1Intma'n Qman Dyos kjalu:
Ktzajel nq'o'ne' jun kyq'iq' xitul
ti'j B'ab'ilon ex kyi'j kaldey.
2Knb'incha'ye' tu'n kysenjtz aj B'ab'ilon kyu'n kyajq'oj
kse'n nxq'iq'et triy toj kyq'iq',
knb'incha'ye' tu'n tkyaju' kytx'otx' mixti'tl najalte.
Ajtpon q'ij tu'n t-xitunjtz,
k'okyel q'oj ti'j te tkyaqil plaj.
3¡Kyb'inchanx kyten kysmaje' smajil!
¡kyq'onke' kyktone' k'uxb'il!
¡Lalun laqkyk'u'je' kyi'j ku'xun aj B'ab'ilon;
majx che kyb'yonqeku'ye' kyxjal te q'oj tejumajx!
4Che kjel woqonje xjal kyoju' b'e
toj tkyaqil kytx'otx' kaldey,
5b'a'nqa mache b'inchan il aj Israel ex aj Juda nwitze'
ex machmet kyil toju' tx'otx',
min ẍekyaj nkolb'e'nwe',
ayine' Dyos Manb'aj xjan nimwipumale',
nche ajb'en aj Israel weye' nim.
6¡Kukyoqe' ti'jxi' B'ab'ilon! ¡Che kyklom kyib'ju' kb'antel kyoq!.
¡Lalun che kyimkye' tu'n tpaj tilju' tnam!
Matxi' pon kmuj tu'n tok tu'me'l t-xel wu'ne',
ex oknq'a'ye' te tojx til.
7Juntoq k'wab'l q'anpwaq te' B'ab'ilon toj nq'ob'e'
intoq che tx'ojti kykyaqil xjal tu'n.
Intoq che k'wan nimaqtnam ti'ju' b'in lu
ex intoq naj kynab'l.
8Naqtzun myanim xkutz'aq B'ab'ilon majx makub'uchj.
¡Che oq'e' ti'j!
Kyiq'intze' q'a'nb'ilte tk'ixb'len qama q'anet.
9Matz'ok qq'ana'ne' B'ab'ilon,
extzun mixti'x xq'anet.
¡Le'ku'j! Qo'qe' anj
tojilex ttanam junjun,
mana' kub'tz'e'ysa'nte' twitz kuwxi'x,
majx majaw sutq'i'n toj kyq'iq'.
10Makanb'etju' qoklen tu'n Qman Dyos.
Wiqe'xe', qo'qe'ye' q'malteju' xtb'incha Qman Dyos
kyeju' te'qe' Syon.
11Tajb'il Qman Dyos tu'n tkub' t-xitu'n B'ab'ilon,
ex matxi' kub' tq'o'n xim lu
toj kyanmi nimaqkawil aj Medya.
A tu'me'l t-xel ja'lu tu'n Dyos
tu'n tpaju' b'inchanjtz ti'ju' tja te k'u'lb'il.
¡Kyb'inchanx kytene' talsmaj! ¡Kytzyunqeme' kolb'il!
12¡Kyq'onxe' techlal tu'n tok q'oj kyi'ju' nimaqtapi ti'j B'ab'ilon!
¡Kyq'onke' onilkyeju' xq'uqil!
¡Kyq'onqe'ke' ka'yil!
¡Kychq'onqe'xe' nenul ti'j!
Qu'n tb'incha Qman Dyos
ttenju' t-xim ex matb'incha
kyi'ju' najlqe' B'ab'ilon.
13Aya B'ab'ilon, atiya kyxol nimaq a'
ex nim tq'inumala ati,
¡Matxi' q'naxa tu'n tb'aja,
mixti'tl tu'n ttena ja'lo!
14Matxi' ttziya Qman Dyos nimtipumal tchwinqlala:
¡Kche nchma'ye' txqan tajq'oja, kse'n txqan ẍt'ikt'u'l,
ex che tzalajel ajtkub'ti'ja kyu'n!.
B'itz ajwalb'ilte Qman Dyos(Jer 10.12-16)15Tb'incha Qman Dyos tx'otx' tu'n tipumal,
kub' tkuwsa'n tx'otx' tu'n tnab'l,
ximan tej t-xitlik'u'n kya'j.
16Inxi'x tinun a' twitz kya'j tu'n,
njawtz muj tu'n tzmax ttxa'nxi' tx'otx',
nche qoptz'aj q'ankyaq tu'n toj jb'al
ex netztiq'i'n kyq'iq' jak'u'na' tu'n.
17Mixti'xkye xjal kynab'l kykyaqil ex xnakqe'.
Nnel kych'ixawju' b'inchal witzleb':
qu'n naq tilb'ilalqe' kyb'inchb'aj ex kyimniqe',
18naq ti'xti'qe' mixti'x kyajb'en, ch'ixb'ilx,
che b'elt-xitu'n Qman Dyos ajkyok toj xjel.
19¡Kxa' kse'nte Qman Dyos ja ajb'ena' Jakob',
b'inchalte tkyaqilju' ati!
Ejaw t-sk'o'n aj Israel te teku'.
A tb'iju' Qman Dyos nimtipumal.
Ajb'en B'ab'ilon te tz'e'ysb'il witzb'aj tu'n Dyos20¡B'ab'ilon, ikju'ya toj nq'ob'e' kse'n pojb'il,
aya nq'ojb'ile'!
Tu'nela nche b'aja' nb'uchi'ne' nimaqtnam
ex nche b'ajnxitu'ne' kawb'il.
21tu'nela nche b'aja' ntoqi'ne' chej ex chejil,
e'karwaj exqe' q'elkye.
22tu'nela nche b'aj ntoqi'ne' ichan ex qya,
e'tijwnaq ex ku'xun,
q'a ex txin
23tu'nela nche b'aj ntoqi'ne' k'ik'lel ex rit,
aq'unal ex wakx,
kawil ex onil nim kyoklen.
Tz'e'ysb'il twitz B'ab'ilon24Kywitzku'tzune' ja'lo
knq'a'ye' tu'me'l t-xel te B'ab'ilon ex kye kaldey
tojx kyil, tu'nju' myab'a'n kyb'incha ti'j Syon.
Ayine' Dyos Manb'aj nchin yolin.
25Nchin q'ojine' ti'ja, witz xitul,
nt-xitu'na tkyaqilju' tx'otx'.
Ayine' Dyos Manb'aj nchin yolin.
K'aq'pomel nq'ob'e' tz'e'ysalte twitza,
ktzajel ntoli'na kywitz pik
ex k'okyela kse'n jun witz tz'e'ynitl.
26Mixti'xtl jun ab'j kjel ajtkyaj xitja
tu'nwt tajb'en tu'n kyjaw b'inchet ja.
kjela jun chq'ajlaj tejumajx.
Ayine' Dyos Manb'aj nchin yolin.
27¡Kyq'onxe' techlal tu'n tok q'oj toju' tnam!
¡Kyq'ajtzanxe' chun ex kyb'incham kytenju' nimaqtnam
tu'n kyq'ojin ti'j B'ab'ilon!
¡Kyiq'inqe'tze' nimaqtnam toj Ararat kyi'j,
toj Mini ex toj Askyenas!
¡Kyq'onke' jun nejenel tu'n kytzaj tiq'i'n xjal q'ojil!
¡Kukytzaj lq'e txqan xjal te q'oj kyi'j kyu'ne' naku'j ẍt'ikt'u'l nche tx'u'jin!
28Kyb'inchame' kyten nimaqtnam tu'n kyok tzaqpaj ti'j;
kyb'inchame' kyten nimaqkawil aj Medya,
exqe' kykawil ex nimaq kyoklen toj kawb'il
ex toj tkyaqilju' tx'otx' tjaq' kykawb'il.
29Majaw lu'lunju' tx'otx' ex nyokchi,
qu'n ma japun t-xim Qman Dyos
tu'n tkyaju' B'ab'ilon te jun chq'ajlaj xob'ajilx.
30Min ẍe q'ojintlju' xjal aj B'ab'ilon te q'oj,
mache kyejten kyoju' kyja kuwsa'n,
mab'aj kyipumal,
expe' mache ok naku'j qya.
Macheb'aj kub'tzyu'n nimaqtnam
ex macheb'aj tz'e'ysa'n kyja.
31Inxi'x che ojqelan sanjelal
q'malte tqanil te nimaqkawil aj B'ab'ilon
qama kub'ti'ju' ttanam tejumajx.
32Mache kub'ten ajq'oj kyoju' b'e nche ik'x toj nin a',
macheb'aj kytz'e'ysa'n ja ta'qe' kolol
ex matxi' tz'ok xob'el kyi'ju' xjal te q'oj.
33Qu'n intma'n Qman Dyos nimtipumal,
janche ajb'ena' aj Israel, ikjalu:
¡Ikyte B'ab'ilonju' kse'n toj er
nb'aj wab'e'n toj tq'ij triyi'n,
ex lwiyxi'x kpomel q'ij tu'n tb'uyet twitz awal!, chi Dyos.
34-35Intma'n Jerusalen, nintnam toj Syon, kjalu:
Nnb'aj tq'uchi'ne' Nab'ukodonosor, nimaqkawil aj B'ab'ilon,
ex nxitwane',
inkyajtq'o'ne' kse'n pik'laq mixti'tl toj.
Kse'n jun nin txkup toj ninnjab' nxitb'ilq'u'ne',
noj tu'nju' kub' toj twitz wi'je',
atzu'n kyejten ex t-xon.
¡Tz'ok tu'me'lt-xeltz te B'ab'ilon tu'n q'oj tb'incha wi'je'!
¡Tz'ok tu'me'l t-xeltz kye kaldey kyu'n xjal ekub' b'yon weye'!, chij.
Yol tziyanjtz kye aj Israel36Intma'n Qman Dyos kjalu:
Knb'incha'ye' tnik'alilti'j teya,
k'okyel nq'o'ne' tu'me'l t-xel kyeju' tajq'oja.
Majx che kxel ntzqijsa'ne' nin a'
ex t-xiklil a' toj B'ab'ilon,
37naq jun ch'uq ttx'anqa'ntl ja kjel,
naq kyja xo'j k'okyela'tl,
lay b'entl kynajan xjal toj
kykyaqilx che xob'el toj ex taq'wixi'x.
38Kykyaqil che ẍch'il kse'nqe' b'alun
ex che tzanul kse'nqe' tal b'alun.
39Ajkytz'e'y tu'n kyaq,
kxe'l nq'o'ne' kyk'wa' tu'n kytx'ojti
ex tu'n tnaj kynab'l.
Che b'eltzuntz tu'n watl tejumajx
layx tzaj kyna'nkyib' toj.
Ayine' Dyos Manb'aj nchin yolin.
40Che kxelwiq'i'ntzuntze' toj b'iyb'il, kse'n ajkyxiq'i'n qpoj tman rit, chib' ex rit, chi Dyos.
Tkub'el tz'aq B'ab'ilon41¡Matxi' kub'ti'ju' nintnam B'ab'ilon,
ju' nim tyolinjtz toj tkyaqil twitz tx'otx'!
¡Majx nche b'ajxob'ju' nimaqtnam ajkyka'yinte!
42Matz'okxju' ninnjab' toj B'ab'ilon,
makyej mulq'aj tjaq' a'.
43Majx ẍekyaj chq'ajlajixju' nimaqtnam toj,
tzqij tx'otx'tl kyejni leb'a'n,
mix-a'lo'tl najli toj,
mix-a'lo'tl nnik' toj.
44Kb'el ntz'e'ysa'ne' twitzju' dyos B'el toj B'ab'ilon,
knb'incha'ye' tu'n tjatz t-xa'nju' xini tb'elq'u'n,
ex lay che kub'santl nimaqtnam te.
¡Matx che kub' tz'aqju' nimaqtapi ti'j B'ab'ilon!
45¡Kukyetze' na'tz, ntanam,
ex teyile junjun kyklom kyib'e',
teju' ntx'u'jile' kuw!.
46Lan che xob'e', lan che b'isune'
kyeju' tqanil nq'manjtz toju' tnam.
Chukchaqte tqanil kq'manjtzel atl junjun ab'q'i,
e'tqanil q'oj toju' tnam
ex q'oj kyxol kawil.
47Tzul tq'ijlalil
kb'el ntz'e'ysa'ne' kywitz witzleb' toj B'ab'ilon.
Tkyaqilju' tnam kb'el me'sset
kb'el noj kyu'n kyimni.
48Che tzalajelju' kya'j, tx'otx' ex tkyaqilju' ati
aj tkub'ti'ju' B'ab'ilon,
ajkyulju' xitulte te tb'a'nq'ob'kya'j.
Ayine' Dyos Manb'aj nchin yolin.
49Kb'el tz'aqte' B'ab'ilon
kyu'n txqan aj Israel eb'aj kub' kyb'yo'n
kyu'n txqan xjal b'ajkub' kyb'yo'n toj tkyaqil tnam, chi Dyos.
Tyol Dyos kye aj Juda ate' B'ab'ilon50Aye'ye' ẍeklete' teju' b'yojxjal,
kukyoqe' lan che kyajwe'ye',
expe' qa te'qe'ye' najchaq, che ximanqe'ye' ti'j Qman Dyos
ex kyna'ntze' Jerusalen.
51Inkyma'ne': nqo ch'ixwiye'
ajqb'inteye' nqo wulinjtze'.
Nktxunjtz qwitze' tu'n ch'ixb'ajil,
qu'n matxi' che b'jo'kxju' najchaq xjal
tzmajx toju' najb'il xjan.
52Atzunte Qman Dyos ntma'n:
Tzul q'ij kb'el ntz'e'ysa'ne' kywitzju' witzleb' toj B'ab'ilon,
ex che oq'elju' k'ixb'niqe' toj tkyaqil ttx'otx' B'ab'ilon.
53B'a'nqa majaw kylaq'b'a'n kyib' aj B'ab'ilon twitz kya'j
tu'n tkub' kyq'o'n kyja kuwsa'n tzmajx jawl,
ex che kxel nchq'o'ne' kyajq'oj xitulkye tzmajx na'tz.
Ayine' Dyos Manb'aj nchin yolin, chi Dyos.
Tkub' xitj B'ab'ilon54Q'ojq'ojqe' xjal nche ẍch'in tu'n k'ixk'oj tzmajx B'ab'ilon,
nul jun tq'ojq'ojil tzmajx toj kytx'otx' kaldey.
55Ate Qman Dyos nxitunte B'ab'ilon
ex ma npon b'aj kyẍch'in.
Ikyqe' ajq'oju' kse'n ttolob' ninnjab' njumin,
che ul ti'j kse'n jun q'ankyaq.
56Mache ul xitulte B'ab'ilon;
matxi' che tzyetju' kyxjal q'ojil kyu'n
ex mache b'ajkytoqi'n kysmaj.
Qu'n intq'o'nte Qman Dyos tz'e'ysb'il kywitz xjal kse'nxu' kyil.
57Intma'n Nimaqkawil, ju' Qman Dyos nimtipumal, kjalu:
Che b'elntx'ujsa'ne' kynejel aj B'ab'ilon,
e' kyajnab'lil ex kykawil,
exqe' nim kyoklen toj kykawb'il ex e'kyxjal te q'oj,
che b'eltzuntz tu'n wal tejumajx
layx tzaj kyna'nkyib'.
58Nxinma'ne' ayine' Dyos Manb'aj:
Majx che b'elxitu'n nimaqtapi ti'j B'ab'ilon tejumajx,
ex che b'eltz'e'ysa'n tjpel nimaqqe',
naq te twa q'aq' soka' eb'aj sikti nimaqtnam ti'j, chi Dyos.
Xiq'i'n tpakb'ab'l Jeremiy tzmax B'ab'ilon59Xitq'o'n Jeremiy t-sanjelal Dyos jun oqxenj ti'j Serayiy tk'wal Neriy ex tchman Maaseyiy, toj tkyaji'n ab'q'i nkawin Sedekyiy, nimaqkawil toj Juda. Xi' Serayiy tuk'i'l nimaqkawil Sedekyiy tej txi' B'ab'ilon, atoq b'inchalte tten tkuẍb'il nimaqkawil.
60Tz'ib'a'ntltoq tqanil tu'n Jeremiy toj jun u'j ti'j tkyaqilju' xitb'il atitoq tu'n tul ti'j B'ab'ilon, tkyaqil ja'lu tz'ib'a'n toju' u'j,
61ex xitma'n te Serayiy kjalu: Ajtpona B'ab'ilon, lan tzik'tna'l tu'na tu'n tjaw t-ẍch'i'na tkyaqilju' tqanil lu.
62Kxel tma'ntzuntza: Nman Dyos, oje tmaya qa kb'el t-xitu'na najb'il lu, ex mix-a'lo'tl knajal tzalu, lay che najantl xjal ex alu'mj toj, qu'n kjel tq'o'na te jun chq'ajlaj tejumajx, chiku'ya.
63Ex ajtb'aj t-ẍch'i'na u'j lu, xmonka ti'j jun ab'j ex xonxa toju' nin a' Ewprate,
64ex q'manxa: Iktzu'n kxela' mulq'aju' B'ab'ilon, ex lay jawe'tl toju' xitb'il ktzajel tchq'o'n Qman Dyos tib'aj, chiku'ya, chi Jeremiy xitma'n.
Atzu' nche pon b'aja' tyol Jeremiy tzalu.
Who We AreWhat We EelieveWhat We Do
2025 by iamachristian.org,Inc All rights reserved.
