2 Co 6 - Mam Ostuncalco Bible

1Ja'lotzun, ayo'ye' nqo aq'unane' tuk'i'l Dyos, nqo kub'sane' kyeye' tu'n kk'monteye' t-xtalb'il Dyos matxi' tzaj tyek'u'n kyeye'.

2Qu'n ntma'n Dyos toj Tu'jil:

Xinb'i'na tojku'xi'xju' kmuj;

ex xiwoni'na toj tq'ijlalil kolb'ilteya, chiju' tz'ib'a'n.

Ate tq'ijlalilju' ja'lo. ¡A te tq'ijlalil kolb'ilju' ja'lo!

Yek'b'ilte taq'un Pawl te chq'o'n

3Mixti' junqe' myab'a'n nkub' qyek'u'n te juntl, tu'n lalun kma xjal qa myab'a'n qaq'unb'ene'.

4Inpe' qyek'u'n qib'e' qa tmajin Dyos qo'ye', inxi'x ik'x nim yajb'il qu'ne', ati maj min nkanun qwaye', ntzaj xitb'il qi'je',

5nqo jikunjtze', nqo okx jpu'ne', nche jaw tilj xjal qi'je', nqokub'o'lje' toju' nim aq'untl, nel qwatle' ex nqo naje' tu'n we'yaj.

6Ex nqyek'u'ne' tu'n b'a'n qchwinqlale', tu'n qojtzqib'le' ti'ju' ax, nten qpasensi ex b'a'nxjal qo'ye', tu'n ati Xewb'aj Xjan quk'i'le', ati qk'u'jlalile' axxi'x,

7tu'n ati tipumal Dyos quk'i'le', nqpakb'a'ne' ax. Nxiqma'ne' tu'me'lxi'x te qq'ojb'ile' ex te kolb'ilqeye'.

8Junjun maj nqo nimanjtze', ex junjun maj nqo ilinjtze'; Junjun maj b'a'n che yolin xjal qe'ye', ex junjun majtl nche yolin xjal myab'a'n qi'je'. Nqo okq'o'ne' chalyol, extzun nxi' qma'nqe' ax.

9Nqo okq'o'ne' min ojtzqi'n qo'ye', extzun ojtzqi'n qoxi'xe'. Nneljeqi'je' kukxju', itz'qo'x tzune'; ntz'e'ysanjtz qwitze', mixtzunti' nqokub' b'yo'ne'.

10Naku'j b'is to'qo'ye', extzun nqotzalajqe' kukxju'; naku'j prow qo'ye', nimtzun xjal nche q'inumax qu'ne'; naku'j mixti'x ati qeye', extzun tkyaqil ati qeye'.

11E'ntzik ex e'witz'in aj Korint, matxi' txiqma'ne' kyeye' axxi'x; ex tu'n tkyaqil qk'u'je'.

12Mixti' jun ti'xti' nkub' qewa'ne' kyeye'; aye' kyeju'ye' mixti' kyk'u'je' qi'je'.

13Nchin kub'sane' kwitze', kse'n jun manb'aj nkub'san kye tk'wal, atiwt kk'u'je' wi'je', kse'nwe' ati nk'u'je' kyi'je'.

Ayo' tja Dyos itz'

14Lan tz'ok kmujb'a'n kyib'e' kyuk'i'l mya okslal. ¿Ma jakutzun tmujb'atib' tnik'alilti'j tuk'i'l mya tnik'alilti'j? ¿Ma jakutzun tmujb'atib' spik'un tuk'i'lju' qlolj?

15¿Ma jakutzun ten mujb'ab'l kxol Krist tuk'i'l tajaw il? Ex layx ten mujb'ab'l kxol jun okslal tuk'i'l jun mya okslal.

16Layx ten mujb'ab'l kxol tja Dyos kyuk'i'l twitzleb'. Qu'n tja Dyos itz' qo'qe', se'n tma kjalu:

Chin najale' ex chin b'etele' kyuk'i'l;

che ajb'el weye'

ex che okyel te ntaname', chij.

17Qu'mtzun tmatl Qman Dyos kjalu:

Kukyetze' kyxol ex che lq'emile' kyi'j;

lalun tz'ok kymko'ne' tz'il.

Che nk'ma'tzuntze'.

18Ayintzuntze' Manb'aj kyeye',

aye'tzunkye' nk'wale' ex nmyale',

chi Qman Dyos nimtipumal, chiju' tz'ib'a'n.