Lv 22 - Mam Ostuncalco Bible

O'qe'kxju' b'a'n kywan kyi'ju' oyaj te Qman Dyos

1-2Tzaj tma'n Qman Dyos te Moyses ikjalu:

Q'manxa te Aaron ex kyeju' tyajajil tu'n tten kyxob'il kyi'ju' ti'xti' xjan intzaj kyq'o'n aj Israel weye', tu'ntzun lalun kub' kyaju'nju' nb'iye' xjan. Ayine' Dyos Manb'aj.

3Kxe'l qex ja'lo, alkyexku' jun kyyajajil tz'ilsa'ntib' mache kub' tq'o'nju' ti'xti' xjanqe' nwitze' ju' intzaj kyiq'i'n aj Israel weye', ati tu'n tel toklen nwitze'. Ayine' Dyos Manb'aj.

4Qa ati jun tyajajil Aaron yab' tu'n xlemtx'a'k mujqa in qojl ij twi' ttz'a'lb'il, lalun txi' twanju' ti'xti' xjan tzmaxi'j aj t-ẍtilset.

Alkye matxi ttzyu'n jun ti'xti' tz'il tu'n jun kyimni mujqa matxi ttzyu'n jun yab' tu'n ij inel qojl twi' ttz'a'lb'il,

5mujqa aju' matz'ilix tu'nju' xittzyu'n jun txkup nqititinje mujqa matz'oktmko'n jun ichan tz'il tu'n alkyexku' tz'il,

6kjelten tz'il tzmaxi'j ajqok yupj, ex mixti' tu'n twanteju' ti'xti' xjanqe' qa na'mxtoq ttxjontetib' tu'n a'.

7Kẍtilsetelxi' ajxi' tku'x q'ij, b'a'ntzun twantz kyi'ju' ti'xti' xjanqe', qu'n ana' twaju'.

8Mixti' tu'n tch'yonte tchib'jil jun txkup kyimnitl mujqa jun alu'mj b'ajni tzaqu'n tu'n jun tojk'ul txkup, tu'ntzun lalun ttz'ilsatib' tu'n. Ayine' Dyos Manb'aj inchin q'mante.

9Q'manxa kye tu'n tjapunju' nchaq'b'ile' kyu'n tu'ntzun lalun kyejten il kyib'aj tu'n tpaj qa min xxi' kyb'incha'n, laytzun che kyimtz. Ayine' Dyos Manb'aj, ẍin xjansankye.

10Mixalokyex jun mya pale tu'n twanteju' xjansa'n.

Qa jun tulaju' pale mujqa jun tmajin, mixti' tu'n t-xi' twanju' xjansa'n.

11Qama tloq'ju' pale jun tmajin tu'n tmedi, aju' tmajin lq'o'n b'a'n tu'n twanteju' wab'j xjansa'n. Ex b'a'n tu'n kywanju' itz'jniqe' toj tja pale ti'ju' twa.

12Qa mjeb'niju' tmyal pale tuk'i'l jun ichan mya pale, mixti'tl tu'n twan kyi'ju' oyaj inxi' kyeju' pale.

13Qatzun kyimnitl tchmil mujqa kub'ni tpa'ntib' tuk'i'l tchmil, qa mixti' tal, ex matz'anjtzti'j toj tja tman kse'nx na'mxtoq tmje, b'a'n tu'n twan ti'ju' twa tman. Aye'tzu'n mya paleqe' mixti' tu'n kywante.

14Qa ati jun matxi twanju' wab'j xjan ex min b'in tu'n qa xjan, ati tu'n t-xi' tq'o'n t-xe'lju' xb'aj twanteju' pale tuk'i'l jun tjwe'yi'n tnejtl;

15lalun kyaq'ju' pale anb'il tu'n tkub' kytxa'ju'n aj Israel ti'xti' xjan nche kub' q'o'n nwitze',

16tu'ntzun lalun kyejten taq'wix kyib'aj tu'n tpaj qama txi' kywanju' wab'j xjan. Ayine' Dyos Manb'aj ẍin xjansankye, chi Dyos.

Nuk'b'il kyi'j alu'mj che kxe'lq'et te Qman Dyos

17-18Tzaj tma'n Qman Dyos te Moyses tu'n t-xitma'n kye Aaron kyuky'i'lju' tk'wal ex kye kykyaqil aj Israel kjalu:

Qa ati jun aj Israel mujqa jun te najchaq xjal najliqe' kyxole', makub' tq'o'n jun alu'mj te chojb'il k'ok'sb'il nwitze', qa tu'n tjapun jun yol tziya'ntl mujqa jun oyaj tu'n tk'u'j,

19ati tu'n tkub' tq'o'n jun tman mixti' ttzakajil tu'ntzun tk'met te. Qa jun tman wakx, jun qpoj tman rit mujqa jun tman chib',

20naq o'kx mya jun alu'mj ati ttzakajil, qu'n lay k'met te.

21Alkyexku' makub' tq'o'n jun chojb'il te b'inchjtib'il nwitze', qa tu'n tjapun jun yol tziya'ntl mujqa jun oyaj tu'n tk'u'j, ati tu'n kykub' tq'o'n tma wakx mujqa ttxu rit mixti' kytzakajil tu'ntzun kyk'met te.

22Lalun che tzaj kyq'o'ne' alu'mj weye' moẍqe', k'ixb'niqe', koxqe', tx'a'k kyi'j, ẍal kyi'j mujqa b'je'tzni poq'li kyi'j, ex lalun che tzaj kyq'o'ne' weye' te oyaj tz'e'ysa'n tib'aj q'olb'eb'l.

23Qa te jun oyaj tu'n kyk'u'je', b'a'n tu'n kyq'onteye' jun tman wakx mujqa jun tma rit mya junelniqe' tqan, qatzun tu'n tjapun jun yol tziya'ntl lay k'met kyeye'.

24Ex mixti' tu'n kytzaj kyq'o'ne' alu'mj weye' k'ixb'niqe' kyb'aq', b'ajni tx'no'n, etzni xb'oqi'n mujqa elni jon. Lalun kyb'incha'juye' lu toj kytx'otx'e'.

25Ex mixti' tu'n kyk'monteye' alu'mj ikju' te jun najchaq xjal tu'n ttzaj kyq'o'ne' weye', qu'n tzkaj alu'mjqe' ex lay che k'met kyeye', chi Dyos.

Nuk'b'il tu'n kykub'yetju' alu'mj che kxe'lq'et te Dyos

26Tzaj tma'n Qman Dyos te Moyses ikjalu:

27Ajtitz'ji jun qpoj tman wakx, jun qpoj tman rit mujqa jun qpoj tman chib', ati tu'n tkyejten wuq q'ij tk'etzju' ttxu, tojtzunju' twajxaqi'n q'ij b'a'n tu'n tk'met tu'n tkub' tz'e'yset te oyaj weye'.

28Lalun kub' kyb'yo'ne' jun ttxu wakx mujqa ttxu rit tuk'i'lxi' tal toj jun q'ijx.

29Ajttzaj kyq'o'ne' jun oyaj te aq'b'il chjonte weye', kyb'inchame' toj tu'me'l tu'ntzun nk'monteye'.

30Expe' kych'yonxe' ax q'iju' ex lalun kyej kyq'o'ntle' te jun q'ijtl. Ayine' Dyos Manb'aj nchin q'mante.

31Kyb'inchanqe'xju'ye' nchaq'b'ile'; che japunx kyu'ne'. Ayine' Dyos Manb'aj.

32Lalun kub' kytxa'ju'ne' nb'iye' xjan, tu'ntzun wokye' xjan kyeye'. Ayine' Dyos Manb'aj, matxi che nxjansaye'

33ex oje che etz wiq'i'ne' toj Ejipt tu'n kyk'ulune' weye'. Ayine' Dyos Manb'aj, chi Dyos.