Ap 19 - Mam Ostuncalco Bible

1Tb'ajlenxi'tzun ja'lu, nb'iye' txqan tq'ojq'ojel towi'yj ntoq kyma'n toj kya'j kjalu:

Ajwalinjtzwit Qman Dyos

tete' Dyosu' kolb'il, ajwalil ex ipumalj,

2qu'n tojxi'x tu'me'l ex tuk'i'l ax nche oka' xjal toj xjel tu'n;

matxi' kub' ttz'e'ysa'n twitzu' qya nimaq ajpajil

ju' tok tz'ilsalkye xjal tu'n tajpaji'n;

matxi' tz'oktq'o'n t-xel te

tu'n tpaj kykamikju' tmajin, chechij.

3Ex kymatl kjalu:

¡Ajwalinjtzwit Qman Dyos!

Kjawil t-sb'elju' nintnam lu kukxju', chechij.

4Aye'tzu'n junaq kyaje' tijwnaq exqe' kyaje' itz'qe' e'kub' meje majx ku'pun kyplaj twitz tx'otx' ex ek'ulun te Dyos, q'uqlitoq tib'aju' q'uqb'il. Intoq kyma'n: ¡Ikyxwitju'! ¡Ajwalinjtzwit Dyos! chechij.

5Tzajtzun yolin jun tk'etzu' q'uqb'il, intoq tma'n kjalu:

¡Kyajwalinktze' Qman Dyos

kykyaqile', ch'i'n kyoklene' ex nim kyoklene',

kykyaqile' inche ajb'ene'

ex inche nimane' te Dyos! chechij.

B'itz ti'j tmjeb'le'n Qpoj Tman rit

6Ex xinb'i'ne' naku'j tq'ojq'ojel kywi' txqan xjal, naku'j tq'ojq'ojel txqan a' nku'tz twitz xaq ex kuw q'ankyaq. Intoq kyma'n:

¡Ajwalinjtzwit Dyos!

Qu'n matxi' tzyet tkawin Qajaw,

aju' Qman Dyos nimtipumal.

7Qoqe' tzalaj,

qoqe' tzalajxi'x ex qajwalinktz,

qu'n matxi' ponju' kmoj

te tmjeb'le'n Qpoj Tman rit.

Matxi' tb'incha tib'ju' t-xu'jil:

8matxiq'o'n anb'il te tu'n toktq'o'n t-xb'alun

tz'umin sed, ẍnu'l ex nqoptz'aj,

qu'n ate' sed xb'alun lu

aju' b'a'n kychwinqlal okslal, chechij.

9Tzaj tma'n anjl weye' kjalu: Tz'ib'anku'ya: Tzalajb'il kyeju' txko'nqe' toju' ninwan ti'j tmjeb'le'n Qpoj Tman rit, chij. Ex tmatl: Aye' tyol Dyos ja'lu axxi'x, chij.

10Nkub'tzun mejeye' t-xe tqanu' anjl, tu'n nk'ulune' te, atzunte tzaj tma'n weye': Lan tb'inchaya lu, tmajin Dyos qinwe', kse'nx aya ex kse'nqe' titz'ina ex ttzika ljo'n kychik'b'ante tziyb'il ti'j Jesus. Xi'k'ulunata te Dyos, chij.

Aju' tpakb'ab'l Jesus nxewsankye t-sanjelal Dyos.

Tkamb'ab'lju' toktz ti'ju' chej saq ti'j

11Wile' jqo'ntoqu' kya'j; ex atitoq jun chej saq ti'j, atzu'n q'uqlojx tib'aj, a tb'iju': Njapunxi'x tu'n ex Axxi'x tyol, qu'n tojxi'x tu'me'l nkawina' ex nq'ojina'.

12Intoq che qoptz'aju' twitz kse'n tqantaq' q'aq', tojxtoq txqan tkoron toj twi' ex tz'ib'a'n jun tb'i o'kxte ojtzqilte.

13Toktoq t-xb'alun uk'sa'n toj chik', atoq tb'iju': Aju' Tyol Dyos.

14Lepchqe'xtoq txqanju' ate' toj kya'j ti'j, tok kyxb'alun tz'umin sed, saq ex ẍnu'l, ex ate'ktz kyi'j chej saq kyi'j.

15Intoq etz jun k'uẍtx'e'nb'il jqu'n twitzte toj ttzi, tu'n kyok tk'ixb'sa'n nimaqtnam. Kkawil kyib'aj tuk'i'l tb'ar k'uxb'il. Ex aku' kb'ajel pch'unkye ub'a tu'n tqan tu'n tel b'in yek'b'ilte kuw ttx'u'jil Dyos nimtipumal.

16Tz'ib'a'ntoq tb'i toklen ti'j t-xb'alun ex ti'j tkux kjalu: Nimaqkawil kye nimaqkawil ex Kyajaw nimaq kyoklen.

17Ex wile' jun anjl wa'ltoq tib'aj q'ij, nxi' t-ẍch'i'n kuw kye kykyaqilju' pich' ch'yol txkupqe' inche lipan twitz kya'j, intma'n kjalu: ¡Kukytzaje' toju' ninwan tu'n Dyos,

18tu'ntzun kych'yo'ne' ti'j kychib'jil nimaqkawil, e'kynejenel xjal te q'oj ex kychib'jil ichan kuwqe' te q'oj, e'kychib'jil chej exqe' te'kx kyi'j chej, kychib'jil kykyaqil: e'tzaqpi'nqe' ex lq'o'n majin, ch'i'n kyoklen ex nimaq kyoklen!, chij.

19Wile' txkup exqe' nimaqkawil twitz tx'otx' kyuk'i'l kyxjal te q'oj, matxitoq b'aj kyb'u'yi'n kyib' tu'n kyq'ojin ti'ju' tokxtoq ti'j chej ex kyi'ju' txqan t-xjal lepchqe'k ti'j.

20Tzyetu' txkup tuk'i'lxi' chalyol pakb'al matxitoq che b'ajtb'incha'n techlal ex b'a'nq'ob'aj twitz. Kyu'ntzu'n techlal lu matxitoq che b'aj t-sb'u'n chalyol pakb'alju' xjal b'jo'k techelju' txkup kyi'j ex ek'ulun teju' tilb'ilal. E'xi'tzun xonju' txkup tuk'i'lxi' chalyol pakb'al itz'qe'x toju' q'aq' njab' jank'anta' q'ol.

21Aye'tzu'n txqantl eb'aj kyim tu'n k'uẍtx'e'nb'il intoq etz toj ttziju' tojxtoq ti'j chej, ex b'ajx ch'yo'n kychib'jil kyu'n pich' ch'yol txkup.