallata p'iñarircani. Chashna cashpapish, paicunataca achcatami c'uyani” ninmi.

3Mandaj Diosca cashnapishmi nin: “Sionman tigrashpaca, Jerusalén chaupipimi causasha. Jerusalenca: Imata mana llullaj Pueblo shutimi canga. Tucuita Mandaj Diospajlla Sión urcuca: Jucha illaj Urcu shutimi canga” ninmi.

4Tucuita Mandaj Diosca cashnapishmi nin: “Jerusalén pueblo ñancunapica yuyaj c'aricuna, yuyaj huarmicunami tauna aisashca puringacuna. Paicunaca, uni huatacunata causashcamantami, chashnaca tucungacuna.

5Shinallataj chai pueblo ñancunapica c'ari huahuacunapish, huarmi huahuacunapishmi pugllangapaj jundaringacuna” ninmi.

6Tucuita Mandaj Diosca cashnapishmi nin: “Chai punllacunapica, cai pueblopi causaj saquirijcunapaj ñahuicunapica, jatun mancharinami ricuringa. Ñucapajca ima mancharina mana ricuringachu” ninmi tucuita Mandaj Diosca.

7Mandaj Diosca cashnapishmi nin: “Ñuca agllashcacunataca, ñucamari inti llujshin llajtacunapi causajcunapaj maquimantapish, inti huashicun llajtacunapi causajcunapaj maquimantapish quishpichini.

8Paicunataca, Jerusalenpi causachunmi pushamusha. Chaipimi paicunaca ñucapajlla causangacuna, ñucapish paicunapaj Diosmi casha. Ñucaca paicunapajca mana llullaj, cashcata ruraj Dios cashami” ninmi.

9Tucuita Mandaj Diosca cashnapishmi nin: “Cancunaca Mandaj Dios ñuca huasita ruranata callari punllamantami, Dios ima nishcata huillajcuna huillashcataca cunan punllacunacama uyashcanguichij. Shina cajpica ama shaicurishpa, tucuita Mandaj Diospaj huasita ruranata tucuchichijlla.

10Sarun punllacunaca runacunaca trabajashpapish, imata mana japircacunachu. Animalcunapish, micuna illajllami causarcacuna. P'iñajcuna tiyashcamantami shamujcunapajpish, rijcunapajpish sumajta causanaca mana tiyarca. Ñucami tucuicunallataj caishuj chaishuj llaquichinacuchun saquircani.

11Ashtahuanpish cunanca cai pueblopi causajcunapuramanta saquirishcacunataca, mana sarun punllacunapi shinallatajchu llaquichisha. Tucuita Mandaj Diostajmi chashna nini.

12Ashtahuanpish paicunapajca, sumaj causaimi tarpushca shina saquiringa. Uvapish achcatami p'ucunga. Allpacunapish achca granocunatami p'ucunga. Jahua pachapish tamyata cachangami. Chai tucui allicunatami, cai pueblopi causajcunapuramanta saquirishcacunamanca cusha.

13Judá llajtapi causajcunalla, israelcunalla, cancunaca shujtaj llajtapi causajcuna llaquichishcami causarcanguichij. Shina cajpipish, ñucami cancunataca chai llaquimantaca quishpichisha. Cancunamantami shujtajcunaca achca allicunata japinga. Ama imata manchaichijchu, ashtahuanpish tucuicunallataj shuj shinalla tucushpa, ñuca huasitaca rurashpa tucuchichijlla” ninmi.

14Tucuita Mandaj Diosca cashnapishmi nin: “Cancunapaj ñaupa yayacunaca ñucataca yallitajmi p'iñachircacuna. Chaimantami paicunataca llaquichina yuyai carcani. Paicunata llaquichinataca, mana llaquinarcachu. Tucuita Mandaj Diostajmi chashna nini.

15Ashtahuanpish cunan punllacunaca, Jerusalenpi causajcunapajpish, Judá llajtapi causajcunapajpish allicunata ruranatami yuyarircani, ama imata manchaichijchu.

16Ashtahuanpish cancunaca, caicunatami rurana canguichij: Ama caishuj chaishuj llullanacunguichijchu. Sumaj causai tiyachunca, tandanacuna pungucunapica, cashcata rurashpa allichinami canguichij.

17Shinallataj cancunaca shungullapipish, shujtajcunata llaquichinataca ama yuyanguichijchu. Llullashpa huillajcunatapish ama c'uyanguichijchu. Ñucaca, tucui cai millai ruranacunatami p'iñani” ninmi Mandaj Diosca.

18Tucuita Mandaj Diosca, ñucataca cashnapishmi nirca:

19“Tucuita Mandaj Dios ñucaca, cashnami nini: Judá llajtapi causajcunapajca chuscu quillapi, pichca quillapi, canchis quillapi, chunga quillapi ayunanaca jatun micuita rurashpa cushicuna punllacunami tucunga. Shinallataj jatun fiestata rurashpa micuna punllapishmi tucunga. Shina cajpica cancunaca cashcata ruranatapish, sumajta causanatapish c'uyashpa causaichijlla ninimi” nircami.

20Tucuita Mandaj Diosca cashnapishmi nin: “Achca pueblocunamantami shamungacuna.

21Shujtaj pueblocunapi causajcunaca, caishuj pueblopi causajcunapajmanmi ringacuna. Paicunaca: Jacuchij, Mandaj Diosta mañashunchij. Jacuchij, tucuita Mandaj Diosta mashcashunchij ningacunami. Shina nijpimi caishujcunapish: Ñucanchijpish cancunahuan rishun nipanchijmi ningacuna.

22Achca llajtacunamantami c'ari c'ari runacunapish, tucuita Mandaj Diosta Jerusalenpi mashcanaman shamungacuna. Shinallataj Mandaj Diostaca, allita rurachun mañanamanmi shamungacuna” ninmi.

23Tucuita Mandaj Diosca cashnapishmi nin: “Chai punllacunapica cashnami tucunga: Tucui llajtacunamanta shujtaj shujtaj rimaita rimaj chunga runacunami Judá llajtapi causaj runapaj churanapi charirashpa: Ñucanchijpish cancunahuan rishun nipanchijmi ningacuna” nircami.