1Chai q'uipaca cutinllatajmi, Mandaj Diosca Jonastaca cashna nirca:
2“Jatari, Nínive puebloman ri. Chai jatun pueblopi causajcunaman ñuca imallata huillai nishcata huillagri” nircami.
3Chashna nijpimi Jonasca jatarishcahuan, Mandaj Dios mandashca shina Nínive pueblopi huillagrirca. Nínive puebloca quimsa punlla purina shina, jatun pueblomi carca.
4Jonasca shuj punlla shinata purishpami: “Cunanmanta chuscu chunga punllapica, cai Nínive puebloca chingaringami” nishpa, caparishpa huillashpa purirca.
5Jonás chashna huillajpica, Nínive pueblopi causajcunaca tucuicunami Taita Diosta crircacuna. Chaimantaca yuyajcunamanta callarishpa, uchilla huahuacunacamami cañamazuta churarishpa mana micurcacuna.
6Nínive pueblota jatun mandajpish chai huillashcataca yachaj chayarcami. Chaimantami pai mandashpa tiyacushcamanta jatarishpaca, paipaj sumaj churanata llujshichishcahuan, cañamazuta churarishpa ushpapi tiyarirca.
7Shinallataj jatun mandajhuan, pai churashca mandajcunahuanca, Nínive pueblopi causajcunamanpish cashnami huillachirca: “Pi runacunapish, animalcunapish ama imata micunguichijchu. Huagracunamanpish, ovejacunamanpish ama imata caranguichijchu, yacullatapish ama ubyachinguichijchu.
8Ashtahuanpish gentecunapish, animalcunapish cañamazuta churarishpa, sinchita Taita Diosta caparishpa mañanguichij. Tucuicunallataj ima laya millaita ruraj cashca cashpapish, chaita saquishpa cutirichij. Huañuchijcuna cashpapish, chaita saquinguichij.
9Taita Dios p'iñarishpa llaquichina cashpapish, manapishchari llaquichinga” nishpami mandarca.
10Taita Diosca, Nínive pueblopi causajcunaca millai ruranacunata saquishpa cutirishcatami ricurca. Chaimantami pai p'iñarishpa llaquichisha nishca cashpapish, jarcarishpa mana llaquichirca.
Who We AreWhat We EelieveWhat We Do
2025 by iamachristian.org,Inc All rights reserved.
