JOB 1 - Quichua Chimborazo Bible

Jobta llaquicuna japishcamanta

1Uz llajtapimi Job shuti runa causarca. Paica, ima pandata mana ruraj, allita ruraj, Diostapish manchaj, millaita ruranatapish p'iñajmi carca.

2Paica, canchis churicunata, quimsa ushushicunatami charirca.

3Paipaj haciendapica, 7.000 ovejacunatapish, 3.000 camellocunatapish, 500 yunta huagracunatapish, 500 burrocunatapish, cullqui jahua servijcunatapishmi yallitaj achcata charirca. Inti llujshin ladopi causajcunapuramantaca, paillami yallitaj charij carca.

4Paipaj churicunapish, paicuna huacharishca punllacunata pajtachishpaca, quiquin huasicunapimi jatun micuita charijcuna carca. Paicunapaj quimsa panicunatapish paicunahuan micuchun, ubyachunmi cayanaman cachajcuna carca.

5Chai jatun micui punllacuna tucurishca q'uipami Jobca paipaj tucui huahuacunapaj juchacunata anchuchichun utcata jatarishpa, Diosman animalcunata cushpa huañuchishpa tucuita rupachij carca. Jobca, ñuca huahuacunaca imapi juchallircallapishchari, Diostapish p'iñashpa paicunapaj shungupi c'amircacunallapishchari yuyashpami, fiesta tucurishca q'uipaca chashna ruraj carca.

6Shuj punllami, Mandaj Diospaj churicuna pai Diospaj ñaupajpi ricurinaman shamujpica, Satanaspish paicunahuan shamurca.

7Chaipimi Mandaj Diosca Satanastaca cashna tapurca:

–¿Maimantataj shamungui?– nijpi Satanasca, Mandaj Diosmanca:

–Allpa pachata ricushpa muyushpami shamuni– nishpa cutichirca.

8Chashna nijpimi Mandaj Diosca, Satanastaca:

–Allpa pachapica ñucata servij Job shinaca pi shujtaj mana tiyanchu. Paica ima pandata mana ruraj, allita ruraj, ñucatapish manchaj, millaita ruranatapish p'iñajmi– nircami.

9Shina nijpimi Satanasca, Mandaj Diostaca cashna nirca:

–Chai Jobca, can Diostaca mana yangamanta manchanchu.

10¿Manachu canllataj paitapish, paipaj familiacunandij, tucui imalla charishcacunatapish ama tuparichunllapish nishpa jarcaracungui? Paipaj maquihuan imata rurajpipish achcatamari bendiciangui. Chaimantami paipaj charinacunaca, allpapica yallitaj mirarishca.

11Shina cajpipish cunanca cambaj maquita chutashpa pai imalla charishcacunata quichuiri, manachu cantaca ñahui ñahui millai shimihuan c'amin imami, ricungui– nircami.

12Shina nijpimi Mandaj Diosca, Satanastaca cashna nirca:

–Riqui, pai imalla charishcacunaca cambaj maquipimi, ashtahuanpish paillata ama cambaj maquihuan tuparingui– nijpi Satanasca, Mandaj Diospaj ñaupajmanta llujshishpa rircallami.

13Shuj punlla Jobpaj churicunapish, ushushicunapish paicunapaj punta huauquipaj huasipimi micucurcacuna, vinotapish ubyacurcacuna.

14Paicuna chaipi cajpimi, shuj runaca Jobpajman chayamushpaca, cashna nishpa huillarca:

–Ñucanchijca, huagracunahuanca yapucurcanchijmi. Chai yapucun c'uchullapitajmi, burrocunatapish michicurcacuna.

15Chaimantaca ñapish sabeocuna shamushpaca, animalcunatapish quichushpa, cullqui jahua canta servijcunatapish espadahuan huañuchishpami rincuna. Chaita canman huillangapajca, ñucallamari quishpirimuni– nishpami huillarca.

16Chai runa manaraj tucui huillajpimi, shujtaj runa chayamushpaca cashna nirca:

–Taita Diospaj ninami jahua pachamanta urmashpa ovejacunatapish, michijcunatapish tucui rupachin. Chaita huillangapajca ñucallamari quishpirimuni– nishpami huillarca.

17Chai runa manaraj tucui huillajpimi, shujtaj runa chayashpaca cashna nirca:

–Quimsa mirga caldeocuna chayashpami, camellocunata aisashpa rincuna, cullqui jahua canta servijcunatapish espadahuanmi huañuchincuna. Chaita huillangapajca, ñucallamari quishpirimuni– nishpami huillarca.

18Chai runa manaraj tucui huillajpimi, shujtaj runa chayashpaca cashna nirca:

–Cambaj churicunapish, ushushicunapish paicunapaj punta huauquipaj huasipimi micucurcacuna, vinotapish ubyacurcacuna.

19Chaimantaca ñapish shitashca pambamanta jatun acapana shamushpa, huasi esquinacunapi huajtarishpa cuyuchijpimi, cambaj churicunataca huasi llapishpa huañuchirca. Chaita huillangapajca, ñucallamari quishpirimuni– nishpami huillarca.

20Chaimantaca Jobca jatarishpami, paipaj churanatapish lliquirishpa, uma ajchatapish rasparishpa, pambapi cungurishpa Diosta adorashpa,

21cashna nirca:

–Ñuca mamapaj huijsamantaca lluchullatajmi huacharircani, lluchullatajmi allpamanca tigrana cani. Mandaj Diosllatajmi curca, Mandaj Diosllatajmi quichun. Mandaj Diosca alli nishca cachun– nircami.

22Chai tucui llaquicuna shamujpipish, juchata mana rurarcachu, Mandaj Diostapish ima millaita mana rimarcachu.