ISAÍAS 13 - Quichua Chimborazo Bible

Babilonia llajtata Dios llaquichinata huillashcami

1Babiloniata llaquichinataca Amozpaj churi Isaiasman muscuipi shina ricuchishcami.

2“Lluchu urcu jahuapi banderata shayachichij.

Jatun mandajcuna yaicuna punguta soldadocuna yaicuchun maquita cuyuchishpa caparichij.

3Babiloniata llaquichingapajca ñuca agllashcacunatami cacharcani.

Ñuca p'iñarishcahuan macanacujcunatapishmi cayarcani.

Paicunaca ñuca jatun cashcahuan cushicujcunami.

4Achcacuna urcupi bullacujmi uyarin.

Achca gentecuna caparinacushcami uyarin.

Llajtacuna yallitaj bullashcami uyarin.

Tandanacushca llajtacuna caparinacushcami uyarin.

Macanacunapaj caj soldadocunataca tucuita Mandaj Diosmi yupashpa ricucun.

5Caru llajtamanta soldadocunamari shamun.

Cielo callarimantamari shamucun.

Mandaj Diosca pai p'iñarishpa llaquichina caspihuanmi shamucun.

Tucui cai pachata chingachingapajmari shamucun.

6Caparirishpa huacaichigari.

Mandaj Dios llaquichina punllaca ñamari c'uchullapi.

Tucuita Rurai Tucuj Diosca chingachingapajmi shamunga.

7Chashna llaquichicujpica tucuicunapaj maquicunami imata mana rurai tucuj saquiringa.

Tucuicunapaj shungucunami manchaihuan cangacuna.

8Yallitaj manchai, yallitaj llaqui, yallitaj nanaicunami paicunataca llapinga.

Huachana nanaihuan caj huarmi torcericuj shinami tucungacuna.

Paicunahuan cajcunata caishuj chaishuj ñahuita ricunacushpaca tucuicunami jatunta mancharingacuna.

Paicunapaj ñahuicunaca nina lunyacuj shinami cangacuna.

9Mandaj Dios llaquichina punllaca ñamari shamucun.

Chaipica:

Mandaj Diosca nina sindirij shina yallitaj p'iñarishpa llaquichijni shitajpica yallitaj mancharinami canga.

Allpataca shitashca pambatami saquinga.

Allpapi causacuj juchayujcunataca tucuita chingachingapajmi chashna shamucun.

10Chashna llaqui cajpica jahua pacha uchilla luzerocunapish, uchilla luzerocunamanta achijyachicuj jatun luzerocunapish mana achijyachingachu.

Intipish pacarijpi llujshicushca manaraj unipimi amsayanga.

Lunapish lamyachina illajllami canga.

11Cai pachapi causajcunataca, millaita rurashcamantami llaquichigrini.

Ñucata mana rijsijcunataca paicuna millaita rurashcamantami llaquichigrini.

Jatun tucushcacuna jatun tucunataca tucuchigrinimi.

Mana mitsari tucuipajcunata jatun tucushpa llaquichijcunataca cumurichigrinimi.

12Gentecunataca Ofir curita shina yalli ashallatami saquisha.

Gentecunaca caipi chaipi ashacunallami causangacuna.

13Jahua pachacunataca chujchuchishami.

Allpa pachapish pai maipi cashcamantaca anchungami.

Tucuita Mandaj Dios nina sindirij shina jatunta llaquichicui punllapica pai p'iñarishpa llaquichijni shitajpimi chashna canga.

14Chai punllapica caticujpi taruga callpacuj shina, michij illajlla oveja caita chaita rij shinami canga.

Cada quiquinmi quiquin llajtata chaparashca tigrangacuna.

Cada quiquinmi quiquin allpaman miticushpa callpangacuna.

15Maijanpish japi tucujtaca lanzahuan pasajta satishcami canga.

Paicunamanta maijan prezu japi tucushpaca espadahuan huañuchishcami canga.

16Paicunapaj huahuacunatapish paicunapaj ñaupajpimi pambapi huajtangacuna.

Paicunapaj huasicunamantapish tucuitami llujshichishpa apangacuna.

Paicunapaj huarmicunatapish paicuna ricucujpimi japiringacuna.

17Paicunata llaquichichunca, medocunatami rijchachigrini.

Paicunaca cullquitapish, curitapish mana munajcuna cajpipish chashna rurana yuyaitami cusha.

18Q'uipa huiñaicunatapish paicunapaj arcocunahuanmi urmachingacuna.

Cunanlla huacharishca huahuacunatapish mana llaquingacunachu.

Paicunapaj ñahuipi ricurijtaca huahuacuna cachunpish manataj saquingachu.

19Babiloniaca muyundij llajtacunapajca sumaj achij nicujmi.

Caldeocuna c'ari c'ari jatun tucuna llajtami.

Shina cashpapish Dios llaquichijpica Sodoma, Gomorra shina chushajmi saquiringa.

20Chaipica pi ña manataj causangachu.

Huahua huahua huashan huashan chaipi causajcunaca ña mana tiyangachu.

Arabecunapish, ña mana chaipi carpa huasita shayachingacunachu.

Michijcunapish paicunapaj animalcunataca chai llajta corralcunapica ña mana churaj shamungachu.

21Ashtahuanpish shitashca pambapi causaj manchanana animalcunallami chaipica dorminga.

Paicunapaj huasicunapipish chushijcunallami jundanga.

Chaipica avestruzcunallami causanga.

Sacha chivocunallami chaipica saltacungacuna.

22Paicunapaj mandana huasicunapipish, hiena nishca animalcunallami huacaricungacuna.

Paicuna jatunta cushicuna huasicunapica chacal nishca animalcunallami huacaricungacuna.

Babilonia chashna tucunaca ña caillapimi, ña mana uni huatacuna illanchu” nishpami huillachirca.