Dn 7 - Mam Ostuncalco Bible

Witzik' kyi'j kyaje' nimaqtxkup

1Toj tnejel ab'q'i intoq kawin B'elsasar toj B'ab'ilon, ok jun twitzik' Danyel, tetzunj ttzaj tna'ntib', eb'aj kub' ttz'ib'a'n ti'xti' nimxi'x kyoklen toj twitzik'. Aye' e'kub' ttz'ib'a'n ja'lu:

2Toju' nwitzik'e', xinka'yine' kyq'iq' inxi'x jub'in ex majx nyukchi ninnjab' tu'n, ntzaj toj kyaje' plaj t-xe kya'j.

3O'kx kyjatz kyaje' nimaqtxkup toj ninnjab' chukchaq che ka'yin.

4Aju' tnejel iktoqju' kse'n jun b'alun, ate'toq t-xik' kse'n t-xik' t'iw. Tetzunj intoq xinka'yine' eb'je'l q'ulpi'nju' t-xik', jaw wab'a'n twitz tx'otx' ex kub' we' kyuk'i'l kab'e' tqan, kse'n jun xjal, atzu'n tanmi okq'o'n kse'n tanmi xjal.

5Atzu'n tkab' iktoq ka'yinju' kse'n jun oso paqlitoq, ate'toq oxe' tb'aqil tchil toj ttzi kyxol twitzte; ex xiq'ma'n te: ¡Kuxtxi'ya, ex ch'yonxa tkyaqil chib'j tu'n tnoja b'a'nxi'x! chij.

6Atzunju' toxi'n iktoq ka'yinju' kse'n jun leopa'rt, kyuk'i'l kyaje' t-xik' ttze'lti'j; atitoq kyaje' twi' ex xiq'o'n tipumal tu'n tkawin.

7Atzu'n tkyaji'n txkup xinka'yine' toj nwitzik'e' majx xob'ajilx, ex kuw b'a'nxi'x. Ate'toq twitzte nimaq k'uxb'ilqe'; tkyaqil intoq che kub' tb'yo'n ex nche b'ajttzaqu'n, ex nb'aj twab'e'nju' mitoqjun nb'aj tu'n. Junxi'tl kyekywitz kykyaqilju' matxi'toq che oknka'yine' toj nwitzik'e', atitoq lajoj tuk'a toj twi'.

8Tetzunj intoq chin ka'yinxe' kyi'ju' tuk'a, o'kx tjatz b'ent juntl tuk'a b'o's kyxol, ex majx eb'jatz xb'oqj oxe' tuk'a tu'nju' tuk'a b'o's jatz anq'in te b'ajsb'il. Ate'toq twitzju' tuk'a lu kse'nqe' twitz xjal, ex ati ttzi nyolin taq'wix ti'j Dyos.

Xjel tu'n Dyos

9Inxtoq chin ka'yinxe' kyi'j,

e'kub' q'o'n junjun q'uqb'il te kawb'il

ex kub' qe jun tijwnaq kyib'aj.

Saq t-xb'alun kse'n txun che'w,

ẍnu'l t-xya'mal twi' kse'n noq'.

Atzu'n tq'uqb'il te kawb'il kyuk'i'l ttulil ikqetoqju' kse'n tqan taq' q'aq',

10intoq etz jun q'aq' naku'j tnimal a' twitz.

Nimtoq txqan nche ajb'en te,

ex tnam kyb'aju' wa'lqe'toq twitz.

Tzyettzun tkawin ajkawil,

ex eb'ajx jaqliju' u'j.

11Majxtzun nkyej ka'yine', tu'nju' yol myab'a'n intoq tma'nju' tuk'a b'o's, tetzunj intoq chin ka'yinxe', kub' b'yo'nju' nin txkup ex kub' pẍu'n, okx q'o'ntzuntz toj q'aq' tu'n tb'aj.

12Ikxqe'tzu'n txqantl txkup elq'i'n kyipumal, naq xiq'o'n jte' q'ijtl anb'il kye tu'n kyanq'in b'ankxpun japun toj kyq'ij.

13Inxtoqtzun che'x nka'yinju'ye' ti'xti' lu toj nwitzik'e' toj qonik'an. O'kx myanim:

Xinka'yine' jun naku'j ichan xi'toq ttzaj toj muj,

xi' lq'e tk'etzju' tijwnaq;

ex pon laq'b'a'n twitz.

14Xi'tzun q'o'n tipumaltz, ninb'il exju' kawb'il te,

kykyaqiltzu'n xjal kyoj kykyaqil nimaqtnam ex chukchaq kyol intoq che ajb'en te.

ktenb'elju' toklen tejumajx,

ex layx kub' xitu'nju' tkawb'il.

15Ayine' Danyel, majx oktchi wi'je', expe' majx nyab'iye' tu'n tkyaqilju' matxi'toq wile',

16nxi' lq'etzuntze' tk'etz jun kyxolju' inche ajb'en teju' tijwnaq ex xinqani'ne' te tu'n ttzaj tchik'b'a'n weye' tkyaqilju' matxi'toq wile'. Atzunte ku chij, tzaj tma'n weye' kjalu:

17Kyaje' nimaqkawilqekye' ntma'nju' kyaje' txkup lu che kawil toj tkyaqil twitz tx'otx'.

18Yajxi'tzuntel kxe'l q'o'nju' kawb'il lu toj tq'ob'ju' ttanam Dyos toj kya'j, kjeltzuntz tejumajx te, chij.

19Wajb'iltoqtzune' tu'n nb'inteye' ti'ju' tkyaji'n txkup tu'n tpaju' junxi'tl kyekywitzju' oxe'tl, qu'n majxtoq xob'ajilx: k'uxb'ilqe' twitzte, aye'tzu'n t-xky'eq q'ank'uxb'ilqe', toktoq xitulte tkyaqil, atzunju' min b'aj tu'n nb'ajkub' twab'i'n.

20Ex wajb'iltoqe' tu'n nb'inteye' kyi'ju' lajoj tuk'a, ex ti'ju' juntl tuk'a b'o's ate'toq twitz ex intoq yolin tuk'i'l nimjtib'il, naku'xi'xteja ate niminxi'x kyekywitzju' txqantl, oxe' tuk'a nimaq eb'jatz xb'oqj tu'n, kyajtzuntz te kxel.

21Wiltzuntze' intoq q'ojinju' tuk'a lu kyi'ju' ttanam Dyos ex intoq kub'kyi'j tu'n,

22tzmaxi'j tulju' tijwnaq b'inchal tnik'alilti'j teju' ttanam Dyos te toj kya'j, qu'n matxi'toq japun tq'ijlalil tu'n ttenju' kawb'il toj kyq'ob' ttanam Dyos.

23Tmatzuntz kjalu:

Aju' tkyaji'n txkup nyolin ti'j jun tkyaji'n kawb'il ktenb'el twitz tx'otx'

mikxa'ju' kse'nqe' txqantl.

Kb'el t-xitu'n tkyaqilju' twitz tx'otx',

ex kb'ajel twab'i'n.

24Aye'tzu'n lajoj tuk'a nyolin kyi'j lajoj nimaqkawil

kche kawil toju' kawb'il lu.

Kyik'lenxi'tzun ja'lu k'okyel juntl toju' kawb'il,

junxi'tl kyekywitzju' tnejel,

che eleltiq'i'n oxe' kyxolju' nimaqkawil lu.

25Kyolil taq'wix ti'ju' Dyos toj kya'j,

che b'ajel tyaju'n ttanam Dyos;

ktjya' tu'me'l tu'n tch'exb'ente tkawb'il Dyos exqe' ninq'ij twitz Dyos,

oxe' ab'q'i tk'i' nik'jan

ktenb'el ttanam Dyos tjaq' tkawb'il.

26Atzu'n nimaqkawil lu k'okyel toj xjel tu'n ajkawil,

k'elel q'i'n kawb'il te,

ex majx kyjel xitu'n.

27Tkyaqiltzu'n kawb'il, ipumalj

ex ninb'ilte twitz tx'otx',

che kxe'l q'o'n teju' ttanam Dyos te toj kya'j.

Ktenb'elju' tkawb'il tejumajx,

ex kykyaqilju' tnam toj tkyaqil twitz tx'otx'

kche ajb'el te ex kxel kyb'incha'n titi' matxi tma'n kye, chij.

28Atzun nwitzik'ju'ye' ok, ayine' Danyel, majx nkyej ximane' ti'j ex majx nkyaj sb'une'ye'; mix-a'loqex xa' nyolina'ye'.