1Cai yuyachij shimicunaca Davidpaj churi, israelcunata jatun mandaj Salomón quillcashcami.
2Cai shimicunaca imapipish alli yachachishcata yachachun yuyaita pascajmi.
Alli yuyaiyujta ruraj yuyaicunata ricuchijmi.
3Alli yuyaiyuj cachun cunashcata
chasquishpa, cashcata ruraj canata,
alli yuyaiyuj tucunata, allita ruraj
canatapish yachachijmi.
4Shinallataj yachai illajcunata,
q'uipa huiñaicunatapish alli yuyaita
japishpa, alli yuyaihuan causanatami
yachachin.
5Yachaisapa runa caita uyashpaca,
ashtahuan yachajmi tucunga.
Yuyaisapa runapish cunashcata
chasquingami.
6Shinallataj yuyaita cuj shimicunata,
yachaisapacuna rimashcatapish, yuyaita
japina shimicunatapish, pi mana yachai
tucuipajcunatapish yachangacunami.
7Alli yachaj cangapaj callarica,
Mandaj Diosta manchanami.
Chashna cajpipish ch'ahuanyashcacunaca,
alli yachaita yachachishcatapish
p'iñancunami.
Alli yachaj cunashcami8Ñuca huahualla, alli causanata
cambaj yaya yachachishcataca alli
uyayari.
Cambaj mama yachachishcatapish ama
mana uyasha nichu.
9Chai shimicunaca sumaj coronata
cambaj umapi churachishca shinami
canga, sumaj huallcata cungapi
aparishca shinami canga.
10Ñuca huahualla, juchasapacuna
inquitajpipish, amataj uyanguichu.
11Cantaca cashnami ningacuna:
“Jacu ñucanchijhuan.
Pipish alli puricujta japishcahuan
huañuchingapaj chapashun.
12Seol shina causajta millpushunllami.
Jatun jutcupi huashicuchishca shinami
chingachishun.
13Paicunapaj tucui laya sumaj charinacunata
shuhuashpa, ñucanchij huasicunapi jundachishpa
achca charijcunami tucushun.
14Canpish alli charijmi tucungui,
ñucanchijhuan jaculla.
Ñucanchij japishcacunatapish tucuicuna
shujllapimi charishun” ningacunami.
15Chashna nijpipish ñuca huahualla,
paicunahuanca amataj tandanacunguichu.
Paicuna shina purinataca amataj
yuyanguichu.
16Paicunaca mana allita ruranamanca,
callpashpami rincuna.
Huañuchinamanpish utcami llujshirincuna.
17Pajarocunaca ricunallapi linchita
churajpica, mana yaicunchu.
18Ashtahuanpish chai runacunaca
paicunallataj huañunapajmi trampata
churancuna.
Paicunapaj llaquipajllatajmi linchita
churancuna.
19Utca charijyasha nijcunataca,
chaillataj causaita quichunllami.
Yachaica tucuicunatami cayacun20Alli yachaica ñancunapi purijcunata
caparicunmi.
Plaza pambacunapi tandanacujcunatapish
cayacunmi.
21Puebloman chayamujcunamanpish,
pueblopi jatun tandanacuicunapipish
tucuicunamanmi cashna caparishpa
paipaj yuyaicunataca huillacun:
22“Yachai illajcuna, ¿maicamataj yachai
illajllataj causashun ninguichij?
Chanzata rurajcuna, ¿maicamataj chanzata
rurashpa cushicunguichigari?
Ch'ahuanyashcacuna, ¿maicamataj
yachanataca p'iñanguichigari?
23Ñuca jarcashcata uyashpa cutirichigari.
Chaita rurajpica, ñuca Espiritutaca
cancunapi churashami.
Ñuca shimicunata yachachishami.
24Cancunaca mashna cutin cayajpipish,
pi mana shamurcanguichijchu.
Maquihuan cayajpipish, tigrarishpallapish
mana ricurcanguichijchu.
25Ashtahuanpish ñuca imallata
cunashcataca p'iñarcanguichijmi,
jarcajpipish manataj uyashun
nircanguichijchu.
26Cancunata jatun llaqui japi
punllaca, ñucapish asishami.
Cancuna manchashca jatun llaqui
japijpica, chanzata rurashami.
27Cancuna manchashca llaquicunallatajmi
tucuchingapaj shamunga.
Jatun acapana shinami chayamunga,
jatun llaqui, jatun manchaimi
cancunataca japinga.
28Chashna tucushpaca ñucata
cayangacunami, ashtahuanpish ñucaca
manataj cutichishachu.
Utcata jatarishpa mashcashpapish,
ñucataca manataj japingacunachu.
29Alli yachaitami p'iñarcacuna.
Mandaj Diosta cazunatami manataj
munarcacuna.
30Ñuca cunashcatapish mana
chasquircacunachu.
Imata jarcajpipish, manataj
cazurcacunachu.
31Paicunapaj causaipi imatami
tarpurcacuna, chaillatatajmi micungacuna.
Paicuna munashca shina rurashcallamantatajmi
amijta micungacuna.
32Upacunataca paicunapaj panda
causaillatajmi huañuiman chayachin.
Rumi shungucuna cushicushpa causashcaca,
chingarinaman apanllami.
33Ashtahuanpish ñuca yachachishcata
cazushpaca, imata mana manchashpami
causanga.
Ima llaqui japinata mana manchashpa,
sumajtami causancuna” ninmi.
Who We AreWhat We EelieveWhat We Do
2025 by iamachristian.org,Inc All rights reserved.
