EZEQUIEL 26 - Quichua Chimborazo Bible

Tiro pueblota llaquichinamanta

1Chunga shuj huata callari quillapaj punta punllapimi, Mandaj Diosca ñucamanca cashna nirca:

2“Huañujlla aichayuj runalla, Tiro puebloca Jerusalén llaqui tucushcata ricushpaca: Llajtacunapaj punguca p'aquirishcamari, paica ñucapajmanmi tigramunga. Ñucaca jundami casha, ashtahuanpish paica shitashcami saquiringa. Chaitajca allimari nishpami cushicurcacuna.

3Chaimantami Mandaj Jatun Diostaj cashna nini: Tiro pueblolla, canhuanca ñucaca yallitaj p'iñarishcami cani. Ima shinami mama cucha yacu jahuata jatarin, chai shinallatajmi canta llaquichichunca, ñuca p'iñarishpa achca llajtacunata huichiyachisha.

4Tiro pueblopi tiyaj patacunatapish urmachingacunami, torrecunatapish pambamanmi shitangacuna. Paimantaca ñutu allpacamami p'ichasha. Paitaca lluchu rumillatami saquisha.

5Mama cucha chaupipi cajpipish, linchicunata chaquichina pambatami rurasha. Mandaj Jatun Diostajmi chashna nini. Shujtaj llajtacunamanta shamujcunami chaipi causajcunatapish, imalla tiyajcunatapish quichushpa apangacuna.

6Chagrapi caj paicunapaj ushushicunaca espadapimi huañungacuna. Chaita ricushpami ñucataca, Mandaj Diostaj cashcata yachangacuna” nircami.

7Mandaj Jatun Diosca cashnapishmi nin: “Tiro pueblota llaquichichunmi janaj ladomantaca, Babilonia llajtata jatun mandaj Nabucodonosorta pushamusha. Paica mandajcunatapish jatun mandajmi. Paica achca caballocunahuan, carretacunahuan, caballopi tiyarij soldadocunahuan, achca runacunahuanmi shamunga.

8Paicunami chagrapi caj cambaj ushushicunataca espadahuan huañuchingacuna. Canta llaquichingapajpish, torrecunatami muyundijta shayachingacuna. Baluartecunahuan, escudocunahuan shayarishpami macanacungacuna.

9Shinallataj cambaj muyundijta pircashca patacunatapish jatun caspicunahuanmi tujsishpa urmachingacuna, torrecunatapish hachacunahuanmi chingachingacuna.

10Paicunapaj caballocuna purishpa jatarichishca ñutu allpahuanmi taparingui. Llaquichishca puebloman t'unirishca patacunata yaicucuj shina, cai pueblopi tiyaj pungucunata caballocunapish, ruedacunapish, carretacunapish c'ulun nishpa yaicumujpica, cai pueblo muyundijta pircashca patacunapish chujchungami.

11Paicunapaj caballocunaca sillucunahuanmi tucui ñancunata sarushpa puringacuna. Chaipi tucui causajcunataca, espadahuanmi huañuchingacuna. Sinchita shayachishca patacunatapish pambamanmi urmachingacuna.

12Cancuna imalla charishcacunatapish shuhuangacunami, c'atacunatapish quichushpa apangacunami. Patacunatapish urmachingacunami, sumaj huasicunatapish chingachingacunami. Cancuna charishca rumicunatapish, caspicunatapish allpatapish yacupimi cachangacuna.

13Canpi caparishpa cantanacunatapish chingachishami, citaracunapi tocashcapish ña mana ashtahuan uyaringachu.

14Cantaca lluchu rumita shinami saquisha. Canca linchicunata tendina pambami tucungui. Mana cutinca shayachishcachu cangui. Mandaj Dios ñucatajmi chashna nini” nircami Mandaj Jatun Diosca.

15Tiro pueblotaca, Mandaj Jatun Diosca cashnami nin: “Mama cucha yacu uripi causajcunaca, can urmashcata uyashpapish, chugririshcacuna caparicujta uyashpapish, chaipi causajcunata huañuchicunmi nijta uyashpapish ¿manachu mancharinmancuna imashi?

16Chai jatun llaquita uyashpaca, mama cucha c'uchupi causajcunata jatun mandajcunaca paicuna mandashpa tiyacunmanta uriyashpami, jahuata churarishcatapish, bordashca churanacunatapish llujshichiringacuna. Llaquinayaj churanata churarishpami, allpa jahuapi tiyaringacuna. Can llaquinayaj tucushcata ricushpaca, cutin cutin mancharishpami chujchungacuna.

17Canmantaca yupashpa yupashpami, cashna huacangacuna: ¿Ima shinataj canca chingarircanguiyari? Canca mama cucha muyundij pueblocunapi causaj runacunahuan jundamari carcangui. Jatun nishca pueblomari carcangui, mama cucha muyundij pueblocunapuramantaca, canllamari c'ari c'ari tucushpa causarcangui. Cambaj c'uchulla pueblocunapi causajcunatapish, tucuicunatamari manchachishpa causaj carcangui ningacunami.

18Can urmai punllaca, mirga allpacunapish chujchungami. Can tucurijpica, mama cucha yacupi tiyaj mirga allpacunapish mancharingami” ninmi.

19Mandaj Jatun Diosca cashnapishmi nin: “Cantaca, pipish mana causaipaj llajtacunata shina shitashcatami saquisha. Cambajmanca manchanayaj yacutami cachasha. Chai yacumi cantaca tucui tapanga.

20Shinallataj pambana jutcuman uriyajcunahuanmi cantapish uriyachisha. Ñaupa huatacunamanta pambashcacunahuanmi pambashca cangui. Shitashca pambacunata ñaupa punllacunapi pambashca shinami cantapish allpa ucupi pambasha. Chashna rurashpa chingachijpimi, canpica pipish ña mana cutin causangacuna. Chashnata ricushpami, cai pachapi causajcunaca ñucataca, tucuita rurai tucuj cashcata yachangacuna.

21Cantaca jatun mancharinatami rurasha, ña mana canllatajchu saquiringui. Cantaca mashcangacunami, mashcashpapish manataj cutinca japingacunachu” nircami Mandaj Jatun Diosca.