1Kyb'ajxlenxi'tzun q'i'n Jekoniy tk'wal Joakyin, nimaqkawil toj Juda, kyuk'i'lxi' nejenel toj Juda, eb'inchal chukchaq aq'untl ex b'inchal jupb'il ja, tu'n Nab'ukodonosor tzmajx B'ab'ilon, tzaj tyek'u'n Qman Dyos kab'e' chi'l iw weye' tkub'qe' tpen tja Dyos.
2Tb'anilxi'x iw tku'xtoq toju' nejl nq'nax, atzu'n juntl taq'wix iw tku'x toj, layx b'ent tlo'yet.
3Tzajtzun tqani'n Qman Dyos weye' kjalu: ¿Titi' ntka'yi'na Jeremiy? chij. Xi'tzun ntzaq'we'ne': Iw, majx tb'anil qe'ju' b'a'n iw; aye'tzun taq'wix mixyab'a'nqe' layx b'ent kylo'yet, nchije'.
4Tzajtzun tma'n Qman Dyos weye' ikjalu:
5Ayine' Dyos Manb'aj nchin q'mante: Kse'n tb'anil iw kxe'la' nka'yi'ne' tnam Juda xnchaq'e' tu'n tex toju' tnam lu tu'n tpon q'i'n toj kytanam aj kaldey. Che nxtalu'ye',
6Che nxq'uqi'ye' ex che anjetz wanjsa'ntle' toju' tx'otx' lu. Xi' che jawila' b'ent wu'ne' tzalu ex lay che kub' nxitu'ntle', che b'elex wawa'ne' ex lay che jaw nxb'oqi'ntle'.
7Kxe'l nq'o'ne' kynab'l tu'n tel kynik' qa ayine' Dyos Manb'aj, che okyel te ntaname' ex weye' che k'ulula', qu'n k'anjetzkyi'j wuk'i'le' tu'n tkyaqil kyk'u'j.
8Atzunte Sedekyiy, nimaqkawil toj Juda, kyuk'i'lju' nejenel exqe' najlqe' toj Jerusalen, ju' mache kyejten toju' tnam mujqa mache kub'ten toj Ejipt, ikyche elela' weye' kse'n taq'wix iw, ju' layx b'ent kylo'yet.
9Knb'incha' jun ti'xti'ye' kyi'j mixyab'a'n k'elela' toj kywitz kykyaqil nimaqtnam twitz tx'otx', ex k'okyel te jun yek'b'il ti'ju' me'sb'il, ik'jtib'il ex qanb'en myab'a'n kyoj kykyaqil tnam jamache'xa' nslamu'ne'.
10Ktzajel nq'o'ne' q'oj, we'yaj ex tx'u'j yab'il kyi'j, mix-a'lo'xte jun kjolpajel toju' tx'otx' xinq'o'ne' kye ex kye ojtxi' kychman, chi Dyos.
Who We AreWhat We EelieveWhat We Do
2025 by iamachristian.org,Inc All rights reserved.
