Is 48 - Mam Ostuncalco Bible

Tqanil ak'a'j tu'n Qman Dyos

1Kyb'intzpe'ju'ye' lu, tyajajil Jakob',

tok tb'iya te Israel

ex tyajajil Jadaya;

intma'n jun tyola toj tb'i Qman Dyos;

qa nkub'sana te Qman Dyos ja k'uluna' Israel,

extzun mya ax ex mya toj tzinun tu'na;

2intma'na qa najliya toju' xjan nintnam

ex ntklo'ntib'a ti'ju' Dyos ja k'uluna' Israel,

A tb'iju' Qman Dyos nimtipumal:

3Atxi'x tnejelku' xinma'ne' ti'xti' te ojtxi' teya;

ayinku'ye' nxiyek'unte.

Tej waq'unane', eb'aj b'entju' ti'xti'.

4B'i'ntoqna' wu'ne' qa pi'stoqa,

qa ikju'ya kse'n k'uxb'il majx kuw

ex min nkub'majtz'uja kse'n q'ank'uxb'il layx tz'umj,

5xinma'ne' teya atxi'x ojtxi',

xinma'ne' teya na'mtoqpe' kyjapun.

Tu'ntzun lalun tmaya: A nwitzleb'e' xb'inchante,

Aju' tilb'ilal xkub' nb'incha'ne' xq'mante, chiwta.

6Matxi' tb'iya tkyaqil ja'lu; ximanpe'ya ti'j,

kkaneb'iltzuntz toj twitza qa ax.

Che xelnma'ne' txqantl ti'xti' teya ja'lo

min tojtzqi'na qu'n toj ewaj ta'qe',

7tzma ẍeb'ent ja'lo, mya ojtxi',

tzma nche tb'i'na ja'lo.

Tu'ntzun lalun tmanya: B'i'ntltoqwe' wu'n, chiwta.

8B'ajx tb'iya'ya qa nche yolinjtz,

ex min ojtzqi'nqe'toq tu'na,

qu'n chkyinna'ta kukxju'.

Kanlitltoqna'we' nwitz mib'a'n b'ina,

ex pi's tb'iya atxi'x titz'jlenxa.

9Ik'xtzun wu'ne' naq tu'n woklene',

njuk'wib'e' naq tu'n woklene' ex min kub' nxitu'na.

10Nẍtilsaya, mikxa' kse'n nẍtilseta' saqpwaq,

ik'nwitze' ti'ja toju' yajb'il naku'j chuj,

11Ma nb'inchaye' naqx tu'n woklene',

qu'n mixti' tu'n tkub' saqchb'etju' nb'iye'.

Lay waje' tu'n t-xiq'etju' ninb'ilweye' te juntl.

Tkla'te Qman Dyos ttanam

12Chin kyb'itze' aj Israel, tyajajil Jakob',

ju' matxi' che ntxoke':

O'qinkxwe' Dyos,

ayine' tnejel ex b'ajsb'il.

13Kyej nkuwsa'ne' tx'otx' tu'n nq'ob'e',

xinslik'u'ne' kya'j tu'n nq'ob'e';

naq njaw nma'ne' kyb'i, tzyettzun kyanq'intz.

14Kyb'uyim kyib'e' kykyaqile' ex kyb'intze':

¿Alkye junkye' q'mante ja'lu qa ikykb'ajelju':

qa aju' ichan matxi' jawnsk'o'ne'

ktb'incha' matxi' kub' nximane' tu'n tb'inchet ti'j B'ab'ilon

ex kyi'ju' xjal kaldey?

15Ayinawe' inq'mante, ayine' ntzaj txkonte,

wu'ne' tzaja',

ex kkanb'al jaxjaku' matxa'.

16Che lq'eqetze' nk'etze' ex kyb'intzju'ye' lu:

B'ajx chin yolina'we' toj ewaj ttzajlenx t-xetnejel;

atinqintoqwe' tej tb'aj tkyaqil ja'lu.

Atzu'n ja'lo matxi' txinq'o'n wipumale' te, ayine' Dyos Manb'aj

ex matxi' tzaj nchq'o'ne', chi Qman Dyos.

17Intma'n Qman Dyos klolkyeye',

aju' Dyos xjal kye aj Israel, ikjalu:

Ayinwe' Dyos Manb'aj kyib'aje';

a nxinyek'u'ne' ti'xti' k'elelb'a'n kyeye',

nche'x nẍaqlu'ne' toju' b'e tu'n tb'eta'ye'.

18¡Naqwit nchex kyb'i'ne' nchaq'b'ile'!

Xi'wtlo' telb'a'n tkyaqil kyeye' kse'n nch'iy jun tnimal a',

ikywitlo kyq'inumalju'ye' kse'n ttolob' ninnjab',

19matxi'wtlo che chmet-xi'x kyyajajile',

miwtlo jun b'ent kyajlet kse'n tz'awun ttzi ninnjab';

miwtlo jun ẍekub' nxitu'ne',

exwitlo min ẍe elwiq'i'ne' nwitze', chi Qman Dyos.

20Kukyetze' toj B'ab'ilon, kukyoqe' kywitz kaldey.

Kymanxe' tqanil lu tuk'i'l sich' te tzalajb'il,

ex ponxju' tqanil kyu'ne' tzmax janpon b'aja' ttxa'n tx'otx'.

Kymanxe' kjalu: ¡Matxi' ttzaqpi Qman Dyos Jakob' ju' tmajen!, chechiku'ye'.

21Maskye e'ik' toj chq'ajlaj tu'n,

min e' k'wajti;

kub' tkab'sa'n piky

ex etzchitj tnimal a' toj tu'n.

22Aye'tzu'n b'inchal myab'a'n, lay che'x toj b'a'n.

Aku' Qman Dyos matxi' q'mante.