Is 22 - Mam Ostuncalco Bible

Tpakb'alil ti'j Jerusalen

1Tpakb'al ti'ju' b'ya' naku'j witzik':

¿Titzu'n nb'aj, kykyaqil nche jax kyib'aju' ja?

2Nche b'ajtilj xjal ex nim tq'ojq'ojel toju' nintnam,

nintnam majx ntzalaja,

min ẍekyimju' t-xjala tu'n k'uẍtx'e'nb'il,

min ẍekyim toj q'oj;

3ojqel ẍeb'je'tz kykyaqilju' tnejenela,

ex tej ẍeoq kye' smaj mache okx jpu'n.

Mache b'ajx oqu' t-xjala kuwqe'xi'x najchaq,

tetzunj ẍetzyet mache b'jo'kx jpu'n.

4Qu'mtzun nmane': che lq'eqemile' wi'je',

wajb'ile' tu'n woq'e' tuk'i'l tk'ayil;

lan che oktene' q'uq'b'alte nk'u'je'

tu'nju' xtk'ulb'a ntaname'.

5Qu'n oje tchaq' Qman Dyos nimtipumal

tu'n tpon jun q'ij b'isb'ajilx,

te xitb'il ex chuksb'il

toju' b'ya' te yek'b'il.

Nche b'jawxitu'n nimaqtapi;

npon kyq'ojq'ojelju' sich' tzmax kywi' witz.

6Matxi' b'entkyten tal kysmaj aj Elam,

ex luqe' teqe'kx toj kykarwaj ex kyi'j kychej;

matx b'je'tzkyiq'i'n aj Kyir kykolb'il.

7Matx che kub'chmet karwaj kyoju' tb'anilxi'x tb'ya'ya,

ex nche ponju' chejil q'ojil ttziju' nintnam.

8Matxi' kyej kolb'e'n kolb'ilte Juda.

Kkyka'yine' k'ub'l aq'unb'il te q'oj toju' Ja toj K'ul toju' q'ij lu.

9Kyile' nim k'atxa'j ti'ju' Ninttanam Dab'i ex nnoju' tkb'el a' ati kub'l;

10Eb'aj kyka'yi'ne' ja toj Jerusalen ex b'ajkyxitu'ne' junjun tu'n tkuwsetju' nintapi.

11Jaw kyb'incha'ne' jul kyxolju' kab'e' nimaqtapi te tkb'elju' a' netz toju' ojtxi' tkb'el a'. Extzun min okkyq'o'n kywitze' ti'ju' b'inchante tkyaqil, aj kub'ni ximante ojtxi'.

12Mache txokliye' tu'n Qman Dyos nimtipumal toju' q'ij lu

tu'n kyoq'e' ex tu'n kyb'isune',

tu'n tel kyjon kywi'ye'

ex tu'n tok kyq'o'n kyxb'alune' te b'is techel k'ixk'oj.

13Aye'tzunkye' nche b'aj saqchane' ex nche b'ajtzalaje',

nche b'yo'n wakxe' ex rit,

nche ch'yon chib'je' ex nche k'wan b'ine'.

Qoqe' wan ex qoqe' k'wan,

qu'n najchi'j qoqekyim, chechije'.

14Atzunte Qman Dyos nimtipumal makub' tyek'u'ntib' nwitze'

ex matzaj tma'n toj nẍkyine':

lay kub' nnajsa'ne' il lu;

kche kyimelkye', chij.

Tyolku' Qman Dyos nimtipumal.

Ti'jku' nim toklen nka'yinte tja nimaqkawb'il

15Tzaj tma'n Qman Dyos nimtipumal weye':

Kutxi'ya tk'etz Seb'na, nuk'ul toj tja nimaqkawb'il, ex q'manxa te:

16¿Titi' ntb'incha'na tzalu,

mujqa alkye xiq'onte toklena

tu'n jawtb'incha'na jun muqb'il tzalu,

tu'n tb'inchante jun muqb'ilteya tzmax jawtl

ex tu'n tokx tlku'na jun tojb'ila toj pik?

17Kxelxona najchaq tu'n Qman Dyos,

kse'n ntb'incha'n jun ichan kuw,

Ktzyetela tu'n tuk'i'l tipumal,

18kxel tololona tu'n kse'n jun xpo'tz

kxelxona tu'n toj jun tx'otx' nim twitz.

Atzuntzu' kkyimela'ya,

atzuntzu' che kjela' karwaj nim kyoklen teya

ex ch'ixb'ilx k'elela'ya te tja nimaqtkawb'ilu' tajawa.

19K'elel wiq'i'na toju' toklena,

k'elel wiq'i'na ti'ju' taq'una.

20Atzu'n q'iju' ktzajel ntxko'ne' nmajine',

aju' Elyakyim tk'wal Ilkyiy;

21K'okyel nq'o'ne' t-xb'aluna ku'j ti'j:

k'okyel nq'o'ne' jtz'ob'l tk'u'ja nim toklen tk'u'j

ex kxe'l nq'o'ne' toklena te.

K'okyel naku'j manb'aj kye' aj Jerusalen

ex teju' tnam aj Juda.

22Ti'j tqul kb'ela' nq'o'ne' tal tja Dab'i;

mix-a'lo' kb'entel tjpunteju' oktjqa'

ex mix-a'lo' tu'n tjqonteju' matjup.

23K'okyel te tq'uqb'il te ninb'il

kyeju' toj tja tma'n.

Knb'incha'ye' tu'n tkyaj kuw toj toklen,

naku'xwitloj jun klawẍ.

24Ti'j te kb'antela' kyok ye'

tkyaqilju' nim toklen toj tja tman

ex kyxol tkyaqilju' tyajajil,

tkyaqilju' tkb'el k'wab'j k'ok'e'qe',

e'k'wab'l ex k'ok'e' xar.

25Tojtzu'n q'ij lu,

k'eletz tz'aqu' klawẍ jaokxna' poji'n

k'eletz xb'oqj ex k'elel tz'aq,

ex tkyaqil tixti' yo'ltoq ti'j che b'el laqj, chiku'ya te, chi Dyos.

Aku' Qman Dyos nimtipumal q'mante.