Ec 2 - Mam Ostuncalco Bible

1Ex nmaye' wib'xwib'e': Ja'lo k'ik'elnwitze' toju' tzalajb'il; chin anq'ile' b'a'n, nchije'. ¡Ex ikxte' lu naqx toqwitz nnok!

2Eltzun nnik'tze' qa naq nnok toj qwi' kse'n aj qtze'n exqa mixti'x tajb'enju' achb'il.

3Waq'wib'e' tu'n tik' nwitze' ti'ju' tzalajb'il tu'n b'in, ẍaqlu'n qine' tu'n nab'l, naqx tu'n tel nnik'e' qa a b'a'nju' teju' xjal toju' jte' q'ij tchwinqlal twitz tx'otx'o.

4Eb'aj nb'incha'ne' nimaq aq'untl; eb'jaw nb'incha'n njaye' te kawb'il; ex ten wawale' ub'a.

5Ok wawale' toju' wawb'ile' ex toju' ntx'otx'e', e'okwawa'ne' chukchaq tqan lob'j.

6Eb'ajkub' nb'incha'ne' nimaq tkb'el a' tu'n kya'litju' tze b'jo'k wawa'ne';

7e'nloq' nmajine' ichan ex qya, ex e'ten nmajine' itz'jniqe' tojx njaye'; ex nimxi'x txqan nwakyixe' ex nrite' ten kyekwitzju' e'ten nejtl nwitze' toj Jerusalen.

8B'aj nchmo'n txqan nq'anpwaqe' ex nsaqpwaqe', nk'uwene' kyetoq txqantl nimaqkawil ex kye junxi'tl tx'otx'. E'tzun ichan ex qya ajb'itzalqe' eb'aj ten, in achune' kyuk'i'l xjal ex txqan nqyaye' ten.

9In okye' te jun nimaqxjal, nimxi'x txqan ti'xti' ten weye' kyekywitzju' e'ten nejtl nwitze' toj Jerusalen. Expe' kukxtoq tten nnab'lju'ye'.

10Mixti' jumaj kub'wit nẍk'u'ẍi'n wib'e'; mixti' jumaj njuk'witwib'e' ti'j juntl tzalajb'il. Ojexi'x intzalaje' tu'n tkyaqil nk'u'je' toju' waq'une', ex o'kxte nkanb'aju'ye' tzalajb'il lu.

11Nkub'tentzuntze' ximalte tkyaqilju' waq'unb'ene' nim tq'ijlalil xi' kyi'j tu'n kyb'aj b'ent, ex kane toj nwitze' qa tkyaqil ja'lu mixti'x ttx'o'lajil, ikxju' kse'n qajb'il tu'n qxi' tzyulte kyq'iq', mixti'x tajb'en twitzju' tx'otx' lu.

12Nkub'tentzuntze' ximal tib'aju' nab'l ex tib'aju' xnakyil: ¿Ti'xi'xtzunlo ktb'inch'a'tlju' nimaqkqwil tzul wi'jxi'ye', qa mya axju' matxi' b'inchet nejtl?

13Ex el nniky'e' ti'j qa atixi'x tajb'enju' nab'l kyetwitz xnakyil, kse'n spik'un atixi'x tajb'en kyetwitz qxopin.

14Inxitka'yi'n te' xjal ati tnab'l b'a'nxi'x, atzu'n xnak nttakla'ntib' toj qxopin. Matxitzun tz'el nnik'e' ti'j qa qkyaqil junx qopomela' b'aj,

15kunxima'ntzuntze': Ax kb'ajelju' wi'je', kse'nx kb'ajel ti'ju' xnak, mixti'xte' tajb'en txqan nnab'le'. ¡Ex mixti'xte' lu ttx'o'lajil!

16Qu'n mixi'xlo ktzajela' na'nju' ati tnab'l exju' mixti'x tnab'l; qu'n tkyaqil inik'tna'l aj tb'etq'ij, kkyimelju' ati tnab'l exju' mixti' tnab'l.

17Elpe' wik'o'ne' chwinqlal, qu'n tkyaqilju' nb'inchet twitzju' tx'otx' ok te jun myab'a'n weye'. Axxi'x, tkyaqil ja'lu mixti'x ttx'o'lajil, ¡ikxi'xte' kse'n qajb'il tu'n qxi' knolte kyq'iq'!

18Ex elwik'o'ne' tkyaqil aq'untl ojetoq che nb'inchaye' twitzju' tx'otx', qu'n tkyaqil ati tu'n tkyejten teju' nxele' k'okyel.

19Ex b'i'nxi'xtoq wu'ne' qa aju' xjal kjelten te nxele', b'a'ntzun ati tnab'l mujqa mixti', ilti'j kjelten tib'aj tkyaqilju' waq'unb'ene' maxi'x nb'inchaye' tuk'i'l nab'l twitz tx'otx'. ¡Expe' mixti'x ttx'o'lajil ja'lu!

20Tetzunj nka'yinteju'ye' waq'unb'ene' matxi'toq che nb'inchaye' twitzju' tx'otx', ul toj nk'u'je' tu'nju' nim ẍin aq'unane',

21qu'n atite xjal nnaq'unan tuk'i'l nab'l, ojtzqib'l ex twitzlalil, naqx tu'n tkyaj tq'o'nju' taq'unb'en te juntl min xsikti tu'n tten te. ¡Mixti'x ttx'o'lajil ja'lu ex mixya tnik'alilti'j!

22Ikytzu'n, ¿titi' tajb'en teju' xjal tu'nju' inxi'x elb'aj tu'n taq'unan ex inxi'x b'ajx tk'u'j twitzju' tx'otx'?

23Tkyaqilju' tq'ijlalil tchwinqlal yajte'n, jun nin iqtzxi'x; mixpeti'x nnojlanju' tnab'l te qonik'an. ¡Ex mixti'x ttx'o'lajil ja'lu!

24Ate b'a'nju' tu'n tb'inchante xjal tu'n twan ex tu'n tk'wan, ex tu'n ttzalaj tu'nju' twitz taq'unb'en, qu'n matxi' tz'el nnik'e' ti'j qa axte Qman Dyos kyej q'onte ja'lu.

25Qu'n, ¿alxi'xkye jaku' wan, mujqa tu'n ttzalaj qa mya tu'nx?

26Qu'n intzaj tq'o'nte Qman Dyos nab'l, ojtzqib'l ex tzalajb'il teju' xjal b'a'ntel twitz; atzu'n teju' b'inchal il ntq'o'n anb'il tu'n tjaw b'ent ex tu'n tchmet tk'uwen, tu'n txi' tq'o'ntl teju' b'a'ntel twitz. ¡Mixti'x ttx'o'lajil ja'lu ex ikx nnela'ju' kse'n qajb'il tu'n qxi' knolte kyq'iq'!