HECHOS 17 - Quichua Chimborazo Bible

Tesalonicapi caparinacushcami

1Pabloca Silasndijmi Anfípolis pueblota, Apolonia pueblota rishpa, Tesalonicaman chayarcacuna. Chaipica, judiocunapaj sinagogapish tiyarcami.

2Pabloca maiman chayashpapish sinagogaman yaicuj cashpami chaipipish yaicurca. Chaipimi quimsa semanata samana punllacunapi, chaipi cajcunahuan parlanacushpaca,

3Taita Diospaj Shimi ima nicushcata paicunaman huillashpa:

–Cristoca llaquita apashpa, huañushcacunapaj chaupimanta causarinatajmi carca. Cunan cancunaman huillacushca Jesusca paitajmari Quishpichij Cristoca– nishpami alli entendichirca.

4Chaimi tauca judiocuna crishpa Pablohuan, Silashuan tandanacurcacuna. Judío tucushpa Taita Dios yuyailla caj achca griegocunapish, alli nishca huarmicunapish achcacunami crircacuna.

5Chaimantami mana crij judiocunaca yallitaj p'iñarishpa q'uilla, millai maijan runacunata tandachishpa, caparichun jatarichircacuna. Chaimi Pablota, Silasta japishpa tucuicunapaj ñaupajman pushashun nishpa, Jasonpaj huasipi mashcangapaj huaicashpa yaicurcacuna.

6Chaipi Pablota Silasta mana japishpaca, Jasontami shujtaj crijcunandij japishpa chai pueblopi mandajcunapaj ñaupajman cashna caparinacushpa pushamurcacuna: “Cai runacunaca tucui cai pachapimari, umashpa puricuncuna. Chaipajmari caimanpish shamushca.

7Cai Jasonpish, paipaj huasipimi paicunataca chasquij cashca. Tucui paicunami César mandashcataca yanganchishpa: Ñucanchijpajca, shujtaj jatun mandajmi tiyan, paica Jesusmi nincuna” nircacunami.

8Chaita uyashpaca, tucui chaipi cajcunapish, mandajcunapish jatun bullatami rurarcacuna.

9Jasonpish paihuan cajcunapish paicunapaj randi cullquita saquijpica cacharircallacunami.

Pablopish Silaspish Berea pueblopi cashcami

10Chai tutallatajmi crijcunaca Pablotapish Silastapish Berea puebloman cacharcacuna. Paicuna chaiman chayashpaca, judiocunapaj sinagogamanmi yaicurcacuna.

11Bereapi causajcunaca Tesalonicapi causajcunata yalli ashtahuan alli yuyaiyujcunami carca. Chashna cashpami paicuna huillashcata alli uyashpa chashna cashcata mana chashna cashcata yachangapaj Taita Dios Quillcachishcacunataca punllanta alli ricujcuna carca.

12Chashna cashpami achca judiocunapish, griegocunapuramanta alli nishca huarmicunapish, achca c'aricunapish crircacuna.

13Tesalonicapi caj judiocunaca, Bereapipish Taita Diospaj Shimita Pablo huillacujta yachashpami chaiman rircacuna. Chaipipish achcacunatami jatarichircacuna.

14Chaimantami chai crijcunaca, Pablotaca mama cucha uriman utca cacharcacuna. Silashuan, Timoteohuanca chaillapitajmi saquirircacuna.

15Pablota saquinaman cachashcacunaca, Atenas pueblomanmi pusharcacuna. Paita saquishpa tigragrijpica:

–Timoteotapish Silastapish utca caiman tandanacungapaj shamupaichij ninmi ninguichij– nishpami Pabloca cacharca.

Atenas pueblopi Pablo cashcami

16Pabloca Atenaspi Timoteota, Silasta shuyacushpaca, chai puebloca rurashcalla dioscunahuan junda cashcata ricushpami paipaj shungupica yallitaj llaquirirca.

17Chaimi sinagogapica judiocunahuan, judío tucushpa Taita Diosta yuyarijcunahuan rimanacurcacuna. Plazaman shamujcunahuanpish punllantami parlanacurcacuna.

18Epicúreos nishca, estoicos nishca maijan jatun yachajcunapishmi Pablohuan rimanacungapaj tandanacurcacuna. Pabloca paicunamanca Jesusmanta alli huillaitapish, huañushcacuna causarinamantapishmi huillarca. Chaimi paicunapuramanta maijancunaca:

–Cai rimaricujlla runaca chashna nishpaca ¿imatashi nisha nin?– nircacuna.

Shinallataj maijancunaca:

–Paica mushuj dioscunamanta yachachijmari yuyachin– nircacunami.

19Chaimantami Pablotaca tucuicuna tandanacuna Areópago jatun huasiman pushashpa cashna nircacuna:

–¿Can yachachicushca mushuj yachaitaca ñucanchijpish yachai tucunchijchu?

20Can yachachishcacunaca ñucanchij manaraj uyashcamari. Chaimi ñucanchijca can yachachishcacuna imata nisha nishcata yachashun ninchij– nircacuna.

21(Atenaspi tucui causajcunapish, shamushpalla chaipi causajcunapish imapish manaraj uyashcata parlana yuyailla, manaraj uyashcata uyana yuyaillami causarcacuna).

22Chaimi Pabloca, Areopagopi caj tandanacushcacunapaj chaupipi shayarishpaca:

–Atenas runacunalla. Cancunaca dioscunata alli yuyarijcuna cashcatami maipipish ricuni.

23Cancunapaj pueblota puricushpaca cancunapaj dioscunata adorana altarcunatami ricurcani. Chai dioscunapaj pircashca altarcunapaj shuj altarpica: “Mana rijsishca Diospaj” nishpa quillcashcatami ricurcani. Chaitaca mana rijsishpapish adoracunguichijmi. Ñucapish chai Taita Diosmantami cancunamanca huillacuni.

24“Taita Diosca cai pachata, chaipi tucui imalla tiyajcunatapish rurajmi. Jahua pachatapish, cai pachatapish rurajmi. Mandaj Diosca maitataj gentecunapaj maquihuan rurashca huasicunapica causangari.

25Paica causaitapish, samaitapish tucui imatapish cuj Taita Diosmi. Chaimanta gentecuna paita alli nishpa ima cushcacunallahuanca mana cushicunchu.

26Taita Diosca tucui cai pachapi mirarishpa causachunpish shuj runallatami churarca. Taita Diosllatajmi llajtacunapish maillata canata, maillapi causanatapish mandarca.

27Causacushparaj Taita Diosta mashcashpa ima shinapish paihuan tupachun nishpami chashna rurarca. Chashna mashcana cajpipish Taita Diosca ñucanchijmantaca mana carupichu.

28Ñucanchijca Taita Dios causaita cujpimi causanchij, purinchij, paillamantatajmi tiyanchij. Chaimantami cancunapuramanta sumaj shimicunata rimajcunapish: “Taita Diosmanta miramushcacunami canchij” nincuna.

29Taita Diosmanta miramushcacuna cashpaca, Taita Diostaca curita, cullquita, rumita labrashpa gentecunapaj yuyaillamanta rurashca dios shina cana cashcataca mana yuyanachu canchij.

30Ñaupa causajcunaca Taita Diosta mana rijsishcamanta paicunapaj munaita rurashpa causajpipish Taita Diosca paicunataca mana llaquichircachu. Cunanca tucuicunallataj maipi causajcuna cashpapish juchayuj cashcamanta llaquirishpa paiman cutirichunmi mandan.

31Taita Diosca tucui cai pachapi causajcunata paicuna ima shina cashcatataj ricuchingapajca ñami shuj punllata agllashcata charin. Tucui chaicunata rurashpa ricuchij cachunca pai agllashca runatami huañushcacunapaj chaupimanta causachishpa ricuchirca” nircami.

32Huañushcacunapaj chaupimanta causarina nijta uyashpaca maijancunaca achcatami asircacuna. Maijancunaca: “Shujtaj punllami can huillashcataca uyashun” nircacunami.

33Chaimi Pabloca, paicunapaj chaupimanta rircalla.

34Shina cajpipish Pablo huillashcata uyashpa crishpami maijancunaca paihuan tandanacurcacuna. Chai crijcunapurapica, Areopagopi tandanacuj mandajcunapuramanta Dionisio shuti runapishmi carca. Shinallataj Dámaris shuti shuj huarmipish, shujtajcunapishmi carcacuna.