Is 28 - Mam Ostuncalco Bible

Ab'tzib'l kye aj Samarya

1¡Qab'anx twitzju' tnam Samarya,

tninb'il ex tkoron Eprayin, ju' tnam twi' tx'ujtenil;

ikyju' se'n tb'anil b'ech lwiy nkub' ch'uẍj,

njawlq'e tib'aju' tb'anil tx'otx' toj b'ya',

ninkytanam xjal naq nche tx'ujti!

2Atitlte' jun ichan kuw tu'n Qman Dyos,

kuwxi'x kse'n saqb'aqun tk'i'kyq'iq',

kse'n q'ankyaq nxitun, kse'n txqan jb'al,

kse'n txqan tnimal a' xob'ajilx.

Kb'el t-xonju' tnam Samarya twitz tx'otx',

3ex kb'el twab'e'n tninb'il ex tkoron

ttanam Eprayin twi' tx'ujtenil.

kyu'n tqan

4Extzu'n tzqij b'ech tb'anil wiqb'il lu

njaw jawlq'e tib'aju' tb'anil tx'otx' toj b'ya',

ikyk'okyela' kse'n tnejel twitz iw toj q'ijal;

qa a'lo' jun sokka'yinte

exqa matz'okttzyu'n, kxel tlo'n.

5Tojtzu'n q'ij lu

k'okyel Qman Dyos nimtipumal te jun koron,

jun achb'il tb'anilxi'x kyeju' che kjelten toju' ttanam,

6kt-xewsa' tnik'alilti'j kye ajkawil toj kawb'il

ex che tkuxa' xjal te q'oj nche kolon ti'ju' nintnam.

Oqxenb'il ex yol ttziya'n te Jerusalen

7Ate'x txqantl nche lu'lun tu'n b'in,

nche ẍutujla tu'n q'e'n kuw tq'ob',

e'pale ex sanjelal nche ẍutujla;

tu'n q'e'n kuw tq'ob',

nche sutj tu'n b'in

nche ẍutujla tu'n q'e'n kuw tq'ob',

nche lu'lun ajtb'jo'k toj kywitz

tx'ujtenilqe' ajtkub' kyq'o'n tz'e'ysb'il kywitz xjal.

8B'ajni txa'j kykyaqilju' mes tu'n xab'en mijsoq'x,

mixti'xte jun piẍ ẍtilunwt.

9Nche yolin wi'je' ex nkyma'n:

¡Qa matzajta xnaq'tzalqeye',

qama tzaj t-xnaq'tza'na matxi' tzaj tyek'u'n Dyos teya!

¡Naku'wtloj b'o's k'walqo'ye'

10tzma nb'ent u'j qu'ne' kjalu:

b'a, b'e, b'i, b'o, b'u! chechij.

11Qanatzun min xikyb'i'n,

kxe'l q'met toj yol mixti' ttx'o'lajil, toj jun yol min ojtzqi'n,

kse'nx kyolila' Dyos teju' tnam lu.

12Ojetoq tmate Dyos kye ikjalu:

Luju' nak'b'il lu,

luju' ojb'il lu;

tz'ojlanju' matxi' sikti, chij.

mixtzunti'x kyej tu'n t-xikyb'i'n.

13Qu'mtzun kyolil Qman Dyos kye'

naku'xwitloj b'o's k'walqe'

tzma nb'ent u'j kyu'n.

Ajtzun kyxi' b'et che xe'l pak'chaj,

che k'ixb'el, che kb'eltz'aq toj xpatxab',

che tzyeteltzuntz.

14Kyb'inku'tzune' tyol Qman Dyos,

xjal min nche ximane'

nche kawine' tib'aju' tnam Jerusalen.

15Inkyma'ne':

Matxi' kyejb'ent jun qyole' tuk'i'lju' kamik,

jun yol tuk'i'lju' kawb'il kye kyimni,

tu'ntzun lalun kub'qi'je'

tu'n yajb'il kuw ajtul kanun;

matxi' qjoye' qewb'ile' toj chajyolil,

kolb'il toj sb'ub'l, chechije'.

16Qu'mtzun ntma'n Qman Dyos:

Kb'el nq'o'ne' jun ab'j toj Syon,

jun ab'j sk'o'n ex twi' wi'yal,

a ab'ju' k'okyel nim toklen

ex k'okyel te tq'uqlil ja.

Alkyetzun maqetk'u'j ti'j, k'anq'il toj nak'b'il.

17K'ajb'elju' tnik'alilti'j plonb'ilte ja wu'ne' ajtjaw b'inchet,

atzu'n ttzinunal k'ajb'el nib'elb'il, chij.

Atzu'n kolb'il matxitoq kyjoye' toj chajyolil

kb'el xitj tu'n saqb'aqun,

ex kxeltiqa'n a' jankyklo'na' kyib'e'.

18Kb'el naju' kyyol b'entti'j tuk'i'lju' kamik,

exju' kyol b'entti'j tuk'i'l kykawb'il kyimni kjel mixti' toklen.

Tzulju' yajb'il xob'ajilx

ex che b'elwab'e'ne' tu'n.

19Che yajtele' tu'n alchaq ajtul.

Tzul tkyaqil q'ij, q'ijtl ex qonik'an.

Naqpe' ajt-xikyb'i'ne' tqanil che lu'lule'.

20Kse'n ajkykub' kẍe tib'aj jun kuẍb'il b'o'stwitz

ex se'n tu'n kyktxunte kyib'e' tu'n jun b'o's xb'alun.

21Ktb'incha' Qman Dyos kse'n tb'incha twi' witz Perasim,

ktb'incha' kse'n tb'incha toju' b'ya' Kab'aon,

tu'n tb'inchanteju' taq'un, maskye junxi'ku' tka'yinx,

tu'n tjapunju' taq'un, ju' ati toj ewaj.

22¡Lantzun che oktle' mixti' kynab'le'!,

qu'n naqtz'ok jitz'lixi'xtlju' xpatx'k'uxb'il kyi'je';

qu'n matxi' nb'iye' qa matxi' tchaq' Qman Dyos nimtipumal

xitb'il teju' tnam lu.

23Kyb'inkupe'ye', kyb'intze' kxe'l nma'ne' kyeye',

kyb'intzju'ye' nyole' b'a'nxi'x:

24Kse'n ajt-xi' jun xjal awal,

myanaqwit nq'u'n tkyaqil tq'ijlalil

mujqa naqwit nkjon twitz tx'otx'.

25¿Ma myatzun naqa xb'aj tkjo'n tx'otx',

nxitchto'n tijajil eneld mujqa komin,

ex nxitawa'n triy toj txoli'n,

ex nxitawa'n seb'ad ex ab'en ti'jile?

26A Dyos nxnaq'tzante se'n ktb'incha'ya'.

27Qu'n min ntriyitte' eneldo,

ex min nik'x tolit jun karet tib'aju' komin;

naqna' nkub'jette' eneldo tu'n jun tze

ex ikxju' komin.

28In triyitte' triy, mitzunya o'kxwit ntb'inchetju' ti'j;

inex tolit karet tib'aj

ex nel pa'yitju' twitz triy, extzun lay kupch'ettju'.

29Ikxtzu'n ntnk'u'na' Qman Dyos nimtipumal t-xim.

Te lab'te'n qexi'xju' t-xim ate',

ex nche tb'incha'n tuk'i'l nab'l.