DEUTERONOMIO 4 - Quichua Chimborazo Bible

Taita Diosta cazunamanta Moisés cunashcami

1Cunanca tucui israelcuna caita uyaichij: Chaitataj pajtachichun nishcacunata, pajtachinguitaj nishcacunataca cancuna chaitataj pajtachishpa causachunmi yachachircani. Cunanca cancunapaj ñaupa yayacunaman Mandaj Dios cushca llajtaman ña yaicushpaca chashna pajtachishpallami chaipica causanguichij.

2Ñuca mandashca shimicunataca ama mirachinguichijchu, ama anchuchinguichijchu. Chaicunataca Mandaj Dios cancunapaj Taita Dios cancunaman mandachun ñucaman cushca cashcamanta chaitataj pajtachichunmi mandani.

3Baal-peor diosmanta Mandaj Dios imata rurajtaca cancunapaj ñahuihuantajmi ricurcanguichij. Baal-peor diosta catijcunataca tucuicunatami, Mandaj Dios cancunapaj Taita Diosca cancunapaj chaupimantaca tucuita chingachirca.

4Ashtahuanpish Mandaj Dios cancunapaj Taita Diosta catijcunaca tucuicunami cunancama causacunguichij.

5Riquichij, ñucaca chaitataj pajtachichun nishcacunata, pajtachinguitaj nishcacunata Mandaj Dios ñuca Taita Dios mandashca shinallatajmi cancunamanca yachachircani. Chaitaca cunan cancunapaj cachun japigrin llajtaman yaicushpa pajtachishpa causachunmi yachachircani.

6Chai yachachishcacunataca huaquichishpa, chai yuyailla tucushpa pajtachinguichij. Chaicunami shujtajcunapaj ñaupajpica cancuna yachai sapa cashcata, yuyaisapa cashcata ricuchinga. Cai mandashcacunamanta yachachishcata uyashpaca: Cai runacunatajca yachaisapa, yuyai sapa jatun llajta gentecunamari ningacunami.

7¿Maijan jatun llajtacunataj paicunapaj c'uchullapi charin dioscunataca, Mandaj Dios ñucanchij Taita Diosta charishca shina mañashcata uyaj diostaca charincunari?

8Chaitataj pajtachichun nishcacunata, ima shina cashcatataj ricushpa ricuchichun mandashcacunata cunan ñuca cancunaman cushca shinataca maijan shujtaj jatun llajtapish mana charinchu.

9Chaimanta cancuna cancunapaj ñahuihuan imallata ricushcata tucui cancunapaj causaipi ama cungaringapaj, chaicunamanta ama anchuringapajca cancunapaj shungupi yuyaipi huaquichinguichij. Ashtahuanpish chaicunataca cancunapaj huahuacunaman, cancunapaj huahuacunapaj huahuacunamanpish yachachinguichij.

Horeb urcupi israelcunahuan Taita Dios pai quiquintaj rimashcami

10Cancunata Mandaj Dios Horeb urcu c'uchupi cajpi, cancuna paipaj ñaupajpi cashca punllata chaipi ima nishcata yuyarichigari. Chaipica ñucataca: Tucui cai pachapi causashca punllacunacama ñucata manchanata yachachun ñucataj rimashpa yachachingapaj tucuicunata tandachi. Chaitaca paicunapaj huahuacunamanpish yachachichuncuna nircami.

11Chaipimi, cancunaca chai urcu chaquiman c'uchuyashpa shayarircanguichij. Chai urcuca chaupi jahua pachacama nina lunyashpami, yana cushni llujshishpa amsayashpa rupacurca.

12Mandaj Diosca chai nina rupacuj chaupimantami cancunata rimarca. Cancunaca pai rimashcata uyashpapish, pai ima shina cashcataca mana ricurcanguichijchu.

13Mandaj Diosca imallata ari ninacunataca chaipimi cancunaman huillarca. Chunga mandashcacunata chai yuyailla tucushpa pajtachichunmi mandarca. Chaitaca tablajlla ishqui rumipi quillcashpami curca.

14Cancunapaj cachun japigricun llajtaman chayashpa ima shinalla cana cashcata, imallata pajtachina cashcata chai yuyailla tucushpa pajtachichunmi cancunata yachachichun ñucatapish mandarca.

Rurashcalla dioscunata ama yuyaringuichijchu nishcami

15Mandaj Dios nina chaupimanta cancunahuan rimai punllaca, rimashcata uyashpapish pai ima shina cashcataca mana ricurcanguichijchu. Chaimanta cancunaca alli yuyaihuan canguichij.

16Ñataj cancunaca labrashpa rurashca imaman rijchajtapish, shujtaj imaman rijchajtapish c'ariman, huarmiman rijchajcunatapish rurashpa pandaringuichijman.

17Cai pachapi tiyaj ima animalman rijchajtapish, jahua huairata purij ima animalman rijchajtapish,

18pambata llucashpa purij ima animalman rijchajtapish, yacupi tiyaj maijan chalhuaman rijchajtapish pajta ruranguichijman.

19Jahua pachata huichilla ricushpapish intita, lunata, luzerocunata, tucui ima tiyajcunatapish ñataj paicunata cungurina yuyaita japishpa paicunapajta ruranguichijman. Chaicunataca Mandaj Dios cancunapaj Taita Diosmi tucui cai pachapi causajcunapaj rurarca.

20Egiptomantaca fierrota yacuyachina hornomanta shina japishpami Mandaj Diosca cancunataca llujshichimurca. Cunan punlla ima shinami paipajlla canguichij, chai shinallataj cachunmi cancunataca llujshichimurca.

21“Mandaj Diosca cancunapaj juchamanta ñucahuan p'iñarishpami, ñucataca Jordán yacutaca ña manataj ch'imbanguichu, Mandaj Dios cancunapaj Taita Dios cambaj cachun cushca alli allpamanca manataj yaicunguichu” nirca.

22Chaimanta ñucaca cai llajtapimi huañugrini. Jordán yacutaca mana ch'imbagrinichu. Ashtahuanpish cancunaca ch'imbanguichijmi, chai alli allpatapish cancunapaj cachun japinguichijmi.

23Mandaj Dios cancunapaj Taita Dioshuan cancunahuan imallata ari ninacushcataca amataj cungaringuichijchu. Labrashpa imaman rijchajcunata Mandaj Dios cancunapaj Taita Dios amataj ruranguichij nishcataca ñataj ruranguichijman.

24Mandaj Dios cancunapaj Taita Diosca rupachishpa tucuchij ninami. Paipajlla cachun munaj Taita Diosmi.

25Cancuna ña chai llajtapi cashpaca huahuacunayuj, nietocunayuj, yuyajcuna tucushpaca ñataj maquihuan rurashca dios nishcacunata, imamanpish rijchajcunata rurashpa millaita ruranguichijman. Millaita rurashpaca Mandaj Dios cancunapaj Taita Diospaj ñahuipica paita p'iñachishpa millaita rurashcami canga.

26Cancuna chashna rurajpi ima tucuna cashcataca jahua pachapish, cai pachapish ricucunpimi cashna nini: Jordán yacuta ch'imbashpa cancunapaj cachun japishca allpamantaca utcami chingaringuichij. Cancuna mana cazushcamantami chai llajtapica mana uni punllacunata causanguichij.

27Mandaj Diosllataj cancunataca shujtaj llajtacunaman urata janajta cachajpimi urata janajta rishpaca chaicunapica ashacunalla saquiringuichij.

28Chai llajtacunapimi cancunaca caspimanta, rumimanta runacuna rurashca mana ricuj, mana uyaj, mana micuj, mana mutquij dioscunapajta ruranguichij.

29Chai llajtacunapi cashpapish cancunata Mandaj Diosta tucui shunguhuan, tucui yuyaihuan mashcashpaca japinguichijmi.

30Chai llaquicuna japijpi, chai llaquicunahuan cai punllacunami Mandaj Dios cancunapaj Taita Diosman cutirishpa pai rimashcata uyanguichij.

31Mandaj Dios cancunapaj Taita Diosca llaquij Taita Diosmi. Paica mana saquingachu, mana chingachingachu. Cancunapaj ñaupa yayacunahuan ari ninacushcatapish manataj cungaringachu.

32Ñaupa cancuna manaraj tiyajpi Dios runata rurashpa cai pachapi churashca pachamanta cai pacha shuj ladomanta caishuj ladocama maipi chashna rurashcata, chashna tucushcata pi uyashcachu imamí chaita tapui.

33¿Shujtaj llajtapi causajcunaca nina rupacuj chaupimanta Taita Dios rimashcata cancuna shina uyashpapish mana huañujcuna tiyanchu?

34Maijan diostaj shuj llajtapaj chaupimanta shuj llajtata paipajlla cachun llaquicunahuan, ricuchinacunahuan, milagrocunahuan, jatun macanacuicunahuan paipaj tucuita rurai tucuj maquihuan, paipaj rigra chutashcahuan mancharinacunata rurashcahuan llujshichinata yuyarishcari. Mandaj Dios cancunapaj Taita Diosmi Egiptomantaca cancunapaj ñaupajpi tucui chaicunata rurashpa cancunataca llujshichimurca.

35Mandaj Diosca Diostaj cashcata, pi shujtaj pai shinaca mana tiyashcata yachachunmi tucui chaicunataca canpi ricuchirca.

36Taita Diosca cancunata yachachingapajmi jahua pachamanta pai rimashcata uyachirca. Cai pachapica paipaj jatun ninatami ricuchirca. Nina chaupimanta rimashcatami uyarcanguichij.

37Paica cancunapaj ñaupa yayacunata c'uyashcamantami paicunapaj q'uipa huahua huahuacunataca agllarca. Paimi Egiptomantaca, pai quiquintaj tucuita rurai tucuj cashcahuan llujshichimurca.

38Cancunapaj ñaupajmanta jatun llajtacunata, cancunata yalli c'ari c'aricunata llujshichishpa cachashpa cancunapaj cachun cushca allpaman cancunata pushangapajmi chashna rurarca. Ñami cunanca chashna tucucun.

39“Cunanca chaita alli yachashpa cancunapaj shungupi alli yuyaringuichij. Jahua pachapipish, cai pachapipish Taita Diosca Mandaj Dios cashcata yuyaringuichij. Pi shujtajca mana tiyanchu.

40Pai chaitataj pajtachichun nishcacunata, pai mandashcacunataca cancuna pajtachichuntajmi mandashpa cuni. Chaimanta huiñaicama Mandaj Dios cancunapaj Taita Dios cancunaman cushca llajtapi cashpa canpish cambaj huahua huahuacunapish alli cangapaj, uni huatacunata chai llajtapi causangapajmi chai mandashcacunataca pajtachina canguichij” nircami.

Jordán yacumanta inti llujshin ladoman miticuna pueblocunata rurashcami

41Chaipimi Moisesca, Jordán yacumanta inti llujshin ladoman caj llajtacunapica quimsa pueblocunata ch'icanchirca.

42Mana huañuchina yuyaihuan cashpapish maijanta huañuchishpa miticunapajmi ch'icanchirca. Ñaupamanca imapi nunca mana p'iñanacushca cashca cashpapish cungaillapi huañuchishca cashpaca chai pueblocunapi miticushpami paicunapaj causaita quishpichina carca.

43Chai pueblocunaca caicunami: Shitashca pambapi caj pugru pambapica Beser pueblotami rubenitacunapaj ch'icanchirca. Galaadpi caj Ramot pueblotaca gaditacunapajmi ch'icanchirca. Basanpi caj Golán pueblotaca manasescunapajmi ch'icanchirca.

Taita Dios mandashcacunata Moisés cutin yuyachishcami

44Cai mandashcatami Moisesca israelcunaman yachachirca.

45Egiptomanta israelcuna ña llujshimujpi ima shina causanata, chaitataj pajtachichun nishcacunata, pajtachinguitaj nishcacunata Moisés paicunaman yachachishcaca tucui caicunami.

46Moisesca Jordán yacumantaca, inti llujshin ladopi caj Bet-peor pueblo ch'imbanij pugru pambapi cashpami caitaca yachachirca. Chai puebloca Hesbonpi causaj amorreocunata jatun mandaj Sehonpaj llajtapimi carca. Paitami Moisesca israelcunahuan Egiptomanta llujshichimucushpa macanacushpa misharca.

47Israelcunaca jatun mandaj Sehonpaj llajtatapish, Basanta jatun mandaj Ogpaj llajtatapishmi japircacuna. Jordán yacumanta inti llujshin ladoman caj amorreocunata ishqui jatun mandajcunapaj llajtacunami carca.

48Chai llajtacunaca Arnón yacu huaicu c'uchupi caj Aroer llajtamantaca Hermón nishca Sión urcucamami carca.

49Jordán yacumanta inti llujshin ladoman caj tucui Arabá llajtandij, Pisga urcu chaquipi caj Arabá cuchacamami carca.