Is 61 - Mam Ostuncalco Bible

Tqanil kolb'ilkye aj Israel

1Ati T-xew Qman Dyos wuk'i'le',

machin eltpa'ne' Dyos tu'n wajb'ene' te;

machin tzaj tchq'o'ne' q'olte b'a'n tpakb'al kye prow,

q'uqb'alte kyk'u'ju' nche oq',

q'olte tqanil tzaqpib'l kyeju' jpu'nqe',

tzaqpib'l kyeju' ate'kx toj kars.

2q'malte tqanilju' tq'ijlalil b'a'n tb'is tk'u'j Dyos

aju' tq'ijlalil ajtok t-xel kye qajq'oj

tu'n Qman Dyos

Machin tzaj tchq'o'ne' q'uqb'alte kyk'u'ju' nche b'isun,

3q'olte kyoklenju' najlqe' toj Syon

te t-xel b'is

tu'n tok kyk'ok'sb'il te kytzalajb'il te t-xel oq'e'n,

tu'n kyb'itzan b'itz te t-xel b'is.

K'okyel tq'o'n kyb'i K'ol nche kanb'an,

awa'nqe' tu'n Qman Dyos tu'n tyek'u'nte tajwalil.

4Che jawil b'inchetlu' ojtxi' xitjniqe',

che jawil b'inchetju' ja ojtxi'tl xitjniqe',

ex che b'incheteltlju' nimaqtnam xitjniqe'.

5Che okyel kyq'o'ne' najchaq xjal

xq'uqilkyeju' kyalu'ne', kytx'otx'e' ex kyawale'.

6Ex k'okyel q'o'n kyb'iye' te tpale Dyos

te tmajin Qman Dyos.

Kkynik'b'eye' kyq'inumal txqantl nimaqtnam

ex che okyelju' kyajwalil wiqb'ilkyeye'

7Matxina' che yajtiye' ntanam

ma'xi'x b'je'l kych'ixawe' ex mache ok i'li'ne',

qu'mtzun kyk'ma'ye' txqan q'inumal

toju' kytx'otx'e'

ex che tzalajele' tejumajx.

8Qu'n nxi'x tzalaj Qman Dyos ti'ju' tnik'alilti'j,

ex ineltik'u'n elq'a'n ex b'yojxjali'n.

Ktzajel tq'o'n b'a'n tu'me'l t-xel kyeye'

ex kjel b'entti'j jun tyol tejumajx kyeye'.

9Che okyelju' kyyajajile' nim kyoklen kyxol nimaqtnam.

k'elelkynik' kykyaqilju' mache okka'yinkye

qa jun tnamqe' ky'i'wla'ntl tu'n Qman Dyos.

10¡Inxi'x chin tzalaje' ti'j Qman Dyos!

Majx machin tzalaje' ti'j Qman Dyos,

qu'n machin tkole',

¡machin kanb'ane' tu'n!

ikyqinju'ye' kse'n jun q'a xi' tmje tokx koron toj twi'

ikyqine' kse'n jun txin xi' tmje mab'aj tb'incha'ntib' ex ate'k tu.

11Qu'n kse'n nche tzaj ch'iy awal toj tx'otx'

ex kse'n nche tzaj kyxul toj awal,

ikytzu'n ktb'incha' Qman Dyos kanb'ab'l

ex tu'n kyb'itzan kykyaqil nimaqtnam b'itz te tzalajb'il.