Is 56 - Mam Ostuncalco Bible

Tu'me'l t-xel kyeju' njapun tyol Dyos kyu'n

1Intma'n Qman Dyos kjalu:

Kyanq'imju'ye' tnik'alilti'j,

kyb'inchamju'ye' ttxolilti'j,

qu'n naqch'inxtl kytzaqpete' wu'ne';

kxe'l nyek'u'ne' wipumale' tu'n nkolone'.

2Tzalajb'il teju' xjal nche tb'incha'n chaq'b'il lu

ex nche japun b'a'nxi'x tu'n,

ntnima'nju' q'ij te ojlab'l ex min nkub' t-saqchb'e'n,

ex chab'a' nxitka'yi'n tu'n lalun b'inchan myab'a'n, chij.

3Qa ati jun najchaq xjal matxi tq'o'ntib' toj tq'ob' Qman Dyos,

mixti' tu'n tmante:

Oklo chin elel tpa'ne' Qman Dyos ti'ju' ttanam, chiwt.

Exju' xjal mixti' tu'me'l tu'n tten t-xu'jil, mixti' tu'n tmante:

Ikqinwe' kse'n jun tze tzqij, chiwt.

4Qu'n chi Qman Dyos ntma'n:

Qama kub' kynima'n ichan, mixti' tu'me'l tu'n tten kyxu'jil, q'ij te ojlab'l,

exqa ma japunju' wajb'ile' kyu'n

exqa makyb'inchaju' nyole' kyejni b'entti'j,

5kxe'l nq'o'n junwe' ti'xti' kye b'a'nxi'x kyekywitz kyk'wal ex kymyal;

awe' kxe'l nq'o'n kye tu'n tkyej tz'ib'etju' kyb'i tejumajx

toju' njaye' kyojxi' nimaqtapi;

k'okyel nq'o'ne' jun kyb'i tejumajx,

layx kub'najset.

6Exqe'ju' najchaq xjal makyaq'kyib' weye',

tu'n kyajb'en ex tu'n kyk'u'jlan weye',

tu'n kyok te nmajine',

qama kynimaju' q'ij te ojlab'l ex min xkub' kysaqchb'e'n

exqa makyb'inchaju' nyole' kyejni b'entti'j,

7che tzajel wi'ne' twi' witz xjan weye'

ex che tzalajel wu'ne' toju' ja te nab'l nb'iye'.

Kche nk'ma'we' chojb'il k'ok'sb'il ex chojb'il makub' kyq'o'n tib'aju' q'olb'eb'l weye',

qu'n k'okyel we' nja

te nab'l nb'iye' kye kykyaqilju' tnam.

8K'anjetz kyi'ju' ate'x toj chq'ajlaj,

ex kkyb'uyi'tlkyib' wu'ne', chij.

Aku' Qman Dyos inq'mante ja'lu,

aju' nb'inchante tu'n kyb'uyinte jumajtlkyib'

aj Israel b'je'xniqe' sputj.

Tzak'b'ilkye myab'a'n nejenel

9Kukytzaje', tojk'ul txkup;

kukytzaje', txkup te toj k'ul,

che kych'yonqe'xju'ye' rit;

10qu'n moẍqe'kye' xq'uqilte ntaname',

mixti'xte nxikyka'yi'n.

Kykyaqil ikyqe' kse'nqe' tx'yan min nche chiyon;

naq nche wtan ex nche witzk'an;

o'kx kyajb'ilju' tu'n kywtan.

11Ikyqe'ju' kse'n tx'yan inxi'x che we'yajti ex mixjun nche noj,

k'ik'lelqe' mixti'x nkane toj kywitz;

teyilex junjun tojx tb'e,

naq o'kx nkyjyo'nju' aju' ati tajb'en kye, chij.

12Inkyma'n: Qo'qe' jyol b'in

ex k'wab'j tx'omsa'n tu'n qtx'ojti.

Ex ikx qb'incha'ju' najchi'j,

mujqa nimxi'xtl qb'incha'.