Is 47 - Mam Ostuncalco Bible

Kb'elti'j B'ab'ilon

1Kutku'tza tnam B'ab'ilon, ikju'ya kse'n jun txin na'm tmje,

ex qeku'ya toj quq;

kutku'tza toju' tkawb'ila, tnam Kalda, qpoj txin,

ex qeku'ya twitz tx'otx',

qu'n lay txitxko'ntla

qpoj txin ex tb'anilxi'xa.

2Luju' ka tu'n tchena

ex chenku'ya triy,

iq'imila ttxo'wa toj twitza,

laq'b'a'nktza tana,

tu'n kykyaj q'ancha'lixju' tqana,

kutik'x jlajina toj nin a' tu'n tqana;

3ẍb'iqb'anku'tib'a

tu'n tkyaj q'ancha'lixju' ttz'a'lb'ila.

K'okyel tu'me'l t-xel wu'ne',

ex mix-a'lo'te' kmyolte tu'n tkub'sb'il, chi Dyos.

4Intma'n klolqe,

ju' Dyos Xjan kye aj Israel,

a tb'iju' Dyos Manb'aj nimtipumal, kjalu:

5Qeku'ya tnam Kalda

lalun ẍch'ina qpoj txin,

kutokxa toj qxopin,

qu'n lay txitxko'ntla

nimaqkawil kyib'aj nimaqtnam.

6Tej ttzaj ntx'u'jile' kyi'ju' ntaname',

xinq'o'ne' ntaname' tu'n tkub' tz'aq toj tq'ob'a

ex el kych'ixaw tu'na.

Min tzaj laqj tk'u'ja kyi'j,

kub' tq'o'na tkawb'ila kuwxi'x kyib'aju' tijwnaq.

7Tmatzuntza: chin kawile' tejumajx, chija;

mixti'te ximana kyi'ju' ti'xti' lu

ex min ximana kyi'j ja che pomela' b'aj.

8Qu'mtzun, b'intzju'ya lu,

qya nanq'ina toj achb'il, min nb'ajx tk'u'ja toju' tkawb'ila,

ex nkub' t-xima'na:

O'qinkxe', mixti'te juntl;

lay chin kyej we' kyimni nchmil

ex lay chin kyaje' mixti' wale', chija.

9Naq minab'en, toj jun q'ijx,

che ulju' xitb'il lu tib'aja:

kjela kyimni tchmila ex mixti' tala,

b'a'nqa nxi'x ajpkab'ina ex nim t-sb'ub'la.

10Q'uqlixi'xtoq tk'u'ja toju' tb'inchb'aja myab'a'n,

ex kub't-xima'na: Mix-a'lo'te nka'yin wi'je', chija.

Makub' t-sb'u'ntib'a kyu'n tnab'la ex tojtzqib'la.

Makub' t-xima'na:

Ayine' ex oqinkxe', chija.

11Tzultzunte' xitb'il tib'aja,

ex lay b'ent tmqet twitz tu'n t-sb'ub'la;

tzul jun xitb'il tib'aja

lay b'ent tmyet tu'na;

mixti' xima'n tu'na tzul jun taq'wix tib'aja

mixti' tnab'ena ajtul tib'aja.

12Ljonxa tajpkab'i'na

exju' txqan tajk'ayi'na ntb'incha'na

ntb'incha'na atxi'x ku'xuntoqa,

atzun qil qa k'ajb'el teya,

achaq qil qama che xob' xjal teya.

13Nimqe' q'ol tnab'la matxi' che ten, matxipe' siktiya kyxol.

¡Kuna' kytzaju' t-xjala nelkynik' kye che'w,

aye' npon kynab'l aj t-xikyka'yi'n che'w,

aye' nche q'mante titi' tzul, xjawi'nchaq,

ex noktilil kyu'n tu'n tkleta!

14Ka'yintzpetzuna, ikqekye' kse'n ttxa triy:

nche b'aj tu'n q'aq',

min nb'ent kyklontekyib' teju' q'aq'.

Qu'n mya jun q'aq' tuk'i'l ttxalq'aq',

tu'nwt kykub' qe q'eẍnel ti'j.

15Iktzu'n eb'aja'ju' tajpkab'a,

ma'xi'x che yoline' kyuk'i'l toj tkyaqilju' tchwinqlala.

Teyilex junjun toju' tb'e tzpetni

ex mix-a'lo'te xklonteya.