Mc CHIK'B'AB'L - Mam Ostuncalco Bible
CHIK'B'AB'LIn q'manjtz qa aju' tpakb'al b'a'n tu'n Kuẍ nej kub' tz'ib'a'n kwitzju' txqantl tpakb'al b'a'n, atzunte Lukas ex Matey teyilex junjun kub' ttz'ib'a'n tpakb'al b'a'n se'nxju' ok kka'yi'n. Ex aju' tpakb'al b'a'n tu'n Kuẍ ch'i'nx ch'intl ex chik'lixi'x kxolju' kyaje' tpakb'al b'a'n. Aju' u'j lu ntzyet tyolin ti'ju' se'n tzaj qenaju' tpakb'al b'a'n, mujqa se'n jawa' anq'ina' b'a'n tqanil kyeju' xjal twitz tx'otx', ex atzu' tzaj anq'ina' ti'j Jesukrist. Atzun teju' kub' tz'ib'ante u'j lu aj xjansa'ntib', atzu' tzaj qena'te' tpakb'al b'a'n ti'ju' tpakb'ab'l Xwan Jawsal a' toj chq'ajlaj (1.1-8) tej tjaw a' twi' Jesus ex tej tok Jesus toj joyb'ilti'j tu'n tajaw il (1.9-13). Ex junx tuk'i'l Matey nyolin ti'j taq'un Jesus kwitz kkyaqil xjal toj kaliley (1.14—9.50), tej tex Jesus toj Kaliley tu'n tpon toj Jerusalen (11.1-52) ex nyolin ti'ju' b'aj kyoju' mankb'il sman tten Jesus kxol xjal, ex nyolin ti'ju' tkamik Jesus ex tej tjaw anq'in kxol kyimni (caps. 11-16).Aju' u'j lu nyolin ti'ju' taq'un Jesus tb'incha. Expe' xi' nyolina'xi'x ti'ju' taq'un xb'ent myatzu' ti'ju' tyol, ex in tchik'b'a'n ti'ju' tipumal tu'n tkawin, ex atzu' nka'yina' tipumal nim tib'aju' kawb'il ex kyib'aju' tajaw il, ex nka'yinju' tipumal tu'nju' nkub' tnajsa'n kyil xjal ex tu'nju' t-xnaq'tzb'en. Tojtzunju' tpakb'al b'a'n lu nyolina' Jesus qa ate Tk'wal ichan. Atzunte Dyos nok tq'o'n tb'i te Nk'wale' k'u'jlanxi'x, aye'tzunju' xewb'aj kye taq'wix nok kq'o'n tb'i te Tk'wal Dyos, ex tej ttzyet kyu'n xjal xi' tqani'n knejel pale te qa atoq Krist, Tk'wal Dyos nimaqxi'x toklen, atzunte xittzaq'we'n kjalu: Iku', ayinatzune' chij (14.61-62).
