Zac 13 - Mam Ostuncalco Bible

1Tojtzunju' tq'ijlalil lu kjawitz anq'in jun t-xiklil a', tu'ntzun kytx'jetju' tyajajil Dab'i exqe'ju' najliqe' toj Jerusalen toju' kyil ex kytz'ilil.

2Expe' kb'el nxitune' kyb'iju' witzileb' toj tkyaqilu' tnam lu, tu'n lalun che k'uluntl xjal kwitz. Ex ikx che elel wiq'ine' sanjelal ex tkyaqilju' xewb'aj tz'il toju' tnam lu. Ayine', Dyos Manb'aj nchin q'mante.

3Qatzun ati jun tajb'il tu'n t-xitljo'n tmante jun tpakb'alil, aye'xu' tman kche q'malte kjalu: ¡Kkyimelta qu'n tajb'ila tu'n tmanteju'ya ttchaj yolila ku'xwitloj tpakb'ab'l Qman Dyos! chechiku'. ¡Aye'xju' tman che okyel xyunte tu'n tpaj nok tq'o'ntib' te t-sanjel Dyos!

4Tojtzunju' tq'ijlalil lu aye'ju' sanjelal kche ch'ixwel tu'n kmante ntzaj yek'u'n kye tu'n kpakb'ante. Mix-a'lo' jun ksb'ul tu'n tok tq'o'nju' ktxo'w sanjelal,

5Ape' kyma'ju' teyile junjun: kjolqinwe', mya t-sanjelal Dyos qinwe'. Ntzajlenxe' tal k'walqine' atzu' nchin aq'unane' toj kojb'il.

6Ex qa ati jun maxjelunte: ¿Yajtzunju' k'ixb'ni lu iqa'n tu'nju' t-xmilala?, ate ktzajel ttzaq'we'n: atzu' soka' b'incha'n wi'je' kyja wamiwe'.

Ate Qman Dyos wajawe'

7Ntma'n Qman Dyos nimtipumal kjalu: ¡We'ktza k'uẍtx'e'nb'il, ti'ju' nk'ik'lele' ex ti'ju' onilweye'!

¡B'yonku'ya k'iklel ex che b'ajex slamju' tnej rit, ex chin okyel meltz'uje' kyi'ju' a'la'j!

8-9Che kyimel masch'i'n nik'janju' nche najan toj tnam lu: atzun min tz'aqli nik'jan che kjel anq'in. Che' ik'elju' che kjel anq'in wu'ne' toj q'aq'; kche nẍtilsa'ye' kse'n nẍtilseta'ju' saqpwaq, k'okyel wu'ne' kuw kse'n nkuwseta'ju' q'anpwaq. Ex che kub'saltzuntz weye', ex kxe'l ntzaq'we'ne' kykub'sb'il. Che okyel nq'o'ne' te ntaname'. Aye'tzunkye' ktzajel ktzaq'we'n: Ate Qman Dyos qajawe'. Ayine', Dyos Manb'aj nchi q'mante.