Sal 51 - Mam Ostuncalco Bible

Q'aq'antz tk'u'ja wi'je' Nman Dyos

1Nman Dyos, q'aq'antz tk'u'ja wi'je';

najsanku'ya wile', qu'n nimta tk'u'jlalil.

2¡Chin ttxjoma te tkyaqilju' nb'inchb'aje' myab'a'n!

¡Chin t-ẍtilsama te tkyaqilju' wile'!

3In kane toj nwitze' qa myab'a'nju' nb'inchb'aje' twitza;

minti' in ik'tna'lju' wile' wu'ne'.

4Matxi'xi'x chin b'inchan ile' twitza, extzun twitzku'ya,

myab'a'n xnb'inchaye', aku'xi'xju' nel tik'u'na.

Qu'mtzun tu'me'lte' tz'e'ysb'il nwitze' tu'na;

lay tz'el wik'u'ne' se'n ẍinoka'tq'ona toj xjel.

5Axxi'x, aj ilqinwe' atxi'x witz'jlene';

aj ilqine' atxi'xj tej toklen iqa'n nwi'ye' tu'n ntxuye'.

6Axxi'x, intk'u'jla'nta' xjal ax yolin,

ex makub' tq'o'na nab'l toj wanmiye'.

7Chin t-ẍtilsama tu'n k'ul isopo, tu'n nkyeje' ẍnu'l;

chin ttxjoma, tu'n nkyeje' saqxi'x kyetwitz txun che'w.

8Chin ttzalajsama b'a'nxi'x;

q'ontz jumajtlju'ya tzalajb'il weye', maskye matxi' kub' ttz'e'ysa'na nwitze'.

9Laq'b'amilju'ya wile' twitza

ex najsanku'ya nb'inchb'aje' taq'wix.

10Nman Dyos, ¡ẍtilsama wanmiye'!,

¡chin tch'exb'ema tu'n wokye' tnik'alti'j!

11Lalun chin nel tlaq'b'a'na twitza

ex lalun tz'el tiq'i'nju'ya T-xewa woje'.

12Chin ttzalajsamtla tu'n tzalajb'il ti'ju' kolb'il tu'na;

q'onku'ya toj wanmiye' tu'n wokslane' b'a'n teya,

13tu'ntzun txi' nyek'u'ne' tb'eyila kyeju' min nche okslan teya

tu'n tanjtzkyi'ju' aj il tk'etza.

14Nman Dyos klol weye',

chin tkloma tu'n lan chin b'yon xjale',

kxe'l npakb'a'ntzuntze' tuk'i'l b'itz qa tz'aqliya.

15Nman Dyos, jqomju'ya ntziye',

tu'ntzun tjaw nnima'na kyu'n b'itz.

16Myana'teju'ya tajb'il chojb'il ex oyaj tz'e'ysa'n;

ma'wtlo txi' nq'o'nwe' teya, naqwit intzalaja ti'j.

17Aye'kye chojb'ilju' b'a'n toj twitza, Nman Dyos, aju' tu'n ttzaj tb'is xjal tu'n tpaj til;

¡Nman Dyos, nin nnel tik'u'nteju'ya xjal matz'anjtzti'j tanmi!

18B'inchama b'a'n teju' tnam Syon, tu'nju' t-xtalb'ila;

wab'a'nktz jumajtlju'ya nintapi ti'jele Jerusalen.

19Ktzalajeltzuntza kyi'ju' chojb'il q'ma'n toj chaq'b'il,

kyi'ju' oyaj ex kyi'ju' chojb'il k'ok'sb'il,

che b'eltzun q'o'n qpoj tman wakxtz tchojb'il tib'aj q'olb'eb'l teya, chiju' b'itzal.