Neh 11 - Mam Ostuncalco Bible

Aye' che najal toj Jerusalen

1E'kub' najanju' ati kyoklen toju' kawb'il toj Jerusalen, aye'tzu'n txqantl xjal te nintnam xikyse'n tu'n tel yal jun kyxol lajoj jatu'n txi' najal toj Jerusalen, ju' xjan nintnam, aye'tzu'n b'eljoj chaqtl tu'n kykyajten kyoju' txqantl tnam.

2Aye'tzu'n tnam xjal xikyqani'n b'a'n kyib'aju' kyaq'kyib' tu'nkyk'u'j tu'n kynajan toj Jerusalen.

3E'kub' najanju' aj Israel, e'pale, e'aj Leb'i, e'ajb'el toj tja Dyos, exqe' kyyajajilju' e'ajb'en te Salomon, kyoju' nimaqtnam toj Juda, teyile junjun tojilex ttanam ex ttx'otx'. Aye'tzu'n nejenel nimaq kyoklen eb'ju'l jumajtl, e'kub' najan toj Jerusalen, atiju' kyb'i tz'ib'a'n.

4Junjun kyyajajil Juda ex B'enjamin e'kub' najan toj Jerusalen, kyxolu' tyajajil Juda, aye': Atayiy, tk'wal Osiy, ju' tk'wal Sakariy, ju' tk'wal Amariy, ju' tk'wal Sepatiy, ju' tk'wal Maalalel, tyajajil Pares;

5ex Maaseyiy, tk'wal B'aruk, ju' tk'wal Kolose, ju' tk'wal Asayiy, ju' tk'wal Adiy, ju' tk'wal Joyarib', ju' tk'wal Sakariy, ju' tk'wal Siloni.

6Junk'al oxnaq wajxaq (468) kyb'aju' tyajajil Pares te kykyaqilju' e'kyajten najal toj Jerusalen, kykyaqilxu' ichan lu b'a'nqe' te q'ojil.

7Atzu'n kyxolju' tyajajil B'enjamin, aye': Salu, tk'wal Mesulam, tk'wal Joed, tk'wal Pedayiy, tk'wal Kola'yiy, tk'wal Maaseyiy, tk'wal Ityel, tk'wal Isayiy;

8Exqe' Kab'ay ex Salay ju' titz'in mo ttzik. Kab'k'al qaqnaq wajxaq (928) kyb'aj te kykyaqil.

9Atoq Joel, tk'wal Sikri, nejenel kye; atzun Juda, tk'wal Senuwa, tkab' nejenel teju' nintnam.

10Atzu'n kyxolju' pale aye': Jedayiy tk'wal Joyarib', Jakyin,

11ex Serayiy, tk'wal Ilkyiy, ju' tk'wal Mesulam, ju' tk'wal Sadok, ju' tk'wal Merayot, ju' tk'wal Aytub', nejenel nim toklen toj tja Dyos.

12Exqe' tuk'i'l, ju' ntoq che aq'unan toju' ajb'eb'l toj tja Dyos, kab'k'al junaq kab'e' (822) kyb'aj; ex Adayiy tk'wal Jeroam, ju' tk'wal Pelaliy, ju' tk'wal Amasi, ju' tk'wal Sakariy, ju' tk'wal Pasur, ju' tk'wal Malkyiy.

13Kab'lajnaq kab'e' (242) kyb'aju' kywitze'l, nejenelqe' te junjun ja xjal; ex Amasay, tk'wal Asarel, ju' tk'wal Asay, ju' tk'wal Mesilemot, ju' tk'wal Imer.

14Qaqnaq wajxaq (128) kyb'aju' kywitze'l, ichan b'a'nqe' te q'oj, ex a Sab'dyel, tk'wal Kyedolim, nejenel kye.

15Atzu'n kyxol aj Leb'i: aye' Semayiy tk'wal Asub', ju' tk'wal Asrikam, ju' tk'wal Asab'iy, ju' tk'wal B'inuy;

16exqe' Sab'tay ex Josab'ad, kyxolju' nejenel kye aj Leb'i, toj kyq'ob'toq ta'ju' aq'untl ti'jxi' tja Dyos;

17ex Mataniy tk'wal Mikayiy, ju' tk'wal Sab'di, ju' tk'wal Asap, nejeneltoq kyeju' k'loj b'itzal intoq che b'itzanteju' b'itz te aq'b'il chjonte ajtpon kmoj te na'j Dyos; ex B'akb'ukyiy, ju' tkab' toju' kyja, ex Ab'da, tk'wal Samuwa, ju' tk'wal Kalal, ju' tk'wal Jedutun.

18Kyajlajnaq kyaje' (284) kyajlalu' aj Leb'i e'kyajten toju' nintnam xjan.

19Aye'tzu'n xq'uqil ttzija: aye' Akub', Talmon exqe' kywitze'l, wajxaqnaq kab'lajoj (172) kyb'aj intoq che xq'uqin kytzi tja Dyos.

20Aye'tzu'n txqantl aj Israel kykyaqil, ex txqantl pale ex aj Leb'i, eb'ajkub' najan kyoju' txqantl tnam te Juda, teyile junjun tojx tx'otx';

21maskyepe' e'kub' najanju' ajb'el toj tja Dyos toj Opel, aye' kynejenelu' Sya ex Kyispa.

22Atoq Usi nejenel kye aj Leb'i toj Jerusalen, ju' tk'wal B'ani, ju' tk'wal Asab'iy, ju' tk'wal Mataniy, ju' tk'wal Mikayiy, tyajajil Asap, aye'ju' intoq che kub'nej b'itzalkyeju' b'itz toju' ajb'eb'l toj tja Dyos,

23qu'n ojetoq tchaq' nimaqkawil ti'ju' tu'n kyb'inchante b'itzal atl junjun q'ij.

24Atoq nokxju' twitz nimaqkawil tu'n tnk'et alkyexku' ti'xti' nb'aj kyxol xjal, a Petayiy, tk'wal Mesesab'el, ju' tyajajil Sera, tk'wal Juda.

Txqantl jae'najana' aj Israel ti'jxi' Jerusalen

25Junjun kyxolju' tnej tyajajil Juda e'kub' najan kyoju' tnam Kyiryat-arb'a, Dib'on, Jekab'seel,

26Joswe, Molada, B'et-pelet,

27Asar-swal, B'eerseb'a,

28Siklaj, Mekona,

29En-rimon, Sora, Jarmut,

30Sanoa, Adulam, Lakyis ex Aseka, kyuk'i'lxi' kykojb'il ex kynajb'il. Eb'ajkub' najan tzajx B'eerseb'a ponx tzmax toju' b'ya' Inom.

31Aye'tzu'n kyxolu' tnej tyajajil B'enjamin eb'ajkub' najan kyoju' tnam Kyeb'a, Mikmas, Ayiy, B'etel, kyuk'i'lxi' kykojb'il;

32ex kyoj Anatot, Nob', Ananiy,

33Asor, Rama, Witaym,

34Adid, Seb'oyim, Neb'alat,

35Lod, Ono, ex toju' b'ya' kyeju' kno'n tb'inchanjtz junjun ti'xti' kyu'n.

36Expe' xiq'o'n kytx'otx' junjun aj Leb'i toj kytx'otx' tyajajil Juda ex toj kytx'otx' tyajajil B'enjamin.