MARCOS 9 - Quichua Chimborazo Bible

1Jesusca cashnapishmi nirca:

–Taita Dios tucuita rurai tucuj cashcahuan mandangapaj shamujta ricungacama, maijan caipi cajcunaca manaraj huañungacunachu. Chashnatajmi canga– nircami.

Jesús shujtajyarishcami(Mt 17.1-13; Lc 9.28-36)

2Sujta punlla q'uipami Jesusca, Pedrota, Jacobota, Juantapish paicunallata pushashpa shuj jatun urcuman rirca. Chaipimi Jesusca paicunapaj ñaupajpi shujtajyarirca.

3Paipaj churanacunapish rasu shina lamyacujmi tucurca. Cai pachapica chai shina yurajnicujtaca, pi mana tajshai tucunchu.

4Chaipica Eliaspish, Moisespish Jesushuan parlanacucujta ricushpami,

5Pedroca, Jesustaca:

–¡Yachachij, ñucanchij caipi canaca allimari cashca! Can munajpica quimsa chujllacunata rurashun: Shujtaca quiquinpaj, caishujtaca Moisespaj, chaishujtaca Eliaspaj– nirca.

6Tucuicuna manchaihuan cashcamantami, Pedroca imata rimacushcata mana yachashpa chashna nirca.

7Pedro chashna nicujpirajmi, paicunapaj jahuamanca p'uyu shamushpa taparca. Chai p'uyumantaca: “Caimi ñuca c'uyashca Churi, paita uyaichij” nishpa rimashca uyarijpi,

8paicuna muyundijta ricushpaca, pita mana ricurcacunachu. Ashtahuanpish Jesusllatami chaipi cajta ricurcacuna.

9Chai urcumanta uriyamucushpami Jesusca paihuan rij yachacujcunataca: “Cancuna ricushcataca, Runa Aichayuj huañushcacunapaj chaupimanta causaringacama, pajta piman huillanguichijman” nishpami mandarca.

10Chaimi paicuna ricushcataca paicunapaj shungullapi huaquichircacuna. “Huañushcacunapaj chaupimanta causarina” nishpaca ¿imatashi nisha nin? nishpa parlanacucushpami,

11Jesustaca:

–¿Ima nishpataj mandashcata quillcajcunaca, Eliasrajmi shamunga nincuna?– nishpa tapurcacuna.

12Chaimi Jesusca:

–Ari, chaica chashnami. Eliasraj punta shamushpami paica tucuita allichinga. Chashna cajpipish Quillcachishcapica: Runa Aichayujtaca mana ricunachishpami achcata llaquichishca canga ninmi.

13Ashtahuanpish cashnami nini: Eliasca ñami shamurca. Quillcachishcapi paimanta huillashca shinallatajmi, paicuna munashcata rurarcacuna– nircami.

Supai japishca huambrata Jesús alliyachishcami(Mt 17.14-21; Lc 9.37-43)

14Chaishuj yachacujcuna maipi cashcaman Jesús chayamushpaca, paicunapaj muyundijpica achcacuna cajta, mandashcacunata quillcajcunahuan yachacujcunahuan rimanacucujtapishmi ricurca.

15Chaipi cajcunaca Jesusta ricushcahuanmi achcata cushicushpa, callpashpa paipajman rishpaca, allillachu cangui nircacuna.

16Jesusca yachacujcunataca:

–¿Imatataj paicunahuanca rimanacucunguichij?– nijpimi,

17chaipi cajcunamanta shujca:

–Yachachij, ñuca churitami cambajman pushamurcani, paimari upayachij espirituta charin.

18Chai espiritumari maipipish chujchuchishpa pambaman urmachijpi shimiman puscuta shitashpa, quirucunatapish canirishpa chaquirishpa catinlla. Ñucaca cambaj yachacujcunatami, chai millai espirituta llujshichipaichij nircani. Ashtahuanpish mana llujshichi tucuncunachu– nijpimi,

19Jesusca:

–¡Huahua huahuami mana crijcuna canguichij! ¿Maicamataj cancunahuan causacushalla? ¿Maicamataj cancunataca yachachicushalla? Chai huambrata caiman pushamuichij– nirca.

20Ña pushamujpica chai espirituca Jesusta ricushpami, chai huambrataca manchanayajta chujchuchijpi pambaman urmashpa, chai huambraca singurishpa shimimanpish puscuta shitarca.

21Chaimi Jesusca chai huambrapaj yayataca:

–¿Ima horamantataj chashnaca tucun?– nijpi, yayaca:

–Huahuamanta pachami chashna.

22Huañuchingapajmi tauca cutin ninapi, yacupi urmachinlla. Quiquinca imallatapish rurai tucushpaca, ñucanchijta llaquishpa ayudahuayari– nijpimi,

23Jesusca:

–¿Canca cringuichu? Pipish crijpajca, tucui imapish jahuallami– nirca.

24Chashna nincami huambrapaj yayaca:

–Ari crinimi, tucui shunguhuan alli cringapaj ashtahuan crina yuyaita cuhuai– nishpa caparirca.

25Achcacuna jundarimujta ricushpami, Jesusca chai millai espiritutaca:

–Upa, mana uyaj espíritu paimanta llujshichunmi ñucaca mandani, ñataj cutinca paipi yaicunguiman– nishpami sinchita rimarca.

26Chai espirituca caparirishpa, huambrata maipish cachun chujchuchishpa llujshijpimi, huambraca huañushca shina saquirca. Chaimi achcacuna: “Huañunmari” ninacurcacuna.

27Ashtahuanpish Jesusca maquimanta japishpa jatarichijpica, chai huambraca shayarircallami.

28Huasiman Jesús yaicujpimi yachacujcunaca:

–¿Ima nishpataj ñucanchijca mana llujshichi tucurcanchij?– nishpa paillata tapujpi,

29Jesusca:

–Chai shina supaicunaca mana llujshinllachu. Taita Diosta mañashcahuan ayunashcahuanmi llujshincuna– nirca.

Jesusca pai huañuna cashcata cutin huillashcami(Mt 17.22-23; Lc 9.43-45)

30Chaimanta llujshishpaca Galileatami rircacuna. Jesusca pai chaipi cajtaca, pi ama yachanman yuyacurcami.

31Chaipimi paipaj yachacujcunamanca: –Runa Aichayujtaca gentecunapaj maquipi entregajpimi huañuchingacuna. Ashtahuanpish huañushcamanta quimsa punlla q'uipaca causaringallami– nishpami yachachirca.

32Chaitaca paicunaca imata nisha nishcata mana entendircacunachu. Tapunatapish mancharcacunami.

Jahua pachamanta mandacujpica ¿maijanshi jatun cashun? nishcami(Mt 18.1-5; Lc 9.46-48)

33Capernaumman Jesús chayashpaca, huasipi cashpami yachacujcunataca:

–¿Imatataj ñanpica cancunapuralla rimanacumunguichij?– nirca.

34Ashtahuanpish ñanpi paicunapuralla, maijanshi jatun cashun ninacushcamantami, paicunaca upalla saquirircacuna.

35Chaimi Jesusca tiyarishpa, chunga ishquicunata cayashpaca:

–Maijanpish puntapi casha nishpaca, yangalla tucushpami tucuicunapajta ruraj cana– nircami.

36Chaipica shuj huahuata japishpa paicunapaj chaupipi churashpa huahuata marcashpami:

37–Maijanpish cai huahua shina caj ñuca Shutipi shamujta chasquijca, ñucatami chasquin. Ñucata chasquijca mana ñucallatachu chasquin, ashtahuanpish ñucata cachajtapishmari chasquin– nirca.

Ñucanchijta mana p'iñajca ñucanchijpurallatajmi nishcami(Mt 10.42; Lc 9.49-50)

38Chaipimi Juanca:

–Yachachij, shuj runatami cambaj shutipi supaicunata llujshichicujta ricurcanchij. Paica mana ñucanchijpura cajpimi, ama chashna ruraichu nircanchij– nijpimi,

39Jesusca:

–Chashna rurajtaca ama jarcaichijchu. Maijanpish ñuca shutipi milagrota rurajca, chai q'uipaca ñucataca ima mana allita mana ni tucunchu.

40Maijanpish ñucanchijta mana p'iñajca, ñucanchijpurallatajmi.

41Cancunaca ñucapaj cashcamanta paicunaca Cristopajmi nishpa, vaso yacullatapish maijanpish cujmanca Taita Diosca pai japina cashcataca cungatajmi. Chashnatajmi canga.

Juchapi urmachinaca jatun llaquimi(Mt 18.6-9; Lc 17.1-2)

42Cai uchilla huahuacuna shina ñucata crij tucujpi pandachijtaca, maijan cajpipish cutana rumita cungapi huatashpa, mama cuchapi ucujta shitanami ashtahuan alli.

43Chaimanta cambaj maqui maipi urmachisha nijpica, p'itishpa shitangui. Ishqui maquindij huiñaita rupacuj ninapi shitashca canapaj randica, shuj maqui illajlla causaiman yaicunami ashtahuan alli.

44Ucu pachapica c'urucunapish mana huañunchu, ninapish rupacunllami.

45Cambaj chaqui maipi urmachisha nijpica, p'itingui. Ishqui chaquindij ucu pacha manataj huañuj ninapi shitashca canapaj randica, shuj chaqui illajlla causaiman yaicunami ashtahuan alli.

46Ucu pachapica c'urucunapish mana huañunchu, ninapish rupacunllami.

47Shinallataj cambaj ñahui maipi urmachisha nijpica, surcushpa shitangui. Ishqui ñahuindij ucu pachapi shitashca canapaj randica, Taita Dios mandacujpica shuj ñahui illajlla yaicunami ashtahuan alli.

48Ucu pachapica c'urucunapish mana huañunchu, ninapish rupacunllami.

49Tucuicunami alli cangapajca ninapi rupachishca shina llaquicunata apangacuna. Shinallataj Taita Diosman cushcata rupachinapish cachihuan churashcami canga.

50Cachica tucuipaj allimari. Ashtahuanpish cachi ña mana mishquichijpica ¿imahuanshi mishquichinguichijman? Cancunaca cachi shina mishquichijcuna caichij, caishuj chaishujhuan sumajta causaichij– nircami.