Gl CHIK'B'AB'L - Mam Ostuncalco Bible
CHIK'B'AB'LAju' tz'ib'a'n toju' u'j lu nimaq toklen ikx kse'nju' tz'ib'a'n toju' u'j xitq'o'n Pawl kye aj Rom: Qu'n chi Pawl qa a t-xjanilju' tu'n tb'ent qten tuk'i'l Dyos aju' qokslab'l, myaju' aq'untl se'n ntma'n kawb'il. Atzunte' toju' u'j xitz'ib'a'n kyeju' aj Rom nyolin kyi'j kkyaqilju' aq'untl, atzuntl toju' u'j xi' tz'ib'a'n kyeju' aj Kalasya o'kx nyolina' ti'j jun aq'untl: tiju' techlal ti'j qchib'jil. Atzuntlte' kxol aj Rom, junxi'tl, qu'n ate Pawl kub' q'onte okslab'l kxolju' aj Kalasya ate'qe' toj ktx'otx' aj Rom, ex ikx toj b'o's Asya, intoq jaw ch'yon kyanmi xjal tu'n tpaju' qechil ti'j qchib'jil. Ex ma'toq jawkyi'nkyib' xjal xitulte taq'un Pawl toj Kalasya, ex intoq kpakb'a'n qa ilti'j tu'n tjapun tkawb'il Moyses kyu'n xjal tu'n tb'ent jumajtl kten tuk'i'l Dyos, a kawb'ilju' tu'n tjapun aju' qechil ti'j qchib'jil. Toktaq tkyaqil ja'lu xitulteju' ntpakb'a'n Pawl aju' nok tq'o'n tb'i te b'a'n tqanil, ex intoq nokten q'malte kyeju' okslal mya aj Judaqe' tu'n tel kyik'u'n tkyaqilju' nche okten xjal q'malte kye. Ex intoq tzaj ttx'u'jil Pawl kyi'ju' xjal tqe'k xitulteju' taq'un Pawl te chq'o'n tu'nju' kxnaq'tzb'en.Xi'tzun ttz'ib'ante Pawl kye aj Kalasya, qa matxitoq che eltxalpuj ti'ju' kyokslab'l ex ti'ju' ti'xti' axxi'x, tu'ntzun tanjtzkyi'j toj okslab'l. Ti'jxitzunju' chik'b'ab'l (1.1-10) intoq noktente' Pawl yolil ti'ju' toklen tu'n Dyos ex intoq tma'n qa mya tu'me'l kyu'nju' txqantl xjal. Ex intoq tma'nte Pawl tu'n tkyaqil tipumal qa aju' toklen xi' saja' tk'etz Qman Dyos ex ikxju' b'a'n tqanil ntpakb'a'n. Mixti' saj q'o'n te kyu'n xjal twitz tx'otx' mujqa kyex junjuntl chq'o'n. Ex atzunju' aq'untl saj q'o'n te aju' tu'n txitiq'in b'a'n tqanil kye xjal mya aj Juda (1.11—2.21). Ex intzun tchik'b'a'ntz qa aju' b'a'n tqanil naq jun, ex naq t-xtalb'il Qman Dyos naqx tu'nju' qokslab'l ti'j Jesukrist (3.1—4.31).Ex ikx nyolin ti'ju' tzaqpib'l ntzaj tq'o'n Krist qe aj qokslan, qu'mtzun intb'incha'n jun txokb'il kyeju' aj Kalasya tu'n kten toju' tzaqpib'l lu, ex tu'n lalun che ok te lq'o'n majen teju' ktxol xjal ex teju' kawb'il, ex inche'x ttzak'u'n tu'n kk'u'jlante kyib' tuk'ilju' tk'u'jlalil ntzaj tq'o'n Krist naqx tu'nelju' okslab'l (5.1—6.10). Atzun toju' mankb'il tnej kub' ttz'ib'a'n tu'nku' tq'ob' aju' yol nimaqxi'x toklen kjalu: Mixti'x tajb'en qa tok qechil ti'j qchib'jil mujqa mixti'; ate' tixi'x tajb'enju' qama tzaj q'o'n juntl qchwinqlal ak'a'j tu'n Jesukrist (6.15).
